ក្រុមព្រឹទ្ធសមាជិកអាមេរិកធ្វើសេចក្តីស្នើច្បាប់ថ្មីមួយដោយឲ្យពិនិត្យមើលឡើងវិញនូវជំនួយសម្រាប់កម្ពុជា
ក្រុមសមាជិកព្រឹទ្ធសភាអាមេរិកចំនួន៥រូប បានតាក់តែងនូវសេចក្តីស្នើច្បាប់ថ្មីមួយស្តីពីគណនេយ្យភាព និងប្រសិទ្ធភាពនៃជំនួយនៅកម្ពុជាក្នុងឆ្នាំ២០១៨។ នេះបើតាមសេចក្តីថ្លែងការណ៍របស់ពួកគេចុះថ្ងៃទី៩ កុម្ភៈ។ នេះគឺជាវិធានការថ្មីមួយទៀតតែក្នុងក្របខ័ណ្ឌអង្គនីតិប្បញ្ញតិរបស់អាមេរិកមកលើរដ្ឋាភិបាលខ្មែរ បន្ទាប់ពីរដ្ឋាភិបាលមហាអំណាចមួយនេះបានបិទទិដ្ឋាការដល់មន្ត្រីខ្មែរមួយចំនួន និងបានបញ្ឈប់ជំនួយដល់ឝ.ជ.បនាពេលកន្លងមក។
ចុះផ្សាយនៅថ្ងៃ៖
សមាជិកព្រឹទ្ធសភាអាមេរិកទាំង៥រូបដែលបានតាក់តែងនូវសេចក្តីស្នើច្បាប់ថ្មីនេះ រួមមានលោក Lindsey Graham លោកDick Durbin លោកTed Cruz លោកBen Cardin និង លោកPatrick Leahy ។ សេចក្តីស្នើច្បាប់ថ្មីនេះ មានគោលដៅកម្រិតជំនួយមកកាន់រដ្ឋាភិបាលកម្ពុជាដោយសារតែសកម្មភាពនានារបស់ខ្លួន និងកិច្ចខិតខំប្រឹងប្រែងដើម្បីការពារសិទ្ធិនិងការទទួលខុសត្រូវដែលមានចែងនៅក្នុងរដ្ឋធម្មនុញ្ញកម្ពុជា រួមទាំងការដោះលែងលោកកឹមសុខា អ្នកកាសែត និងសកម្មជនផ្សេងៗទៀត។ មួយវិញទៀត ច្បាប់នេះក៏តម្រូវឲ្យមានការអនុវត្តបន្តនូវគោលនយោបាយបិទទិដ្ឋាការលើមន្ត្រីកម្ពុជាដែលបានដាក់ចេញនៅក្នុងខែធ្នូឆ្នាំ ២០១៧ រហូតដល់មានការបោះឆ្នោតសភាដោយសេរីនិងយុត្តិធម៌ និងកំណត់ឲ្យបង្កកទ្រព្យសម្បត្តិរបស់បុគ្គលណាម្នាក់ដែលកម្រិតដោយគោលនយោបាយនេះ។
សមាជិកព្រឹទ្ធសភាអាមេរិកលោកLindsey Graham បានចង្អុលបង្ហាញថា លទ្ធិប្រជាធិបតេយ្យនៅក្នុងប្រទេសកម្ពុជាបានស្លាប់បាត់ទៅហើយក្នុងពេលបច្ចុប្បន្ននេះ ដោយសារតែរដ្ឋាភិបាលកម្ពុជាស្ថិតក្រោមឥទ្ធិពល និងការគ្រប់គ្រងរបស់ចិន។ តាមសមាជិកព្រឹទ្ធសភាអាមេរិករូបនេះ សេចក្តីស្នើច្បាប់ស្តីពីគណនេយ្យភាព និងប្រសិទ្ធភាពនៃជំនួយនៅកម្ពុជាក្នុងឆ្នាំ២០១៨ នឹងជំរុញឲ្យមានការប្រើអំណាចរបស់ក្រសួងការបរទេអាមេរិកឆ្លើយតបទៅនឹងការប៉ុនប៉ងរបស់ចិន ដើម្បីធ្វើអាណានិគមកិច្ចលើប្រទេសកម្ពុជា។
ចំណែកសមាជិកព្រឹទ្ធសភាដទៃទៀត សុទ្ធតែបានសម្តែងការយល់ឃើញថា សេចក្តីស្នើច្បាប់ថ្មីនេះគឺជាការឆ្លើយតបដ៏សាកសមមួយទៅកាន់របបដឹកនាំរបស់លោកនាយករដ្ឋមន្ត្រីហ៊ុន សែន ដែលបានបំផ្លាញប្រជាធិបតេយ្យនៅក្នុងប្រទេសកម្ពុជា ក៏ដូចជាការរំលាយគណបក្សប្រឆាំង។ ក្នុងនោះសមាជិកព្រឹទ្ធសភា Ted Cruzបានអះអាងថា លោកហ៊ុន សែន និងចៅហ្វាយនាយរបស់គាត់នៅក្នុងទីក្រុងប៉េកាំងមិនគួរមើលងាយលើដំនោះស្រាយរបស់អាមេរិកចំពោះការការពារលទ្ធិប្រជាធិបតេយ្យនៅកម្ពុជា និងអាស៊ីឡើយ។ រីឯសមាជិកព្រឹទ្ធសភាម្នាក់ទៀត គឺលោកDick Durbinបានបញ្ជាក់ថា អាមេរិកត្រូវផ្ញើសារមួយទៅរដ្ឋាភិបាលកម្ពុជា គឺថាសកម្មភាពទាំងអស់របស់រដ្ឋាភិបាលខ្មែរ មិនអាចទទួលបានទេ និងត្រូវតែបញ្ឈប់។
ប្រតិកម្មទៅនឹងសមាជិកព្រឹទ្ធសភាអាមេរិកទាំងនេះ លោកសុខ ឥសាន អ្នកនាំពាក្យគណបក្សកាន់អំណាចបានអះអាងថា ការខិតខំប្រឹងប្រែងរបស់ពួកគេទាំងនេះ គឺជាឆ្លុះបញ្ចាំងឲ្យឃើញច្បាស់ហើយពីទំនាក់ទំនងរវាងអាមេរិកជាមួយនឹងលោកកឹម សុខា។ លោកថា សមាជិកព្រឹទ្ធសភាអាមេរិកទាំងនេះកំពុងធ្វើសកម្មភាព ដើម្បីការពារលោកកឹម សុខាដែលលោកចាត់ទុកថា ជាកូនចៅរបស់អាមេរិក។
សូមបញ្ជាក់ថា សេចក្តីស្នើច្បាប់ថ្មីរបស់ក្រុមសមាជិកព្រឹទ្ធសភាអាមេរិកនេះ ធ្វើឡើងក្រោយពីរដ្ឋាភិបាលអាមេរិកកាំងបានចាត់វិធានការពីរលើករួចមកហើយមករដ្ឋាភិបាលកម្ពុជា គឺការបញ្ឈប់ជំនួយមកកាន់គ.ជ.ប និងការបិទទិដ្ឋាការដល់មន្ត្រីកម្ពុជាចូលទៅកាន់ទឹកដីអាមេរិក។ ចំពោះសេចក្តីស្នើច្បាប់ថ្មីនេះ ត្បិតថាក្នុងក្របខ័ណ្ឌអង្គនីតិប្បញ្ញត្តិក៏ពិតមែន ប៉ុន្តែពេលត្រូវបានអនុម័តនោះ ច្បាប់ថ្មីនេះនឹងតម្រូវឲ្យនាយកប្រតិបត្តិស្ថាប័នហិរញ្ញវត្ថុអន្តរជាតិរបស់អាមេរិកនីមួយៗរារាំងនូវជំនួយនានាមកកាន់រដ្ឋាភិបាលកម្ពុជា រហូតដល់មានការបោះឆ្នោតដោយសេរី និងយុត្តិធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ