កម្ពុជារៀបចំខ្លួនផ្តល់សច្ចាប័នដល់កិច្ចព្រមព្រៀងក្រុងប៉ារីសស្តីពីអាកាសធាតុ
កាលពីថ្ងៃទី២៣ ខែកញ្ញា គណៈរដ្ឋមន្ត្រីកម្ពុជាបានអនុម័តបញ្ជូន កិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុទៅសុំ សច្ចាប័នពីស្ថាប័ននីតិប្បញ្ញតិ្ត។ កិច្ចព្រមព្រៀងនេះ ត្រូវបានមន្ត្រីរដ្ឋាភិបាលបញ្ជាក់ថាអាចនឹងត្រូវសភាលើកយកមកសម្រេចនៅពេលចូលកងវិញ ក្នុងខែតុលាខាងមុខនេះ។
ចុះផ្សាយនៅថ្ងៃ៖
ស្តាប់ - ០២:១៥
ចំពោះកម្ពុជាពេលនេះ កិច្ចព្រមព្រៀងក្រុងប៉ារីសស្តីពីការប្រែប្រួលអាកាសធាតុបានឈានមួយដំណាក់កាលទៀតហើយ ក្នុងគោលដៅឈានទៅរកការផ្តល់សច្ចាប័នពីស្ថាប័ននីតិប្បញ្ញត្តិ។ ជាកិច្ចព្រមព្រៀងមួយ ដែលនឹងផ្តល់ផលប្រយោជន៍មួយចំនួនដល់កម្ពុជាដែរ ហើយក៏ជាការរួមចំណែកកាត់បន្ថយកម្តៅលើភពផែនដី។ នេះបើតាមមន្ត្រីនាំពាក្យក្រសួងបរិស្ថានលោកស្រ៊ុន ដារិទ្ធិ។
នៅក្នុងសន្និសីទស្តីពីអាកាសធាតុ (COP21) កាលពីខែធ្នូ ឆ្នាំ២០១៥ នៅប្រទេសបារាំង មានប្រទេសប្រមាណ១៩៥លើពិភពលោកបានអនុម័តកិច្ចព្រមព្រៀងអាកាសធាតុជាសកលដំបូងគេមួយ ដើម្បីឲ្យប្រទេសទាំងអស់លើភពផែនដីនេះចាប់ផ្តើមសកម្មភាពរបស់ខ្លួនឆ្លើយតបនឹងការប្រែប្រួលអាកាសធាតុ។ កិច្ចព្រមព្រៀងស្តីពីការកាត់បន្ថយកំដៅផែនដីនេះ អាចចូលជាធរមានជាស្ថាពរនៅមុនដំណាច់ឆ្នាំ២០១៦។
កាលពីពេលថ្មីៗនេះ មានប្រទេសមហាអំណាចពីរដែលបញ្ចេញឧស្ម័នពុលច្រើនជាងគេលើផែនដី គឺចិន និងអាមេរិក បានប្រកាសផ្តល់សច្ចាប័នលើកិច្ចព្រមព្រៀងនេះ។ តួលេខចុងក្រោយរហូតមកដល់ពេលនេះ មានប្រទេស៦០បានប្រកាសផ្តល់សច្ចាប័ន ប៉ុន្តែបើគិតជាភាគរយ គឺមានតែ៤៧.៧៦ភាគរយនៃប្រទេសបញ្ចេញឧស្ម័នពុល ដែលបានផ្តល់សច្ចាប័ន។
គួរជំរាបជូនថាក្នុងករណីប្រទេសផ្តល់សច្ចាប័នមានគ្រប់៥៥ តែសុទ្ធតែជាប្រទេសតូចៗ ដែលមិនបញ្ចេញឧស្ម័នពុលច្រើន ហើយមិនគ្រប់៥៥% នៃកម្រិតឧស្ម័នពុលសរុប គឺកិច្ចព្រមព្រៀងនេះ មិនអាចចូលជាធរមានបានទេ។ ដូច្នេះ គេត្រូវការជាចាំបាច់ នូវការផ្តល់សច្ចាប័នពីប្រទេសមហាយក្សសេដ្ឋកិច្ច ដូចជាចិន អាមេរិក ជប៉ុន ឥណ្ឌា ជាដើម។
លោកនាយករដ្ឋមន្ត្រីហ៊ុន សែន កាលពីថ្ងៃទី២២ កញ្ញា បានឲ្យដឹងថាកម្ពុជានឹងបញ្ជូនព័ត៌មានពីដំណើរការនីតិវិធីនៃការផ្តល់សច្ចាប័ននេះប្រាប់UN តាមរយៈរដ្ឋមន្ត្រីការបរទេសកម្ពុជា ដែលចូលរួមកិច្ចប្រជុំរបស់អង្គការសហប្រជាជាតិនៅសហរដ្ឋអាមេរិក ក្រោយពីអង្គការសហប្រជាជាតិអំពាវនាវឲ្យកម្ពុជាពន្លឿនការផ្តល់សច្ចាប័នលើកិច្ចព្រមព្រៀងនេះ។
លោកស្រ៊ុន ដារិទ្ធិបានឲ្យដឹងថា ការផ្តល់សច្ចាប័ននាពេលខាងមុខនេះ បញ្ជាក់ថាកម្ពុជាមានឆន្ទៈនយោបាយក្នុងការចូលរួមដោះស្រាយការប្រែប្រួលអាកាសធាតុ។ លោកបន្ថែមថាតាមរយៈកិច្ចព្រមព្រៀងនេះកម្ពុជានឹងទទួលបានកញ្ចប់ហិរញ្ញវត្ថុ និងបច្ចេកទេស ពីប្រទេសធំៗ ដែលបំពុលបរិយាកាស ហើយប្រទេសតូចៗ ដែលមិនសូវបញ្ចេញឧស្ម័ននេះយកកញ្ចប់ថវិកាទាំងនោះការពារព្រៃឈើរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ