កម្ពុជា-វៀតណាមជំរុញខេត្តជាប់ព្រំដែនឲ្យការពារបង្គោលតម្រុយ និងបង្គោលព្រំដែនកុំឲ្យមានការបំផ្លាញ
ល្ងាចនេះ ភាគីកម្ពុជា និងវៀតណាម បានបិទបញ្ចប់កិច្ចប្រជុំលើកទី ៩ ស្តីពីកិច្ចសហប្រតិបត្តិការ និងការអភិវឌ្ឍរវាងបណ្តាខេត្តជាប់ព្រំដែនកម្ពុជា-វៀតណាមដែលបានធ្វើឡើងរយៈពេលបីថ្ងៃនៅកម្ពុជាចាប់ពីថ្ងៃទីទី ១៣ ដល់ថ្ងៃទី ១៥ មីនានេះ។ ក្រោយកិច្ចប្រជុំនេះ ភាគីទាំងពីរបានឯកភាពជំរុញខេត្តជាប់ព្រំដែនឲ្យការពារបង្គោលតម្រុយ និងបង្គោលព្រំដែនកុំឲ្យមានការបំផ្លិចបំផ្លាញ។
ចុះផ្សាយនៅថ្ងៃ៖
ស្តាប់ - ០២:១៤
នេះ គឺជាចំណុចសំខាន់មួយក្នុងចំណោមលទ្ធផលចំនួន ១៦ចំណុចដែលកើតចេញពីកិច្ចប្រជុំរយៈពេលបីថ្ងៃរវាងមន្រ្តីជាន់ខ្ពស់វៀតណាម និងកម្ពុជា។ នៅក្នុងសេចក្តីប្រកាសរួមរវាងភាគីកម្ពុជា និងវៀតណាមបានសរសេរថា ភាគីទាំងបានជំរុញឲ្យបណ្តាខេត្តជាប់ព្រំដែននៃប្រទេសទាំងពីរត្រូវសហការគ្នាថែរក្សា និង ការពារបង្គោលព្រំដែន និងបង្គោលតម្រុយព្រំដែនដែលបានបោះរួចមិនឲ្យមានការបំផ្លិចបំផ្លាញ និងត្រូវខិតខំបន្តរក្សាការគ្រប់គ្រងព្រំដែនត្រឹមត្រូវតាមសន្ធិសញ្ញា និងកិច្ចព្រមព្រៀងស្តីពីព្រំដែនដែលប្រទេសទាំងពីរបានចុះហត្ថលេខា។
សូមជំរាបជូនថា គិតមកដល់ពេលនេះ កម្ពុជា និងវៀតណាមបានបោះបង្គោលព្រំដែនសម្រេចបានប្រមាណជា ៨៤ភាគរយហើយ។ កម្ពុជា និងវៀតណាមបានប្តេជ្ញាមិនឲ្យមានបញ្ហានៅតាមបណ្តាព្រំដែនទេ ដោយក្នុងករណីមានហេតុការណ៍ឬបាតុភាពអ្វីមួយកើតឡើងនៅតំបន់ព្រំដែន គឺបណ្តាខេត្តជាប់ព្រំដែនត្រូវពិភាក្សា និងសហការគ្នាដោះស្រាយភ្លាម មិនទុកឲ្យបញ្ហាកើតមានឡើងរីករាលដល់បង្កផលប៉ះពាល់ដល់ទំនាក់ទំនងជាប្រពៃណីល្អរវាងប្រទេសទាំងពីរ និងរាំងស្ទះដល់ការងារខណ្ឌសីមានិងបោះបង្គោលព្រំដែនឡើយ។ ជាមួយគ្នានេះ ប្រទេសកម្ពុជា និងវៀតណាម ក៏បានឯកភាពគ្នាមិនអនុញ្ញាតឲ្យកម្លាំងអានុភាពអមិត្តណាមួយប្រើប្រាស់ទឹកដីរបស់ខ្លួន ដើម្បីបំពានបំផ្លាញសន្តិសុខស្ថិរភាពរបស់ប្រទេសម្ខាងទៀត បន្ថែមលើនេះ រដ្ឋាភិបាលទាំងពីរ នឹងបង្កើនការត្រួតពិនិត្យលើការឆ្លងដែនព្រំដែន ស្វែងរក និងទប់ស្កាត់សកម្មភាពប្រឆាំងបំផ្លាញរបស់បណ្តាអមិត្តសំដៅបង្កអសន្តិសុខសណ្តាប់ធ្នាប់របស់ប្រទេសនីមួយៗ។ និងបង្កការបំបែកបំបាក់ទំនាក់ទំនងរវាងប្រទេសទាំងពីរ។
នៅក្នុងកិច្ចប្រជុំរយៈពេលបីថ្ងៃនេះ រៀតណាមក៏បានអរគុណកម្ពុជាចំពោះការជួយឧបត្ថម្ភដល់អាណិកវៀតណាមនៅក្នុងប្រទេសកម្ពុជានាពេលកន្លងមក។ កម្ពុជាក៏បានឆ្លើយតបថា នឹងបន្តចាត់វិធានការសមស្របនានាក្នុងការធានាសិទ្ធិស្របច្បាប់របស់អាណិកជនវៀតណាមដែលរស់នៅកម្ពុជាស្របច្បាប់និងលិខិតបទដ្ឋានរបស់កម្ពុជាដែលជារួមចំណែកពង្រឹងទំនាក់ទំនងរវាងប្រទេសទាំងពីរ។
សូមបញ្ជាក់ថា កិច្ចប្រជុំបីថ្ងៃដែលធ្វើឡើងនៅក្នុងប្រទេសកម្ពុជានេះ ភាគីវៀតណាមតំណាងដោយលោក ផាម ប៊ិញ មិញ រដ្ឋមន្ដ្រីក្រសួងការបរទេសវៀតណាម ហើយចំណែកភាគីកម្ពុជាវិញ គឺលោកស ខេង រដ្ឋមន្រ្តីក្រសួងមហាផ្ទៃ និងមន្រ្តីជាន់ខ្ពស់ផ្នែកសន្តិសុខ និង កិច្ចការព្រំដែនមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ