វិនិយោគិនខ្មែរនិងចិន ចាប់ដៃគ្នាបង្កើតទីក្រុងចិនមួយ នៅជាយរាជធានីភ្នំពេញ
ក្រុមហ៊ុន LYP Group របស់លោក លី យ៉ុងផាត់ នឹងចាប់ដៃគ្នាជាមួយក្រុមហ៊ុនចិន China Minsheng Investment ដើម្បីសង់ទីក្រុងចិនមួយនៅជាយរាជធានីភ្នំពេញ។ បើគ្មានការប្រែប្រួលទេ ក្រុមហ៊ុនទាំងពីរនឹងត្រូវចុះកិច្ចព្រមព្រៀងរួមគ្នាជាផ្លូវការនៅដើមខែធ្នូ មុននឹងឈានទៅសាងសង់ទីក្រុងចិន ដែលមានតម្លៃ១ពាន់៥រយលានដុល្លារនេះ នាដើមឆ្នាំ២០១៧ខាងមុខ។
ចុះផ្សាយនៅថ្ងៃ៖
ស្តាប់ - ០២:១៧
«ទីក្រុងមិត្តភាព កម្ពុជា-ចិន» នឹងត្រូវសាងសង់លើផ្ទៃដី៥៥០ហិកតា នៅក្នុងបរិវេណទីក្រុងរណបរបស់ក្រុមហ៊ុន LYP Group ដែលមានចម្ងាយប្រមាណ១០គីឡូម៉ែត្រ ពីភាគកណ្ដាលរាជធានីភ្នំពេញ។ តាមផែនការមេ ទីក្រុងមិត្តភាព កម្ពុជា-ចិន ដែលមានតម្លៃជាង១ពាន់៥រយលានដុល្លារនេះ នឹងមានគម្រោងតូចៗជាច្រើនរួមមាន សាលារៀន ផ្សារទំនើប កន្លែងតាំងពិព័រណ៍ និងគម្រោងវិនិយោគដទៃផ្សេងទៀត។
ប្រសិនបើគ្មានការប្រែប្រួលណាមួយទេ បន្ទាប់ពីចុះហត្ថលេខាលើកិច្ចព្រមព្រៀងរួមគ្នានៅក្នុងវេទិកាធុរកិច្ចកំពូលកម្ពុជា-ចិន នៅដើមខែធ្នូ ក្រុមហ៊ុន LYP Group និងក្រុមហ៊ុន China Minsheng Investment នឹងចាប់ផ្ដើមសាងសង់ទីក្រុងមិត្តភាព កម្ពុជា-ចិន នៅដើមឆ្នាំ២០១៧តែម្ដង។
គម្រោងទីក្រុងមិត្តភាព កម្ពុជា-ចិន ជាគម្រោងថ្មី មានតម្លៃដល់ទៅ១ពាន់៥រយលានដុល្លារ។ ចង់ឬមិនចង់ គម្រោងនេះបានធ្វើឲ្យអ្នកវិនិយោគលើវិស័យអចលនទ្រព្យសង្ស័យ។ សង្ស័យព្រោះវាជាគម្រោងធំពេក ហើយទំនងជាមិនសមមាត្រទៅនឹងទីផ្សារតូចនៅប្រទេសកម្ពុជាឡើយ។
គួររម្លឹកជូនថា ប្រទេសចិនគឺជាប្រភពឈានមុខគេនៃការវិនិយោគផ្ទាល់ពីបរទេស និងជាប្រទេសផ្ដល់ជំនួយអភិវឌ្ឍក៏ដូចជាកម្ចីដែលមានការប្រាក់ទាបឈានមុខគេដល់កម្ពុជា។ ពីឆ្នាំ២០១៤ ដល់ឆ្នាំ២០១៦ ទឹកប្រាក់វិនិយោគរបស់ចិននៅកម្ពុជាមានចំនួនប្រមាណ ៧ប៊ីលានដុល្លារ តាមរយៈក្រុមហ៊ុនចំនួន១០២ និងគម្រោងចំនួន៣៣៥។ ហើយនៅឆ្នាំ២០១៧ខាងមុខនេះ ប្រទេសទាំងពីរបានដាក់ទិសដៅពង្រីកទំហំពាណិជ្ជកម្មសរុបរវាងកម្ពុជានិងចិន ឲ្យបាន៥ប៊ីលានដុល្លារអាមេរិក។
កាលពីពាក់កណ្ដាលខែតុលាកន្លងទៅ ក្នុងដំណើរទស្សនកិច្ចរយៈពេលពីរថ្ងៃ របស់ប្រធានាធិបតីចិន លោក ស៊ី ជីនពីង នៅកម្ពុជា ប្រទេសទាំងពីរបានសម្រេចនូវកិច្ចព្រមព្រៀងនិងពិធីសារចំនួន៣១ ដែលបានផ្ដល់ផលប្រយោជន៍ចំពោះមុខជាច្រើនដល់កម្ពុជា សម្រាប់ការអភិវឌ្ឍប្រទេស។ ក្នុងនោះរួមមាន ការកសាងព្រលានយន្តហោះនៅខេត្តសៀមរាប ការជួសជុលប្រាសាទព្រះវិហារ ការលើកទឹកចិត្តឲ្យវិនិយោគផ្លូវរថភ្លើងល្បឿនលឿននៅកម្ពុជា ការបង្កើនផ្លូវហោះហើារត្រង់ពីទីក្រុងនានារបស់ចិនមកកម្ពុជា និងការបង្កើនចំនួនទេសចរចិនមកកម្ពុជា ពី៧សែននាក់ ទៅ២លាននាក់នៅឆ្នាំ២០២០ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ