មហោស្រពភាពយន្តអន្តរជាតិកម្ពុជាលើកទី៥ បានបើកជាផ្លូវការ
មហោស្រពភាពយន្តអន្តរជាតិកម្ពុជាលើកទី៥ បានបើកជាផ្លូវការ កាលពីយប់មិញ ដោយមានការអញ្ជើញចូលរួមពីរដ្ឋមន្ត្រីក្រសួងការព័ត៌មាន លោក ខៀវ កាញារិទ្ធ និងលោកស្រី ភឿង សក្កណា រដ្ឋមន្ត្រីក្រសួងវប្បធម៌និងវិចិត្រសិល្បៈ។ ក្នុងរយៈពេល៥ថ្ងៃនៃមហោស្រពនេះ ខ្សែភាពយន្តជាតិ-អន្តរជាតិ និងភាពយន្តឯកសារសរុបជាង៨០រឿង មកពី២៦ប្រទេស នឹងត្រូវចាក់បញ្ចាំងដោយឥតគិតថ្លៃ នៅតាមរោងកុនចំនួន៨នៅក្នុងទីក្រុងភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០១
ពិធីបើកមហោស្រពភាពយន្តអន្តរជាតិកម្ពុជាលើកទី៥ បានធ្វើឡើងនៅក្នុងសាលនៃរោងភាពយន្ត Major Cineplex by Cellcard ក្នុងផ្សារទំនើបអ៊ីអនម៉ល (EAON Mall) ដោយមានការអញ្ជើញចូលរួមពីរដ្ឋមន្ត្រីក្រសួងព័ត៌មាន លោក ខៀវ កាញារិទ្ធ លោកស្រី ភឿង សក្កណា រដ្ឋមន្ត្រីក្រសួងវប្បធម៌និងវិចិត្រសិល្បៈ រួមទាំងសមិទ្ធិករភាពយន្តជាតិ-អន្តរជាតិ និងតារាភាពយន្តក្មេងចាស់ប្រុសស្រី ជាច្រើនរូប ដូចជាអ្នកស្រី ឌី សាវេត និងកញ្ញាម៉ារីណែតតួឯកស្រីរឿងដុំហ្វីលចុងក្រោយជាដើម។
មហោស្រពភាពយន្តអន្តរជាតិកម្ពុជាលើកទី៥ ចាប់ផ្តើមពីយប់ថ្ងៃសុក្រទី៥ធ្នូតទៅ រហូតដល់ថ្ងៃពុធទី១០ខែធ្នូ ដោយមានការចាក់បញ្ចាំងខ្សែភាពយន្តខ្នាតធំ ខ្នាតខ្លី និងភាពយន្តឯកសារសំខាន់ៗ នៅតាមបណ្តារោងភាពយន្តធំៗចំនួន៨ក្នុងរាជធានីភ្នំពេញ។ មហោស្រពភាពយន្តនេះ គ្រោងចាក់បញ្ចាំងខ្សែភាពយន្តល្បីៗចំនួនជាង៨០រឿង មកពី២៦ប្រទេស នៅជុំវិញពិភពលោក ដោយឥតគិតថ្លៃ។ លោកស្រី ភឿង សក្កណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានប្រៀបធៀបថា មហោស្រពភាពយន្តនេះ ដូចជាការបើកចំហជើងមេឃមួយសំរាប់យុវជនកម្ពុជា ដើម្បីស្វែងយល់ពីពិភពលោកខាងក្រៅ ពិសេសគឺដើម្បីផ្សព្វផ្សាយវិស័យភាពយន្តខ្មែរ។
មហោស្រពភាពយន្តអន្តរជាតិកម្ពុជាបានក្លាយជាព្រឹត្តិការណ៍ភាពយន្តដ៏សំខាន់ជាងគេនៅក្នុងប្រទេសកម្ពុជា ក្នុងការផ្សព្វផ្សាយផលិតផលភាពយន្តក្នុងស្រុកយ៉ាងទូលំទូលាយទៅកាន់ឆាកអន្តរជាតិ និងជាឱកាសផ្លាស់ប្តូរបទពិសោធន៍ ចំណេះដឹងទៅវិញទៅមក រវាងផលិតករភាពយន្តខ្មែរ និងបរទេស។ ហើយអ្វីដែលមានមោទនភាពនៅក្នុងមហោស្រពភាពយន្តអន្តរជាតិកម្ពុជាលើកទី៥នេះ គឺខ្សែភាពយន្តខ្នាតធំពីរដែលផលិតដោយកូនខ្មែរ ត្រូវបានដាក់បញ្ចាំង ទី១គឺ "រឿងទ្វាររបង" ដែលនិយាយពីសម័យខ្មែរក្រហម។ ជារឿងដែលផលិតដោយសមិទ្ធិករបារំាង លោកRégis Wargnier ដែលធ្លាប់បានទទួលពានរង្វាន់អូស្ការ សម្រាប់រឿងIndochine ក្នុងឆ្នាំ ១៩៩២ និងទី២ គឺរឿង "ដុំហ្វីលចុងក្រោយ" ដែលទើបនឹងទទួលបានពានរង្វាន់ព្រលឹងអាស៊ី ពីមូលនិធិភាពយន្តប្រទេសជប៉ុន កាលពីខែតុលាកន្លងទៅថ្មីៗនេះ។
មហោស្រពភាពយន្តអន្តរជាតិកម្ពុជា ត្រូវបានបង្កើតឡើងនៅឆ្នាំ២០១០ ដែលរៀបចំឡើងដោយមជ្ឈមណ្ឌលបណ្តុះបណ្តាលជំនាញភាពយន្ត ក្រោមកិច្ចសហការគាំទ្រពីក្រសួងវប្បធម៌ និងវិចិត្រសិល្បៈ ក្រសួងព័ត៌មាន និងអង្គការយូនីស្កូប្រចាំនៅកម្ពុជា។
លោកស្រី ភឿង សក្កណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានថ្លែងបើកសម្ពោធមហោស្រពភាពយន្តនេះ កាលពីយប់មិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ