សង្គមស៊ីវិលបារម្ភពីវត្តមានអ្នកសង្កេតការណ៍របស់ ACU ក្នុងពេលប្រឡងបាក់ឌុប២០១៧
ការប្រឡងសញ្ញាបត្រមធ្យមសិក្សាទុតិយភូមិ ឬការប្រឡងបាក់ឌុប នឹងប្រព្រឹត្តទៅនៅថ្ងៃទី២១សីហាខាងមុខនេះហើយ ដោយមានបេក្ខជនចូលរួមប្រឡងសរុបចំនួនជាង១០ម៉ឺននាក់ នៅទូទាំងប្រទេស។ ខណៈដែលការប្រឡងបាក់ឌុបកាន់តែខិតជិតចូលមកដល់ អង្គភាពប្រឆាំងអំពើពុករលួយ ACU បានរៀបចំការបណ្ដុះបណ្ដាលសម្រាប់អ្នកសង្កេតការណ៍ជិត៥ពាន់នាក់ អំពីតួនាទីនិងភារកិច្ចរបស់អ្នកសង្កេតការណ៍។ ប៉ុន្តែសមាគមគ្រូបង្រៀនកម្ពុជាយល់ឃើញថា វត្តមានអ្នកសង្កេតការណ៍របស់ ACU នេះ មិនចាំបាច់ទាល់តែសោះសម្រាប់ការប្រឡង។
ចុះផ្សាយនៅថ្ងៃ៖
ស្តាប់ - ០២:០១
លោកស្រី អ៊ុក ឆាយ៉ាវី ប្រធានស្ដីទីសមាគមគ្រូបង្រៀនកម្ពុជាឯករាជ្យ មើលឃើញថា ការអនុញ្ញាតឲ្យមានអ្នកសង្កេតការណ៍របស់ ACU នៅក្នុងពេលប្រឡង បានបង្ហាញពីអសមត្ថភាពរបស់ក្រសួងអប់រំ ក្នុងការរៀបចំការប្រឡងប្រកបដោយសុក្រឹតភាព។ សម្រាប់ប្រធានស្ដីទីសមាគមគ្រូបង្រៀនរូបនេះ ក្រសួងអប់រំគួរតែដើរតួរៀបចំនិងដឹកនាំការប្រឡងដ៏សំខាន់នេះដោយខ្លួនឯង ដោយអនុញ្ញាតឲ្យលោកគ្រូ អ្នកគ្រូ បំពេញភារកិច្ចជាគណៈមេប្រយោគ និងជាអ្នកសង្កេតការណ៍ដោយខ្លួនឯង ដោយមិនចាំបាច់មានការឃ្លាំមើលពីអង្គភាពប្រឆាំងអំពើពុករលួយឡើយ។ នេះបើតាមលោកស្រី អ៊ុក ឆាយ៉ាវី។
ចំណែកប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ វិញ។ លោកមិនជំទាស់នឹងវត្តមានអ្នកសង្កេតការណ៍របស់ ACU ក្នុងពេលប្រឡងបាក់ឌុបទេ ប៉ុន្តែលោកកត់សម្គាល់ឃើញថា អ្នកសង្កេតការណ៍មួយចំនួនតូចរបស់ ACU មានឥរិយាបទខ្វះខាតនៅពេលបំពេញការងារជាមួយអនុរក្ស។ ក្នុងន័យនេះ លោក សន ជ័យ ទទូចឲ្យមានការពង្រឹងសីលធម៌របស់អ្នកសង្កេតការណ៍បន្ថែមទៀត ដើម្បីធានាថា អ្នកសង្កេតការណ៍នឹងជួយបំពេញបន្ថែមឲ្យការប្រឡង មិនមែនក្លាយជាឧបសគ្គសម្រាប់ការប្រឡងទេ។
សូមរំឭកជូនថា ក្រសួងអប់រំ បានបើកឲ្យមានអ្នកសង្កេតការណ៍ការប្រឡងជាលើកដំបូងនៅក្នុងសម័យប្រឡងបាក់ឌុបឆ្នាំ២០១៤ ដោយសហការណ៍ជាមួយ ACU។ ដើម្បីអាចចូលរួមសង្កេតការណ៍ប្រឡងបាន អ្នកពាក់ព័ន្ធត្រូវដាក់ពាក្យសុំទៅកាន់ ACU ហើយ ACU នឹងបើកវគ្គបណ្ដុះបណ្ដាលអំពីតួនាទីនិងភារកិច្ចរបស់អ្នកសង្កេតការណ៍។ នៅឆ្នាំ២០១៧នេះ អ្នកសង្កេតការណ៍ប្រឡងបាក់ឌុបដែលបានទៅចុះឈ្មោះនៅអង្គភាពប្រឆាំងអំពើពុករលួយ មានចំនួនសរុប៤៨១៦នាក់។
ចំណែកការប្រឡងបាក់ឌុបនៅឆ្នាំនេះ មានបេក្ខជនចូលរួមប្រឡងសរុប១០៣ ១១២នាក់ នៅមណ្ឌលប្រឡងចំនួន១៧៨ ចែកជា៤ ១៥៤បន្ទប់ នៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ