បក្សប្រឆាំង ធ្វើពហិការមិនចូលសភាអនុម័តច្បាប់សមាគម និងអង្គការ
នៅក្នុងសេចក្តីថ្លែងការណ៍ ថ្ងៃទី១២ ខែកក្កដានេះ គណបក្សសង្រ្គោះជាតិបានបញ្ជាក់ថា ក្រុមតំណាងរាស្ត្ររបស់គណបក្សប្រឆាំងនឹងធ្វើពហិការ ដោយមិនចូលរួមអនុម័ត សេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល។ ខណៈក្រុមអង្គការ សមាគម មួយចំនួននឹងរៀបចំធ្វើសន្និសីទកាសែត នៅថ្ងៃស្អែក ខាងមុខរដ្ឋសភា ដើម្បីបញ្ជាក់ជំហរឲ្យសភាទម្លាក់ចោលការអនុម័តច្បាប់នេះ។
ចុះផ្សាយនៅថ្ងៃ៖
ស្តាប់ - ០១:៥៨
គណបក្សសង្រ្គោះជាតិ នៅថ្ងៃទី១២ ខែកក្កដានេះ បានចេញសេចក្តីថ្លែងការណ៍មួយ បញ្ជាក់ថាតំណាងរាស្ត្រទាំងអស់របស់គណបក្សប្រឆាំងមួយនេះ នឹងមិនចូលរួមអនុម័តលើសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល នៅថ្ងៃទី១៣ ខែកក្កដានេះ ទេ។ ដោយគណបក្សនេះ បានចាត់ទុកថា ច្បាប់នេះមានលក្ខណៈគាបសង្កត់ កម្រិតសិទ្ធិសេរីភាពបុគ្គលក្នុងការសម្តែងមតិ និងក្នុងការចូលរួមក្នុងសកម្មភាពសង្គម សេដ្ឋកិច្ច នយោបាយ ប៉ះពាល់ដល់លទ្ធិប្រជាធិបតេយ្យផងដែរ។
បក្សសង្រ្គោះជាតិបានចាត់ទុកច្បាប់នេះថា មិនមានការចូលរួមពិគ្រោះយោបល់ពេញលេញពីភាគីពាក់ព័ន្ធគ្រប់ភាគីនោះទេ។ ហើយស្នើសុំឲ្យរដ្ឋាភិបាល ចំណាយពេលវេលាបន្ថែមទៀត ដើម្បីពិចារណាឡើងវិញចំពោះច្បាប់នេះ។ ចំណែកឯ រដ្ឋសភាគួរតែទម្លាក់ចោលការអនុម័តច្បាប់នេះតែម្តង។
ជាដំណោះស្រាយនាពេលខាងមុខ លោក យឹម សុវណ្ណ អ្នកនាំពាក្យគណបក្សសង្រ្គោះជាតិ បានថ្លែងប្រាប់វិទ្យុបារាំង នៅថ្ងៃនេះថា នៅឆ្នាំ២០១៨ខាងមុខ នៅពេលដែលគណបក្សប្រឆាំងឈ្នះឆ្នោត នោះគណបក្សនេះ នឹងធ្វើវិសោធនកម្មច្បាប់នេះឡើងវិញ ដើម្បីឲ្យសមាគម និងអង្គការមិនមែនរដ្ឋាភិបាលអាចធ្វើសកម្មភាពរបស់ខ្លួនបានធម្មតា។
ចំណែក លោក នី ចរិយា មន្ត្រីសើបអង្កេតសិទ្ធិមនុស្សសមាគមអាដុក បានឲ្យដឹងដែរថា ក្រុមសង្គមស៊ីវិលមួយចំនួន មិនអាចធ្វើអ្វីបានទេ នៅពេលនេះក្រៅតែពីការបញ្ជាក់ជំហរ របស់ខ្លួនទៅកាន់រដ្ឋាភិបាល និងរដ្ឋសភាជាតិ ហើយនៅព្រឹកថ្ងៃទី១៣ កក្កដានេះក្រុមអង្គការសង្គមស៊ីវិលនឹងនាំគ្នាធ្វើសន្និសីទកាសែតមួយនៅខាងមុខរដ្ឋសភា ដើម្បបញ្ជាក់ជំហរមិនរាថយប្រឆាំងដាច់ខាតចំពោះការអនុម័តច្បាប់នេះ។
សូមបញ្ជាក់ថា ច្បាប់ស្តីពីសមាគម និងអង្គការក្រៅរដ្ឋាភិបាល បានទៅដល់រដ្ឋសភាជាតិ កាលពីថ្ងៃទី១៦ ខែមិថុនា ក្រោយពីបានលុបចោល ២មាត្រា និងកែសម្រួល ២មាត្រា ដោយទីស្តីការគណៈរដ្ឋមន្ត្រី កាលពីថ្ងៃទី៥ ខែមិថុនា។ ហើយសភាបានរៀបចំសិក្ខាសាលាថ្នាក់ជាតិមួយ កាលពីថ្ងៃទី៨ កក្កដា កន្លងទៅ ដើម្បីពិភាក្សាជាផ្លូវការលើសេចក្តីព្រាងច្បាប់ ៩ជំពួក និង៣៩មាត្រានេះ ដោយមានអង្គការសង្គមស៊ីវិល និងភាគីពាក់ព័ន្ធមួយចំនួនបានចូលរួមផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ