សវនាការសកម្មជននឹងបន្តដោយមានការឃ្លាំមើលពីតំណាងរាស្ត្របក្សប្រឆាំងមិនជាប់ពាក់ព័ន្ធសំណុំរឿងហឹង្សា
ក្រុមមេធាវីការពារក្តីជនត្រូវចោទបានជំនុំគ្នារួចហើយថា នឹងស្នើសុំទៅតុលាការឲ្យកំណត់កាលបរិច្ឆេទជាថ្មី ដើម្បីបើកសវនាការលើសំណុំរឿង ហឹង្សានៅទីលានប្រជាធិបតេយ្យ កាលពីថ្ងៃទី១៥ខែកក្កដា។ ការសម្រេចនេះបានធ្វើឡើងបន្ទាប់ពីមានការចម្រូងចម្រាស់គ្នានៅក្នុងសវនាការកាលពីម្សិលមិញ នៅសាលាដំបូងរាជធានីភ្នំពេញ ទាក់ទងទៅនឹងវត្តមានតំណាងរាស្ត្រគណបក្សសង្គ្រោះជាតិ ដែលតុលាការយល់ថាមិនអាចចូលស្តាប់បានដោយសារអ្នកតំណាងរាស្ត្រដែលមានឈ្មោះ៧រូបនោះជាប់ពាក់ព័ន្ធទៅនឹងសំណុំរឿងដូចគ្នា បើទោះណាជាពួកគាត់ត្រូវបានសម្របសម្រួលតាមផ្លូវនយោបាយក៏ដោយ។
ចុះផ្សាយនៅថ្ងៃ៖
ស្តាប់ - ០២:០១
សវនាការលើសំណុំរឿងហឹង្សារនៅក្បែរទីលានប្រជាធិបតេយ្យ កាលពីម្សិលមិញនៅសាលាដំបូងរាជធានីភ្នំពេញ បានផ្អាកពាក់កណ្តាលទីដោយភាពចម្រូងចម្រាស់គ្នាទាក់ទងទៅនឹងវត្តមានរបស់អ្នកតំណាងរាស្ត្រនៅក្នុងបន្ទប់សវនាការ ដែលក្រុមប្រឹក្សាជំនុំជម្រះយល់ថាមិនអាចអនុញ្ញាតឲ្យពួកគាត់ដែលមានឈ្មោះពាក់ព័ន្ធរឿងក្តីដូចគ្នានេះអង្គុយស្តាប់បានទេ។
ការផ្អាកសវនាការដែលមានជនត្រូវចោទ ១១នាក់នេះ តុលាការមិនបានកំណត់សវនាការជាថ្មីនៅពេលណានៅឡើយ។ ក៏ប៉ុន្តែលោក ហែម សុជាតិ មេធាវីមួយរូបការពារក្តីឲ្យជនត្រូវចោទ ដែលជាសកម្មជាសកម្មជន គណបក្សសង្គ្រោះជាតិ បានថ្លែងប្រាប់វិទ្យុបារាំងអន្តរជាតិ RFI នៅថ្ងៃសុក្រនេះថា ក្រុមរបស់លោក នឹងដាក់លិខិតទៅកាន់តុលាការនៅថ្ងៃចន្ទសប្តាហ៍ក្រោយដើម្បីស្នើសុំតុលាការដាក់កាលបរិច្ឆេទបើកសវនាការឡើងវិញ។
ជាមួយគ្នានេះលោកស្រី មួរ សុខហួរ អ្នកតំណាងរាស្ត្រមួយរូបក្នុងចំណោមអ្នកតំណាងរាស្ត្របក្សប្រឆាំង ៧រូបដែលតុលាការយល់ថាជាប់ពាក់ព័ន្ធនឹងសំណុំរឿងដូចគ្នានេះ ថ្លែងថាលោកស្ត្រីចង់ឲ្យមានការប្រញាប់ប្រញាល់ក្នុងការកាត់សេចក្តីនេះប្រកបដោយយុត្តិធម៌ ដោយយោងទៅលើការលំបាករបស់អ្នកនៅក្នុងឃុំ។
លោកស្ត្រី មួរ សុខហួរ បញ្ជាក់ថាការបើកសវនាការលើកក្រោយចាំបាច់ត្រូវតែមានអ្នក តំណាងរាស្ត្រគណបក្សសង្គ្រោះជាតិដែលមាន៥៥រូប ចូលរួមសង្កេតការណ៍ប្តូរវេនគ្នា បើទោះណាជាតុលាការមិនអនុញ្ញាត តំណាងរាស្ត្រ៧រូបចូលស្តាប់ក៏ដោយ។
ទោះជាយ៉ាងនេះក្តី តុលាការនៅមិនទាន់បានជូនដំណឹងណាមួយពីការផ្លាស់ប្តូរក្រុមមេធាវីការពារក្តីឲ្យជនត្រូវចោទ ខណៈដែលក្រុមមេធាវីទាំងនេះបានដើរចេញពីបន្ទប់សវនាការកាលពីម្សិលមិញ។ចៅក្រមជំនុំជម្រះមិនអាចទាក់ទងបានទេ នៅថ្ងៃនេះ។ ក៏ប៉ុន្តែមេធាវីដើមបណ្តឹងលោក ចេង ប៉េងហាប់ ពន្យល់ថា តុលាការនឹងស្នើទៅគណៈមេធាវីដើម្បីឲ្យចាត់តាំងក្រុមមេធាវីការពារជនត្រូវចោទថ្មី។ ក៏ប៉ុន្តែតុលាការមិនអាចបង្ខំឲ្យជនត្រូវចោទទទួលយកមេធាវីថ្មីបានទេបើពួកគេមិនចង់បានអ្វីៗអាស្រ័យលើឆន្ទៈជនត្រូវចោទក្នុងការជ្រើសរើសមេធាវី ដើម្បីពន្លឿននីតិវិធីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ