សំណើបង្កើតប្រធានក្រុមតំណាងរាស្ត្រនឹងត្រូវពិនិត្យនៅសប្តាហ៍ក្រោយ
រដ្ឋសភាជាតិនឹងដាក់សំណើពិនិត្យដើម្បីធ្វើវិសោធនកម្មលើមាត្រា៤៨ថ្មីពីរ ស្តីពីការបង្កើតក្រុមតំណាងរាស្ត្រក្នុងសភានៅសប្តាហ៍ក្រោយនេះ។ ការស្នើវិសោធនកម្មនេះ គឺធ្វើឡើងក្រោយជំនួបកំពូលរវាងមេដឹកនាំគណកប្សប្រជាជនកម្ពុជា និងគណបក្សសង្គ្រោះជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
សំណើបង្កើតប្រធានក្រុមតំណាងរាស្ត្រក្នុងសភា នឹងត្រូវគណៈអចិន្ត្រៃយ៍របស់សភា ពិនិត្យពិភាក្សានៅសប្តាហ៍ក្រោយ។ លោកអេង ឆៃអ៊ាង ប្រធានគណៈកម្មការទី១កូតាគណបក្សសង្គ្រោះជាតិ និងជាសមាជិកជាន់ខ្ពស់របស់គណបក្សប្រឆាំង បានបញ្ជាក់ប្រាប់វិទ្យុបារាំងនៅថ្ងៃសុក្រនេះថា សំណើបង្កើតប្រធានក្រុមតំណាងរាស្ត្រក្នុងសភា និងប្រធានក្រុមតំណាងរាស្ត្រភាគតិចឋានៈស្មើនាយករដ្ឋមន្ត្រីនេះ នឹងត្រូវលើកយកមកពិនិត្យនៅសប្តាហ៍ក្រោយដើម្បីបើកផ្លូវឱ្យគណៈកម្មការនីតិកម្មរបស់សភាចាប់ផ្តើមពិនិត្យដើម្បីវិសោធនកម្ម។ វិសោធនកម្មដែលប្រមុខដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ បានបញ្ជាក់កាលពីកិច្ចជំនួបកំពូលថ្ងៃទី២៨ វិច្ឆិកាថា ជាកិច្ចការងារអាទិភាព។
លោកនាយករដ្ឋមន្ត្រីហ៊ុន សែនបានបញ្ជាក់ថា ការបង្កើតឱ្យមានប្រធានក្រុមតំណាងរាស្ត្រដែលជាដៃគូសន្ទនាជាមួយនាយករដ្ឋមន្ត្រី និងមានឋានៈស្មើនាយករដ្ឋមន្ត្រីនេះ គឺជាការបង្កើតវប្បធម៌សន្ទនាពិភាក្សារវាងអ្នកនយោបាយនៅកម្ពុជា។ ប៉ុន្តែលោកនាយករដ្ឋមន្ត្រីបានបញ្ជាក់ថា ឋានៈស្មើនាយករដ្ឋមន្ត្រីនេះ គឺគ្រាន់តែជាអាសនៈក្រមប៉ុណ្ណោះ។
សូមបញ្ជាក់ថា ក្នុងជំនួបកំពូលកាលពីចុងខែវិច្ឆិកានោះ លោកនាយករដ្ឋមន្ត្រីហ៊ុន សែន និងលោកសម រង្ស៊ីប្រធានគណបក្សសង្គ្រោះជាតិ ក្រៅពីការយល់ព្រមធ្វើវិសោធនកម្មមាត្រា៤៨ថ្មី២នេះ មេដឹកនាំបក្សទាំងពីរក៏បានបញ្ចប់ការខ្វែងគំនិតគ្នាស្តីពីដំណើរការរៀបចំគណៈកម្មាធិការជាតិរៀបចំការបោះឆ្នោតថ្មីផងដែរ។
លោកអេង ឆៃអ៊ាងបានគូសបញ្ជាក់ទៀតថា កិច្ចការងារស្តីពីដំណើរការរៀបចំគ.ជ.បថ្មីនោះ ត្រូវបានក្រុមការងារគណបក្សទាំងពីរបានបញ្ចប់ហើយ។ បច្ចុប្បន្ននេះ ក្រុមការងារគណបក្សទាំងពីរនឹងចាប់ផ្តើមពិភាក្សាលើច្បាប់បោះឆ្នោតរបស់គ.ជ.បជាបន្តទៀត ដើម្បីកំណត់ថា តើគួរតែយកច្បាប់របស់គ.ជ.ប ចាស់យកមកប្រើ ឬបង្កើតច្បាប់ថ្មី។
គួរកត់សំគាល់ថា ស្ថានការនយោបាយនៅកម្ពុជាបានធូរស្រាលបន្តិច បន្ទាប់ពីមេបក្សទាំងពីរបានជួបពិភាក្សាគ្នាផ្ទាល់ ដើម្បីដោះស្រាយបញ្ហាដ៏ចម្រូងចម្រាសស្តីពីការបង្កើតគណៈកម្មាធិការជាតិរៀបចំការបោះឆ្នោតថ្មីនេះ។ យ៉ាងណាក៏ដោយ សប្តាហ៍ក្រោយនេះ សំណើវិសោធនកម្មមាត្រា៤៨ថ្មីពីរ ស្តីពីបង្កើតក្រុមតំណាងរាស្ត្រ ដែលមានឋានៈស្មើនាយករដ្ឋមន្ត្រីនេះ នឹងត្រូវគណៈអចិន្ត្រៃយ៍សភាពិនិត្យ។ ប៉ុន្តែសង្គមស៊ីវិលបានរិះគន់ការវិសោធនកម្មនេះ ថាជាការបំបោងថវិកាជាតិ និងមិនឱ្យតំលៃរដ្ឋសភាលើសភានិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ