បេក្ខភាពប្រធានបក្សគណបក្សសង្គ្រោះជាតិនឹងសម្រេចនៅថ្ងៃទី ១មីនា
គណបក្សសង្គ្រោះជាតិនឹងបោះឆ្នោតជ្រើសរើសក្បាលម៉ាស៊ីនដឹកនាំគណបក្សនៅថ្ងៃទី ២មីនាខាងមុខ។ ការប្រជុំនេះ គឺបន្ទាប់ពីច្បាប់ស្តីពីគណបក្សនយោបាយកំហិតឱ្យគណបក្សនីមួយៗជ្រើសរើសប្រធានរបស់ខ្លួនក្នុងរយៈពេល ៩០ថ្ងៃ។ ទន្ទឹមនឹងនេះ គណបក្សសង្គ្រោះជាតិដែលមិនទាន់មានប្រធានបក្សនឹងសម្រេចជ្រើសរើសបេក្ខជនប្រធាន អនុប្រធាននៅមុនថ្ងៃសមាជមួយថ្ងៃ។
ចុះផ្សាយនៅថ្ងៃ៖
ស្តាប់ - ០២:០៥
បេក្ខភាពប្រធាន និងអនុប្រធានគណបក្សសង្គ្រោះជាតិថ្មីនឹងត្រូវសម្រេចនៅថ្ងៃទី ១ មីនាខាងមុខ។ គណៈកម្មាធិការនាយកគណបក្សប្រមាណ ១០០នាក់នឹងសម្រេចកំណត់យកបុគ្គលណាមួយធ្វើជាប្រធាន ឬក៏អនុប្រធានបក្សថ្មី ក្រោយតំណែងប្រធានត្រូវទំនេរប្រមាណកន្លះខែតែប៉ុណ្ណោះក្រោយលោកសម រង្ស៊ីដែលមានទោសជាប់ខ្លួនបានប្រកាសលាលែង។ គណបក្សសង្គ្រោះជាតិបញ្ជាក់ថា បុគ្គលដែលនឹងជាប់ជាប្រធាន ឬអនុប្រធានចាំបាច់ត្រូវទទួលសំឡេងគាំទ្រពីសមាជិកគណៈកម្មការនាយកចំនួន ១ភាគ ៣ដែលស្មើប្រមាណជិត ៤០រូបជាមុនសិន។ ក្រោយការសម្រេច គណៈកម្មាធិការនាយកនឹងដាក់ជូនសមាជគណបក្សនៅថ្ងៃទី ២មីនាខាងមុខដើម្បីជ្រើសជាផ្លូវការដោយការបោះឆ្នោតលើកដៃ។ ប៉ុន្តែ លោកអេង ឆៃអ៊ាង អ្នកនាំពាក្យគណបក្សសង្គ្រោះជាតិបានបន្ថែមថា បើក្នុងករណីដែលមានបញ្ជីបេក្ខជនច្រើនលើសពីមួយនោះ សមាជគណបក្សទាំងមូលនឹងបោះឆ្នោតជ្រើសរើសដោយសំងាត់ជំនួសវិញ។ គណបក្សសង្គ្រោះជាតិនឹងកោះប្រជុំសមាជវិសាមញ្ញនៅថ្ងៃទី ២ មីនាខាងមុខ ដោយមានអ្នកចូលរួមប្រមាណ ១ពាន់នាក់ដែលជាតំណាងមកពីគ្រប់ខេត្ត-ក្រុង សមាជិកក្រុមប្រឹក្សាជាតិ ក្រុមចលនានារី ក្រុមចលនាយុវជនជាដើម។
គណបក្សសង្គ្រោះជាតិមិនទាន់បានបង្ហើបពីបុគ្គលណាមួយនឹងត្រូវមកដឹកនាំគណបក្សប្រឆាំងធំជាងគេនៅកម្ពុជានេះនៅឡើយទេ។ ប៉ុន្តែបើតាមសំឡេងអនាមិកមួយដែលបានបែកធ្លាយតាមបណ្តាញសង្គមហ្វេសប៊ុកដែលជាការសន្ទនារវាងលោកសម រង្ស៊ី និងលោក យឹម សុវណ្ណ គណបក្សសង្គ្រោះជាតិនឹងមានក្បាលម៉ាស៊ីន ៤រូប គឺប្រធានបក្សម្នាក់ និងអនុប្រធានគណបក្សចំនួន ៣នាក់។ សូមរំលឹកថា គណបក្សសង្គ្រោះជាតិធ្លាប់បានប្រកាសធ្វើសមាជជ្រើសរើសប្រធានជំនួសលោកសម រង្ស៊ីនៅពាក់កណ្តាលឆ្នាំ ២០១៨ ប៉ុន្តែគណបក្សបានផ្លាស់ប្តូរមកធ្វើសមាជវិសាមញ្ញរបស់បក្សប្រឆាំងយ៉ាងតក់ក្រហលមកថ្ងៃទី ២មីនាខាងមុខនេះវិញ។ ការផ្លាស់ប្តូរនេះបន្ទាប់ពីច្បាប់ស្តីពីគណបក្សនយោបាយដែលទើបវិសោធនកម្ម តម្រូវឱ្យគណបក្សដែលគ្មានមេដឹកនាំត្រូវជ្រើសរើសមេបក្សក្នុងរយៈពេល ៩០ថ្ងៃជាកំហិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ