ករណីរាប់សន្លឹកឆ្នោតឡើងវិញនៅក្នុងឃុំដូង ជ័យជំនះបានធ្លាក់ទៅលើគណបក្សប្រជាជនកម្ពុជាវិញ
នៅទីបំផុតទៅ អាសនៈមេឃុំនៅក្នុងឃុំដូង ស្រុករមាសហែក ខេត្តស្វាយរៀង ដែលមានព្រំប្រទល់ជាប់នឹងប្រទេសវៀតណាម បានធ្លាក់ទៅលើដៃរបស់គណបក្សប្រជាជនកម្ពុជាទៅវិញ។ នេះបើផ្អែកតាមលទ្ធផលចុងក្រោយ និងបិទផ្លូវតវ៉ា ដែលប្រកាសឡើងដោយ គណៈកម្មាធិការជាតិរៀបចំការបោះឆ្នោត នៅព្រឹកថ្ងៃទី១៣មិថុនានេះ។ អ្វីជាការកត់សំគាល់ បញ្ហាសន្លឹកឆ្នោតមិនបានការ កំពុងធ្វើឲ្យលទ្ធផលនៃការបោះឆ្នោត មានការប្រែប្រួល។
ចុះផ្សាយនៅថ្ងៃ៖
ស្តាប់ - ០១:៥៨
គឺបន្ទាប់ពីមានការជជែកគ្នាយ៉ាងតឹងសរសៃករ រវាងតំណាងគណបក្សប្រជាជនកម្ពុជា និងគណបក្សសង្គ្រោះជាតិ និងក្រោយពីមានការពិចារណាថ្លឹងថ្លែងយ៉ាងម៉ត់ចត់ពីសមាជិកទាំង៩រូបនៃគណៈកម្មាធិការជាតិរៀបចំការបោះឆ្នោត នៅទីបំផុតទៅ អាសនៈមេឃុំនៅក្នុងឃុំដូងស្រុករមាសហែក ខេត្តស្វាយរៀង បានធ្លាក់ទៅលើដៃរបស់គណបក្សប្រជាជនកម្ពុជាទៅវិញ។ នេះបើតាមការបញ្ជាក់ពីលោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប។
លោក ហង្ស ពុទ្ធា បានថ្លែងប្រាប់ក្រុមអ្នកកាសែតនៅថ្ងៃនេះថា បន្ទាប់ពីចំណាយពេលជិត២ថ្ងៃដើម្បីរាប់សន្លឹកឆ្នោតឡើងវិញ លើ២៣ការិយាល័យ នៅក្នុងឃុំដូង ស្រុករមាសហែក ខេត្តស្វាយរៀងនេះ លទ្ធផលចុងក្រោយបានបង្ហាញថា គណបក្សប្រជាជនកម្ពុជាទទួលបាន២,៦១១សំឡេង លើគណបក្សសង្គ្រោះជាតិដែលទទួលបាន២,៦០៩សំឡេង។
លទ្ធផលនេះមានន័យថា ជ័យជំនះយ៉ាងប្រផិតប្រផើយត្រឹមតែ២សំឡេងនេះ គឺផ្ទុយពីលទ្ធផលនៃការរាប់សន្លឹកឆ្នោតបឋម។ លទ្ធផលបឋមដែលបង្ហាញថា គណបក្សសង្គ្រោះជាតិទទួលបាន២៥៩៩សំឡេង រីឯគណបក្សប្រជាជនកម្ពុជាទទួលបាន២៥៩៦សំឡេង។ លទ្ធផលប្រែប្រួលនេះ គឺអាស្រ័យដោយសន្លឹកឆ្នោតបានការ និងសន្លឹកឆ្នោតមិនបានការ ដែលបានក្លាយជាការជជែកគ្នាយ៉ាងតឹងសរសៃកររវាងតំណាងគណបក្សនយោបាយទាំងពីរ។
នៅក្នុងការរាប់សន្លឹកឆ្នោតបឋម គណបក្សសង្គ្រោះជាតិបានឈ្នះ៣សម្លេង ប៉ុន្តែគណបក្សប្រជាជនកម្ពុជាមិនសុខចិត្តបានប្តឹងតវ៉ាទៅគណៈកម្មការខេត្តរៀបចំការបោះឆ្នោត (PEC) ឲ្យរាប់សន្លឹកឆ្នោតឡើងវិញ។ ហើយក្រោយពីការរាប់សន្លឹកឆ្នោតឡើងវិញនោះ លទ្ធផលបានប្រែប្រួល ដោយគណបក្សប្រជាជនកម្ពុជាបានកើន៦សំឡេងទៅវិញ។ យ៉ាងណាក៏ដោយ គណបក្សសង្គ្រោះជាតិ ក៏មិនបានសុខចិត្តចំពោះលទ្ធផលនេះដែរ ក៏បានប្ដឹងឡើងមក គជប ដើម្បីសុំឲ្យមានការរាប់សន្លឹកឆ្នោតឡើងវិញ កាលពីថ្ងៃទី ១២ មិថុនា។
យ៉ាងណាក៏ដោយ បើតាមការបញ្ជាក់ពី លោក ហង្ស ពុទ្ធា នេះគឺជាលទ្ធផលចុងក្រោយ និងបិទផ្លូវតវ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ