ការវិវត្តថ្មីៗជុំវិញការអនុវត្តច្បាប់ចរាចរណ៍ផ្លូវគោកដែលចម្រូងចម្រាស់
មកទល់ថ្ងៃនេះ គឺ១សប្តាហ៍ហើយ ដែលរដ្ឋាភិបាលកម្ពុជាដាក់ឲ្យអនុវត្តច្បាប់ចរាចរណ៍ផ្លូវគោកថ្មី។ បន្ទាប់ពីដាក់ឲ្យអនុវត្តន៍ ច្បាប់នេះបានរងប្រតិកម្មជាច្រើន ពីប្រជាពលរដ្ឋ និង អង្គការស៊ីវិល។ ដើម្បីដោះស្រាយបញ្ហា និង ឆ្លើយតបទៅនឹងប្រតិកម្មផ្សេងៗ រដ្ឋាភិបាលកម្ពុជា បានសម្រេចលើកលែង ឬលប់ចោល ការអនុវត្តមួយចំនួននៅក្នុងច្បាប់ចរាចរណ៍ផ្លូវគោកថ្មីនេះ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
កាលពីថ្ងៃម្សិលមិញ រាជរដ្ឋាភិបាលកម្ពុជាបានសម្រេចលប់ចោលប័ណ្ណបើកបរប្រភេទ ក១។ ការលប់ចោលនេះ មានន័យថា អ្នកបើកបរម៉ូតូដែលមានកម្លាំងចាប់ពី ១២៥ CC ចុះក្រោម មិនចាំបាច់មានប័ណ្ណបើកបរទៀតទេ។
ជាមួយគ្នានេះដែរ លោកនាយករដ្ឋមន្ត្រីហ៊ុនសែន បានប្រាប់ឲ្យប្រជាពលរដ្ឋដែលបានបង់ប្រាក់ថ្លៃប្រឡងយកប័ណ្ណបើកបរម៉ូតូ និង ប្រជាពលរដ្ឋដែលបានទទួលប័ណ្ណបើកបរម៉ូតូរួចហើយ ទៅទទួលយកប្រាក់វិញ ប្រសិនបើពួកគេចង់បាន។
ទោះយ៉ាងណា ការលប់ចោលប័ណ្ណបើកបរប្រភេទ ក១ នេះ មិនទាន់មានតម្លៃគតិយុត្តិដែលអាចអនុវត្តបាននោះទេ។ នេះបើតាម លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គម កម្ពុជា។ លោក សន ជ័យបន្តថា រដ្ឋាភិបាលដែលជាអង្គនីតិប្រតិបត្តិមិនអាចលប់ចោល ឬមិនអនុវត្ត មាត្រាណាមួយនៃច្បាប់ដែលអនុម័តដោយរដ្ឋសភា ដែលជាអង្គនីតិបញ្ញត្តនោះទេ។ លោកថា ការកំណត់ឲ្យមានប័ណ្ណបើកបរសម្រាប់ម៉ូតូ មានចែងនៅក្នុងមាត្រា៨ នៃច្បាប់ចរាចរណ៍ផ្លូវគោកថ្មី។
ចំណែក លោក អ៊ា ចរិយា នាយកវិទ្យាស្ថានសុវត្ថិភាពចរាចរណ៍ បានលើកឡើងថា រដ្ឋាភិបាលត្រូវមានយន្តការច្បាស់លាស់ ដើម្បីធានាថាអ្នកបើកបរគ្រប់រូបពិតជាមានចំណេះដឹង និងជំនាញច្បាស់លាស់ស្តីពីសុវត្ថិភាពចរាចរណ៍។ លោកបន្តថា យន្តការទាំងនោះរួមមាន ការអប់រំស្តីពីសុវត្ថិភាពចរាចរណ៍នៅតាមសាលារៀន ចាប់ពីថ្នាក់បឋមសិក្សាដល់ថ្នាក់មហាវិទ្យាល័យ និងជម្រុញឲ្យមន្រ្តីនគរបាលចរាចរណ៍ ចុះធ្វើការអប់រំផ្សព្វផ្សាយនៅថ្នាក់មូលដ្ឋាន។
ទាក់ទងនឹងការអនុវត្តច្បាប់ចរាចរណ៍ផ្លូវគោកថ្មីនេះដែរ នៅថ្ងៃម្សិលមិញ ឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈបានឲ្យដឹងថា ចាប់ពីពេលនេះតទៅ សមត្ថកិច្ចទូទាំងប្រទេស នឹងផ្អាកនូវការត្រួតពិនិត្យឯកសារមួយចំនួន របស់យានយន្តនៅតាមដងផ្លូវ រហូតមានបទបញ្ជាថ្មី។
លោក រុន រ័ត្នវាសនា បានឲ្យដឹងទៀតថា លិខិតស្នាមយានយន្តដែល នឹងត្រូវផ្អាកត្រួតពិនិត្យ និង ផាកពិន័យមានដូចជា៖
1. យានយន្តដែលមិនទាន់មានឯកសារកាត់ឈ្មោះ
2. យានយន្តដែលមិនទាន់មានឯកសារឈៀក
3. ឯកសារអាជីវកម្មរថយន្ត
4. យានយន្តដែលមិនទាន់មានប័ណ្ណសម្គាល់យានយន្ត (កាតគ្រី)
5. យានយន្តដែលមិនទាន់មានប័ណ្ណបើកបរ
សូមរំឮកថា ដើម្បីសម្រួលដល់ការអនុវត្តច្បាប់ចរាចរណ៍ផ្លូវគោកថ្មីនេះ ក្រសួងសេដ្ឋកិច្ច និងក្រសួងសាធារណការ ក៏បានចេញផ្សាយសេចក្តីប្រកាសអំពីការកែប្រែបន្ថយតម្លៃសេវាប្រឡងយកប័ណ្ណបើកបរ និងការប្តូរប័ណ្ណបើកបរយានយន្តផងដែរ។ ការប្រកាសនេះ ធ្វើឡើង១ថ្ងៃ មុនថ្ងៃប្រកាសលប់ចោលបណ្ណបើកបរម៉ូតូ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ