ឃាតកសម្លាប់លោកកែម ឡី ត្រូវបញ្ជូនទៅតុលាការល្ងាចនេះ
ឃាតកសម្លាប់លោក កែម ឡី នឹងត្រូវនគរបាលរាជធានីភ្នំពេញបញ្ជូនទៅសាលាដំបូងរាជធានីភ្នំពេញ ដើម្បីឲ្យតុលាការបន្តនីតិវិធីស៊ើបសួរនៅល្ងាចនេះ។ គម្រោងបញ្ជូនខ្លួនជនដៃដល់នេះ ធ្វើឡើងក្រោយពីការស៊ើបសួរ និងប្រមូលភស្តុតាងរយៈពេល២៤ម៉ោង។ នេះគឺជាករណីឃាតកម្មទីមួយហើយ ដែលអាជ្ញាធរចាប់បានជនបង្កភ្លាមៗ ក្នុងចំណោមឃាតកម្មសម្លាប់បុគ្គលល្បីៗក្នុងប្រទេសកម្ពុជា ដែលវែកមុខឃាតកមិនទាន់ឃើញនៅឡើយរហូតមកដល់បច្ចុប្បន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
នាយឧត្តមសេនីយ៍ ជួន សុវណ្ណ ស្នងការរាជធានីភ្នំពេញបានបញ្ជាក់យ៉ាងខ្លីប្រាប់វិទ្យុបារាំងនៅព្រឹកថ្ងៃទី១១ ខែកក្កដា ថា ក្រោយពីការប្រមូលភស្តុតាងរយៈពេល២៤ម៉ោង បន្ទាប់ពីបានចាប់ខ្លួនជនល្មើស ស្នងការរាជធានីភ្នំពេញនឹងបញ្ជូនជនល្មើសទៅតុលាការក្រុងនៅល្ងាចនេះ។
តាមរយៈសន្និសីទកាសែត កាលពីថ្ងៃទី១០ ខែកក្កដា លោក ជួន សុវណ្ណ បានបង្ហាញមុខជនល្មើស ដោយបញ្ជាក់ថាជាជនល្មើសពិតប្រាកដ ដែលសម្លាប់លោកបណ្ឌិត កែម ឡី ហើយជនល្មើសរូបនោះមានរហ័សនាមថា ជួប សម្លាប់។ តែអាជ្ញាធរមិនបានបញ្ជាក់ពីអត្តសញ្ញាណពិតប្រាកដរបស់ឃាតកទេ។ ក្រោយពីការស៊ើបសួរជនបង្ក អាជ្ញាធរក៏មិនបានបញ្ជាក់ប្រាប់ពីមូលហេតុពិតប្រាកដនៃការសម្លាប់លោកកែម ឡី ដែរ។
លោក លី សុផាណា ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញ បានឲ្យដឹងថារហូតមកដល់ពេលនេះ ការស៊ើបអង្កេតបានទទួលនូវចំណុចល្អប្រសើរ។ តែលោកមិនអាចបញ្ជាក់រៀបរាប់ដល់សាធារណជនបានទេ ព្រោះវាអាចប៉ះពាល់ដល់ការសំងាត់នៃការស៊ើបសួរ។
សូមបញ្ជាក់ថា លោក កែម ឡី ត្រូវបានឃាតកបាញ់សម្លាប់នៅក្នុង ស្តារម៉ាតស្តុបបូកគោ វេលាម៉ោង ៨និង៤០នាទីព្រឹក។ ក្រោយពីហេតុការណ៍នៃការបាញ់សម្លាប់រូបលោក សមត្ថកិច្ចបានចាប់ជនល្មើសភ្លាមៗផងដែរ។ លោក ជួន សុវណ្ណ ធ្លាប់បានបញ្ជាក់ថានឹងស៊ើបអង្កេតបន្តទៀត ដើម្បីស្រាវជ្រាវរកមុខអ្នកនៅពីក្រោយខ្នង បក្សពួក និងអ្នករួមគំនិតក្នុងអំពើឃាតកម្មនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ