រាជរដ្ឋាភិបាល កាត់បន្ថយគម្រោងដីសម្បទានសេដ្ឋកិច្ចនៅត្រឹមយ៉ាងយូរ ៥០ ឆ្នាំ
យោងតាមសេចក្តីប្រកាសពត៌មានរបស់ក្រសួងបរិស្ថាន នៅថ្ងៃទី ២៨ កក្កដា នេះបានឲ្យដឹងថា រាជរដ្ឋាភិបាលកម្ពុជា បានសម្រេចកាត់បន្ថយការអនុវត្តគម្រោងវិនិយោគអភិវឌ្ឍន៍សម្បទានដីសេដ្ឋកិច្ចទាំងអស់មកនៅត្រឹមយ៉ាងយូរ ៥០ ឆ្នាំ។ ការសម្រេចកាត់បន្ថយការអភិវឌ្ឍដីសម្បទានសេដ្ឋកិច្ចដែលមានការគាំទ្រពីសង្គមស៊ីវិលនេះ ដោយសារតែមើលឃើញនូវភាពជាក់ស្តែងថា រយៈពេលវិនិយោគ ៩៩ ឆ្នាំ ៨០ ឆ្នាំ និង ៧០ ឆ្នាំ គឺមានរយៈពេលយូរ។
ចុះផ្សាយនៅថ្ងៃ៖
ស្តាប់ - ០១:៣៣
ក្រុមហ៊ុនទាំង ១៦ ដែលទទួលបានសិទ្ធិវិនិយោគលើផ្ទៃដីសរុប ប្រមាណ ជា ៩ ម៉ឺន ៦ ពាន់ ហិកតា ហើយត្រូវបានកាត់បន្ថយរយៈពេល ក្នុងការអភិវឌ្ឍដីសម្បទានសេដ្ឋកិច្ច នៅពេលនេះ ដោយសារតែ គម្រោងដីសម្បទានរបស់ពួកគេ គឺផ្តោតទៅលើកសិឧស្សាហកម្ម ពោលគឺ កៅស៊ូ ជាចំបង។ ប៉ុន្តែបើយោងតាមការសិក្សាជាក់ស្តែង មួយ វដ្តនៃដំណាំកៅស៊ូ មានរយៈពេល ២៥ ឆ្នាំ ដូច្នេះហើយ រយៈពេល ៥០ ឆ្នាំ នោះវាអាចល្មមគ្រប់គ្រាន់រួចទៅហើយ។ នេះបើតាមការឲ្យដឹងពី នាយខុទ្ទកាល័យក្រសួងបរិស្ថាន លោក ស្រ៊ុន ដារិទ្ធ នៅថ្ងៃទី ២៨ កក្កដានេះ ។
យោងតាម សេចក្តីប្រកាសពត៌មានរបស់ក្រសួងបរិស្ថាន រហូតមកទល់ពេលនេះ ក្រសួងបានត្រួតពិនិត្យ និង វាយតម្លៃគម្រោងវិនិយោគអភិវឌ្ឍន៍ទាំងអស់ចំនួន ១១៣ ដែលមានផ្ទៃដីសរុប ប្រមាណ ៦២ ម៉ឺន ៨ ពាន់ ហិចតា ដែលក្នុងនោះ គម្រោងចំនួន ៨១ ត្រូវបានដាក់ឆ្លងអង្គប្រជុំគណៈកម្មាធិការអន្តរក្រសួងដើម្បីពិភាក្សា និង លើកសំណើរជូនប្រមុខរាជរដ្ឋា ភិបាល ពិនិត្យ និង សម្រេច។ ជាលទ្ធផលគម្រោងរបស់ក្រុមហ៊ុន ២៣ ត្រូវបាន រាជរដ្ឋា ភិបាលសម្រេចដកហូត សិទ្ធិវិនិយោគ ដោយសារតែមិនគោរពតាមគោលការណ៍ និង និតិវិធីដែលបានកំណត់។
ដោយឡែក លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្ដីពីកម្ពុជា NGOs Forum បានសាទរចំពោះ សេចក្តីសម្រេចរបស់រាជរដ្ឋាភិបាល ក្នុងការបន្ថយគម្រោងអភិវឌ្ឍន៍សម្បទានដីសេដ្ឋកិច្ចមកត្រឹមយ៉ាងយូរ ៥០ ឆ្នាំ។ លោក គាំទ្រ ដោយសារតែ ចំណាត់ការនេះ វានឹងក្លាយជាកម្លាំងចលករមួយ ជម្រុញឲ្យក្រុមហ៊ុនទាំងអស់ ពន្លឿននូវការអភិវឌ្ឍរបស់ខ្លួន នៅលើដីសម្បទានសេដ្ឋកិច្ចនោះ ក្រោយពីការទទួលបានភ្លាម។
យ៉ាងណាមិញ លោក នៅតែបារម្ភថា រយៈពេល ៥០ ឆ្នាំនេះនៅតែមានរយៈពេល យូរ ដដែល បើទោះជាមានការកាត់បន្ថយក៏ដោយ។ បន្ថែមលើនេះ លោក ក៏បានស្នើសុំឲ្យមានការចុះត្រួតពិនិត្យ នូវការអនុវត្ត និង អភិវឌ្ឍដីសម្បទានទាំងនោះឲ្យបានទៀងទាត់៕
អត្តបទដោយ៖ សរ ពិសី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ