ទិវាអំណានជាតិ៖ រដ្ឋមន្ត្រីណែនាំយុវជនឲ្យអានសៀវភៅ កុំអានហ្វេសប៊ុកច្រើនពេក
នៅក្នុងឱកាសទិវាអំណានជាតិ១១ មីនា នេះរដ្ឋមន្ត្រីកម្ពុជា បានពន្យល់ណែនាំឲ្យពលរដ្ឋកម្ពុជា ពិសេសយុវជនផ្តោតការយកចិត្តទុកដាក់លើការអានសៀវភៅ ជាជាងការប្រើប្រាស់បណ្តាញសង្គម ដែលពុំសូវបានផ្តល់ចំណេះដឹងច្រើន។ រដ្ឋមន្ត្រីអប់រំក៏បានបញ្ជាក់ថាបច្ចេកវិទ្យាថ្មីៗ ដូចជាបណ្តាញអ៊ីនធឺណិតជាដើមនេះ បានចូលរួមចំណែកច្រើន ក្នុងការបង្កើនការអាននៅកម្ពុជា។
ចុះផ្សាយនៅថ្ងៃ៖
ស្តាប់ - ០២:៣០
នៅថ្ងៃទី១១ ខែមីនា នេះគឺជាទិវាអំណានជាតិ ក្រោមប្រធានបទ “អានដើម្បីភាពសុខដុមនៃជីវិត”។ ទិវាអំណានជាតិលើកទី២នៅឆ្នាំនេះ បានរៀបចំធ្វើឡើងដោយក្រសួងអប់រំ ក្រសួងវប្បធម៌ ក្រសួងព័ត៌មាន និងអង្គការយូណេស្កូប្រចាំកម្ពុជា ដើម្បីជំរុញឲ្យប្រជាជនកម្ពុជាចាប់យកសេចក្តីស្រលាញ់លើការអានបន្ថែមទៀត។
លោកខៀវ កាញារិទ្ធ រដ្ឋមន្រ្តីក្រសួងព័ត៌មាន ដែលបានចូលរួមក្នុងទិវានេះ បានលើកឡើងថា ការមើលវីដេអូនៅក្នុងបណ្តាញយូធូប (YouTube) និងការអាននៅលើបណ្តាញសង្គមហ្វេសប៊ុក (Facebook) មិនបានធ្វើឲ្យអ្នកអានទទួលព័ត៌មានទាំងស្រុងទេ ហើយភាគច្រើនអ្នកប្រើហ្វេសប៊ុកមិនមែនអានព័ត៌មានទាំងអស់ទេ គឺពួកគេមើលតែព័ត៌មានណា ដែលគេពេញចិត្តតែប៉ុណ្ណោះ។
លោកកត់សម្គាល់ថាអ្នកប្រើហ្វេសប៊ុកគ្រាន់តែទទួលនូវលំហូរព័ត៌មានមួយចំនួន ប៉ុន្តែមិនមែនជាការពង្រីកស្មារតីចេះដឹងទេ តែអានសៀវភៅវិញ គឺធ្វើឲ្យមនុស្សចេះពិចារណា ចេះវិភាគតាមលំដាប់លំដោយ។ រដ្ឋមន្ត្រីក្រសួងព័ត៌មានបានបញ្ជាក់ថាបច្ចុប្បន្ននេះយុវជនកម្ពុជា បានអានច្រើន ហើយសៀវភៅនៅសម័យនេះ មានច្រើនជាងសម័យលោកទៅទៀត។
លោកហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា បានថ្លែងទៅកាន់អ្នកចូលរួមប្រមាណ១ពាន់នាក់ ថាដើម្បីបានចំណេះដឹងច្រើនគឺមានតែការអានសៀវភៅ ស្នាដៃអក្សរសិល្ប៍ល្បីៗ និងស្នាដៃទស្សនវិជ្ជា តែបើអានតែទូរស័ព្ទទំនើប ឬហ្វេសប៊ុក គឺមិនទទួលបានចំណេះដឹងទាំងអស់នេះទេ។ លោកបញ្ជាក់ថាសូម្បីតែអ្នកបង្កើតបណ្តាញសង្គមហ្វេសប៊ុក ក៏នៅតែចំណាយពេលវេលាសម្រាប់អានសៀវភៅដែរ។
លោកក៏បានលើកឡើងដែរថាបច្ចុប្បន្ននេះបច្ចេកវិទ្យាក៏បានចូលរួមចំណែកយ៉ាងច្រើន លើការបង្កើនការអាន ប៉ុន្តែការប្រើប្រាស់ឧបករណ៍បច្ចេកវិទ្យាបច្ចុប្បន្ននេះ គឺមិនចំគោលដៅ ដែលទាមទារឲ្យមានការបង្ហាត់បង្រៀនលើការប្រើប្រាស់ឧបករណ៍បច្ចេកវិទ្យាទាំងនោះ។
រដ្ឋមន្ត្រីក្រសួងអប់រំរូបនេះក៏បានកត់សម្គាល់ដែរថា បច្ចុប្បន្ននេះចំនួនបណ្ណាល័យនៅតាមគ្រឹះស្ថានរបស់រដ្ឋនៅតែមានការខ្វះខាតនៅឡើយ។ លោកបន្ថែមថានៅតាមសាលារៀនខ្លះ គឺតម្រូវឲ្យទុកមួយបន្ទប់សម្រាប់រៀបចំជាបណ្ណាល័យ ប៉ុន្តែនៅពេលដែលមានសិស្សចំនួនច្រើន នោះបណ្ណាល័យបានក្លាយជាទីតាំងសម្រាប់សិស្សរៀនទៅវិញ។ តែក្រសួងក៏មានគោលដៅក្នុងការបង្កើនចំនួនបណ្ណាល័យបន្ថែមទៀតទូទាំងប្រទេសកម្ពុជាដែរ។
បើតាមសេចក្តីប្រកាសព័ត៌មាននៃទិវាអំណានជាតិបានឲ្យដឹងថា ចំនួនបណ្ណាល័យនៅតាមសាលាក្នុងប្រព័ន្ធបានកើនឡើងដល់៤៤៧៤ ក្នុងឆ្នាំសិក្សា២០១៤-១៥ ដែលចំនួននេះបានកើនឡើងទ្វេដងក្នុងរយៈពេលដប់ឆ្នាំកន្លងមកនេះ ។ ចំនែកតាមរយៈកម្មវិធីអប់រំក្រៅប្រព័ន្ធចំនួនបណ្ណាល័យ និងបន្ទប់អានបានកើនឡើងពី៣៤ទៅ២០៥ ក្នុងអំលុងឆ្នាំដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ