បារាំងចាប់អារម្មណ៍ទីផ្សារកម្ពុជាលើវិស័យផលិតផលវេជ្ជសាស្ត្រ
បន្ទាប់ពីក្រុមហ៊ុនបារាំងទាក់ទងទៅនឹងការផលិតទឹកស្អាតចំនួន៨ ដែលបានចូលមកស្វែងរកទីផ្សារនៅកម្ពុជា កាលពី៣ឆ្នាំកន្លងទៅ ក្រុមហ៊ុនបារាំងដូចគ្នាលើវិស័យផលិតផលវេជ្ជសាស្ត្រចំនួន៧ ក៏បានសាកល្បងក្នុងទីផ្សារកម្ពុជាផងដែរ។ នៅឯស្ថានទូតបារាំងពេញមួយថ្ងៃទី១៩នេះ ក្រុមហ៊ុនលក់ផលិតផលវេជ្ជសាស្ត្រទាំងនេះ បានធ្វើបទបង្ហាញដល់មន្ត្រីសុខាភិបាលកម្ពុជា តំណាងមន្ទីរពេទ្យរដ្ឋនិងឯកជន នៅក្នុងគោលបំណងស្វែងយល់អំពីទំហំទីផ្សារដែលមានប្រជាជន១៤លាននាក់ និងស្វែងរកដៃគូចែកចាយផលិតផលផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ក្រុមហ៊ុនបារាំងល្បីៗចំនួន៧ នៅថ្ងៃសុក្រទី១៩ មិថុនានេះ បានចំណាយពេលពេញមួយថ្ងៃតាមរយៈសន្និសីទស្តីពីបច្ចេកវិទ្យាវេជ្ជសាស្ត្រ បង្ហាញពីផលិតផលវេជ្ជសាស្ត្ររបស់ខ្លួន នៅខាងក្នុងស្ថានទូតបារាំងប្រចាំប្រទេសកម្ពុជា។ វាជាលើកដំបូងហើយនៃព្រឹត្តិការណ៍ធុរកិច្ចបារាំង នៅប្រទេសកម្ពុជា ដែលចង់ឲ្យបច្ចេកវិជ្ជាពេទ្យរបស់ខ្លួនពង្រីកវិសាលភាពនៅក្នុងតំបន់អាស៊ី អាគ្នេយ៍ទាំងមូល បន្ទាប់ពីក្រុមហ៊ុនផលិតផលពេទ្យទាំងនេះបានបង្ហាញរួចហើយនៅប្រទេសវៀតណាម។
ក្រុមហ៊ុនទាំង៧ បានធ្វើបទបង្ហាញបន្តបន្ទាប់គ្នានៅពីមុខអ្នកចូលរួមប្រមាណជា៦០នាក់ មកពីក្រសួងសុខាភិបាល ក្រសួងពាណិជ្ជកម្ម មន្ទីរពេទ្យរដ្ឋ និងឯកជននានា មាន ក្រុមហ៊ុនATA ទាក់ទងទៅនឹងគុណភាពខ្យល់ ក្រុមហ៊ុនប្រព័ន្ធគ្រប់គ្រងកាកសំណល់វេជ្ជសាស្ត្រ BERTIN TECHNOLOGIE ក្រុមហ៊ុនលក់ឧបករណ៍សម្រាប់សលសាស្ត្របេះដូងនិងប្រអប់ទ្រូង DELACROIX CHEVALIERក្រុមហ៊ុន GELSCOM ក្រុមហ៊ុន HELIOSCOPIE ក្រុមហ៊ុន PROTECSOM និងក្រុមហ៊ុន VYGON។
អ្នកជំនាញផ្នែកពាណិជ្ជកម្មនិងវេជ្ជសាស្ត្រនៅក្នុងប្រទេសកម្ពុជាយល់ថាវត្តមានរបស់ក្រុមហ៊ុនផលិតផលវេជ្ជសាស្ត្របារាំងនាពេលនេះ គឺវាសមស្របទៅនឹងបរិបទកម្ពុជាបច្ចុប្បន្ន ដែលមានតម្រូវការសម្ភារៈទំនើប ដើម្បីលើកតម្លើងវិស័យសុខាភិបាល។
ការបង្ហាញនេះបានធ្វើឡើងបន្ទាប់ពីមានវត្តមានមន្ទីរពេទ្យ ឯកជនធំៗមួយចំនួនបើកបំរើសេវាកម្មនៅកម្ពុជា ដូចជាមន្ទីរពេទ្យ រ៉ូយ៉ាល់រតនៈ មន្ទីរពេទ្យ ចើរី ជាដើម។ លើសពីនេះក៏ជាការឆ្លើយតបមួយដែរសម្រាប់កំរិតជីវភាពប្រជាពលរដ្ឋខ្មែរ ដែលស្ថិតនៅកំរិតមធ្យមនិងអ្នកមានធនធាន។ តាមការបញ្ជាក់ពីសន្និសីទ គឺជាការស្វែងយល់ទំហំទីផ្សារ អតិថិជនដោយផ្ទាល់ និងអ្នកចែកចាយ ដោយផលិតផលក្រុមហ៊ុនមួយចំនួន បានមកដល់និងត្រូវបានប្រើប្រាស់រួចហើយនៅកម្ពុជា។
សូមបញ្ជាក់ថាកន្លងមកមានក្រុមហ៊ុនបារាំងចំនួន៨ដែលជាក្រុមហ៊ុនលំដាប់ពិភពលោកក្នុង វិស័យទឹកស្អាតបានមកកាន់ប្រទេសកម្ពុជាកាលពីខែវិច្ឆិកាឆ្នាំ២០១២ ម្តងហើយដើម្បីស្វែងរកឱកាសក្នុងការវិនិយោគនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ