ប្រាក់ឈ្នួលអប្បរមា សម្រាប់កម្មករ វិស័យកាត់ដេរឆ្នាំ២០២០ ឡើងដល់១៩០ដុល្លារក្នុង១ខែ
ប្រាក់ឈ្នួលអប្បរមាសម្រាប់កម្មករ និយោជិត នៃវិស័យវាយនភណ្ឌកាត់ដេរនិងផលិតស្បែកជើងសម្រាប់ឆ្នាំ២០២០ គឺត្រូវបានកំណត់ជាផ្លូវការចំនួន១៩០ដុល្លារ ក្នុងមួយខែ ខណៈកម្មករសាកល្បងត្រឹម១៨៥ដុល្លារ។ ការកំណត់ប្រាក់ឈ្នួលអប្បរមារបស់កម្មករ និយោជិត រហូតជិត២០០ដុល្លារដូច្នេះ ធ្វើឡើងបន្ទាប់ពីកិច្ចប្រជុំត្រីភាគីចុងក្រោយនៅព្រឹកថ្ងៃសុក្រនេះ។
ចុះផ្សាយនៅថ្ងៃ៖
ស្តាប់ - ០២:២៦
មែនទែនទៅ កិច្ចប្រជុំក្រុមប្រឹក្សាជាតិប្រាក់ឈ្នួលអប្បរមាផ្នែកវាយនភណ្ឌ បានបញ្ចប់ត្រឹមតួលេខ១៨៧ដុល្លារ ស្នើដោយរដ្ឋាភិបាល ដោយតួលេខនេះ ត្រូវបានជ្រើសរើសដាក់ឲ្យភាគីទាំងបីធ្វើការបោះឆ្នោត ក្នុងចំណោមតួលេខពីរផ្សេងទៀត គឺ១៩៥ដុល្លារ ដាក់ដោយសហជីព និង១៨៦ដុល្លារស្នើដោយនិយោជក។ ក៏ប៉ុន្តែ លោកនាយករដ្ឋមន្ត្រី ហ៊ុន សែន បានបន្ថែមចំនួន៣ដុល្លារពីលើនេះ ធ្វើឲ្យប្រាក់ឈ្នួលអប្បរមា កម្មករ និយោជិតវិស័យកាត់ដេរ និងផលិតស្បែកជើង ឡើងដល់១៩០ដុល្លារ ដោយកម្មករអាចទទួលបានប្រាក់ឈ្នួលថ្មីនេះ ចាប់ពីថ្ងៃទី១ខែមករា ឆ្នាំ២០២០ទៅ។
ជាការកត់សម្គាល់ ភាគីសហជីព ដែលជាតំណាងឲ្យកម្មករនិយោជិត បានស្នើដំបូង១៩៩ដុល្លារ និងចុងក្រោយធ្លាក់មក១៩៥ដុល្លារ ដែលជាការទាមទារបន្ថែមពីលើឆ្នាំចាស់១៣ដុល្លារ។ ក៏ប៉ុន្តែភាគីនិយោជកហ៊ានតម្លើងឲ្យដំបូងត្រឹម១៨៤ដុល្លារ តែចុងក្រោយដាក់តួលេខ១៨៦ដុល្លារ។ ទោះយ៉ាងណា ភាគីទាំងអស់បានទទួលយកតួលេខរបស់ក្រសួងការងារ ១៨៧ដុល្លារ និងថែម៣ដុល្លារពីលោក ហ៊ុន សែន ដូចកាលពីឆ្នាំមុនៗដែរ។
មានន័យថា ប្រាក់ឈ្នួលអប្បរមាឆ្នាំថ្មីសម្រាប់កម្មករវិស័យកាត់ដេរ ១៩០ដុល្លារនេះ គឺបានកើនចំនួន៨ដុល្លារ ពីប្រាក់ឈ្នួលឆ្នាំ២០១៩ ដែលមាន១៨២ដុល្លារ។ សូមរំលឹកថា ទំរាំទទួលបានប្រាក់ឈ្នួល១៩០ដុល្លារសម្រាប់ឆ្នាំ២០២០ខាងមុខ នៃវិស័យកាត់ដេរនេះ ក្រុមការងារត្រីភាគី រួមមានសហជីព និយោជក និងតំណាងរដ្ឋាភិបាល បានបើកការជជែកគ្នាចំនួន៥លើកមកហើយ ចាប់តាំងពីខែសីហាមក ដោយមានភាពតឹងតែងជាងឆ្នាំកន្លងទៅ ខណៈភាគីនិយោជក បានបង្ហាញតួលេខនៃការតម្លើងតិចតួច និងដោយប្រយ័ត្នប្រយែង។
ទោះជាមានការទទួលយកពីភាគីទាំងអស់ នូវតួលេខនេះ ក៏ប៉ុន្តែភាគីសហជីពដែលមកពីនិន្នាការចំរុះ ខ្លះបង្ហាញពីការមិនពេញចិត្ត។ លោក អាត់ ធន ប្រធានសហភាពការងារកម្ពុជាថ្លែងថា ស្ថានភាពសេដ្ឋកិច្ចនិងសង្គមល្អ ការប្រកួតប្រជែងក្នុងវិស័យកាត់ដេរល្អ ផលិតភាពកម្មករមានការកើនឡើង និងតម្រូវការរបស់កម្មករមានការកើនឡើង ដូច្នេះប្រាក់ឈ្នួលអប្បបរមាកម្មករឆ្នាំ២០២០ គួរតែច្រើនជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ