អ្នកនាំពាក្យ៖ គ.ជ.ប. គ្មានលុបឈ្មោះជនសង្ស័យ ថាជាជនបរទេសណាម្នាក់ទេ!
បណ្តឹងជំទាស់ ដែលសុំឲ្យលុបឈ្មោះជនបរទេសក្នុងបញ្ជីបោះឆ្នោត គឺមានចំនួន ៦៤ បណ្តឹង ដែលប្តឹងឡើងទៅដល់គ.ជ.ប. ។ បណ្តឹងទាំងនោះ គឺពាក់ព័ន្ធនឹងជនបរទេស ចំនួន ១ ១៨៩នាក់។ នៅចន្ទនេះ គឺជាថ្ងៃដំបូង ដែលក្រុមប្រឹក្សាជំនុំជម្រះរបស់គ.ជ.ប. បើកសវនាការដើម្បីចេញសេចក្តីសម្រេច ទៅលើបណ្តឹងចំនួន៧។ គឺជាបណ្តឹងពាក់ព័ន្ធទៅនឹងការសុំឲ្យលុបឈ្មោះ ក្នុងបញ្ជីបោះឆ្នោត ដែលគេសង្ស័យថាជាជនបរទេស ចំនួន១៨១នាក់។ ប៉ុន្តែ នៅទីបំផុត គ.ជ.ប. បានសម្រេចរក្សាទុកឈ្មោះជនទាំងនោះ ឲ្យនៅដដែល។ សូមស្តាប់ប្រសាសន៍លោក ហង្ស ពុទ្ធា អ្នកនាំពាក្យរបស់គ.ជ.ប. ដែលជាការរៀបចំដោយ ហេង ឧត្តម ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២៨
ជាការកត់សម្គាល់ អ្នកនាំពាក្យគ.ជ.ប. ប្រាប់វិទ្យុបារាំងថា គ្មានលុបឈ្មោះទេ តែផ្ទុយទៅវិញ ប្រធានគ.ជ.ប. លោក ស៊ិក ប៊ុនហុក បានប្រាប់ទៅសារព័ត៌មានក្នុងស្រុកមួយថា មានលុបឈ្មោះជនបរទេសចំនួន១៤នាក់ ក្នុងចំណោម១៨១នាក់ នៃបណ្តឹងជំទាស់ទាំង៧ ដែលដោះស្រាយក្នុងថ្ងៃទី១។
ជាមួយគ្នានេះ អ្នកនាំពាក្យរបស់គណៈកម្មាធិការរៀបចំការបោះឆ្នោត បានបញ្ជាក់ថា បើដើមបណ្ដឹងមិនសុខចិត្ត គ.ជ.ប. ទុករយៈពេលឲ្យ៥ថ្ងៃ ដើម្បីប្តឹងបន្តទៅក្រុមប្រឹក្សារដ្ឋធម្មនុញ្ញ ហើយក្រុមប្រឹក្សារដ្ឋធម្មនុញ្ញ មានរយៈពេល១០ថ្ងៃ ដើម្បីចេញសេចក្តីបិទផ្លូវតវ៉ា។
ចំណែកការសុំឲ្យដកអត្តសញ្ញាណបណ្ណពីជនបរទេសវិញនោះ លោក ហង្ស ពុទ្ធា គូសបង្ហាញថា ដើមបណ្តឹងគួរប្តឹងទៅតុលាការវិញ។
សូមបញ្ជាក់ដែរថា ចាប់តាំងពីការបិទផ្សាយបញ្ជីឈ្មោះបោះឆ្នោតដំបូង នៅថ្ងៃទី៣ រហូតដល់១៤មករា, គណៈកម្មាធិការរៀបចំការបោះឆ្នោត ទទួលបានបណ្តឹង ចំនួន ១ ៤១២ បណ្តឹង គឺជាបណ្តឹងដែលប្តឹងទៅក្រុមប្រឹក្សាឃុំសង្កាត់។ បណ្តឹងទាំងនោះមាន ២ ប្រភេទ គឺទី១ ជាបណ្តឹងតវ៉ា ដែលស្នើសុំឲ្យកែប្រែទិន្នន័យនិងអក្ខរាវិរុទ្ធ មានចំនួន ៦៥១ បណ្តឹង។
ចំណែកទី២ គឺជាបណ្តឹងជំទាស់ ដែលប្តឹងសុំឲ្យលុបឈ្មោះបុគ្គលមួយចំនួនដែលគេសង្ស័យថាជាជន បរទេសនោះ គឺមានចំនួន ៧៦១ បណ្តឹង។
ចំពោះបណ្តឹងដែលប្តឹងឡើងទៅដល់គ.ជ.ប. គឺមាន ៦៤ បណ្តឹង។ បណ្តឹងទាំងនេះ គឺជាប់ទាក់ទងទៅនឹងការសង្ស័យថាជនបរទេសបានចុះឈ្មោះ បោះឆ្នោត គឺ ចំនួន ១ ១៨៩នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ