ហោ ណាំហុង៖ កម្ពុជារកឃើញផែនទីនៅសភាអាមេរិក មុនតំណាងរាស្ត្រសង្គ្រោះជាតិ
រដ្ឋមន្ត្រីការបរទេស បានបញ្ជាក់ប្រាប់អ្នកសារព័ត៌មានថា កម្ពុជាបានរកឃើញផែនទីនៅបណ្ណាល័យរបស់សភាពអាមេរិកមុនលោក អ៊ុំ សំអាន។ ហើយ សុំឲ្យគណបក្សប្រឆាំងឈប់យកបញ្ហាព្រំដែនមកឃោសនារកសម្លេងឆ្នោត។ ការថ្លែងរបស់លោក ហោ ណាំហុង យ៉ាងដូច្នេះ ធ្វើឡើងក្រោយពេលដែលតំណាងរាស្ត្ររបស់គណបក្សសង្គ្រោះជាតិ បានរកឃើញផែនទីចំនួន២៦ផ្ទាំង កាលពីថ្ងៃព្រហស្បតិ៍ ទី២៧ សីហា។
ចុះផ្សាយនៅថ្ងៃ៖
ស្តាប់ - ០១:៤៣
រឿងរ៉ាវផែនទីរបស់កម្ពុជា នៅតែក្លាយជាបញ្ហាក្តៅនៅឡើយសម្រាប់គណបក្សប្រឆាំង និងរដ្ឋាភិបាលកម្ពុជា។ នៅថ្ងៃទី៣០សីហា នេះ លោក ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ បានថ្លែងបញ្ជាក់ ក្រោយពីបញ្ចប់បាថកថាស្តីពី យុវជន និងសហគមន៍អាស៊ាន ២០១៥ នៅវិទ្យាស្ថានបច្ចេកវិទ្យាកម្ពុជាថា ប្រទេសកម្ពុជា បានរកឃើញផែនទី ដែលដាក់នៅបណ្ណាល័យសភាអាមេរិករយៈពេល១០ឆ្នាំមកហើយ។
លោកបញ្ជាក់ថាពេលនេះ កម្ពុជាបានប្រើប្រាស់វារួចរាល់ហើយ ពោលគឺវាមិនមានអ្វីខុសគ្នាទាល់តែសោះរវាងផែនទីដែលកម្ពុជាមានស្រាប់។ ហើយលោកចាត់ទុកសកម្មភាពរបស់គណបក្សប្រឆាំងបច្ចុប្បន្នកំពុងតែយកបញ្ហាផែនទីនេះ ជាការឃោសនា និងដើម្បីវាយប្រហាររដ្ឋាភិបាល។ លោកហោ ណាំហុង សង្ឃឹមថា ប៉ុន្មានខែខាងមុខនេះ គ្រប់គណបក្សនយោបាយនឹងបានភ្លឺភ្នែក នូវអ្វីដែលរដ្ឋាភិបាលបានធ្វើ។
យ៉ាងណាមិញ លោកយឹម សុវណ្ណ អ្នកនាំពាក្យគណបក្សសង្គ្រោះជាតិបានបញ្ជាក់ថាទឹកដីរបស់ប្រទេសកម្ពុជាគឺជាទឹកដីរបស់កូនខ្មែរគ្រប់រូប ហើយកូនខ្មែរគ្រប់មានការឈឺឆ្អាលរឿងទឹកដីរបស់ខ្លួន វាជារឿងធម្មតា។ ហើយលោកបន្តថា បើសិនយើងជាកូនខ្មែរមិនយកចិត្តទុកដាក់នឹងបញ្ហាទឹកដី តើយើងទុកឲ្យអ្នកណាជាអ្នកខ្វាយខ្វល់។
សូមបញ្ជាក់ថាកាលពីថ្ងៃព្រហស្បតិ៍ លោកអ៊ុំ សំអាន បានរកឃើញផែនទីចំនួន ២៦ផ្ទាំង ហើយលោកអះអាងថា ជាផែនទីបោន ដែលមិនមានត្រាប្រទេសវៀតណាមនោះទេ និងត្រូវបានព្រះបរមរតនកោដ្ឋ យកទៅតម្កល់ទុកនៅសហរដ្ឋអាមេរិក តាំងពីឆ្នាំ១៩៦៤ ថែមទៀត។ ហើយក្រោយមក លោកវ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន នៅក្នុងសន្និសីទកាសែត នារសៀលថ្ងៃទី ២៨សីហា បានឆ្លើយតបទៅកាន់លោកអ៊ុំ សំអាន ថា ទង្វើរបស់លោក ជាការញុះញង់ បង្កអស្ថិរភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ