លោក ហ៊ុន សែន ស្វាគមន៍បក្សពីរទៀត ដែលចង់ចូលរួមក្នុង «ឧត្តមក្រុមប្រឹក្សាផ្តល់ និងពិគ្រោះយោបល់»
លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី២៩ ខែសីហានេះ បានប្រកាសស្វាគមន៍គណបក្សនយោបាយពីរផ្សេងទៀត ដែលមានបំណងចង់ចូលរួមក្នុង ឧត្តមក្រុមប្រឹក្សាផ្តល់ និងពិគ្រោះយោបល់ តែត្រូវឆ្លងកាត់ការសម្រេចពីលោក។ ជាឧត្តមក្រុមប្រឹក្សាថ្មីមួយ ដែលរដ្ឋាភិបាលរបស់លោកគ្រោងនឹងបង្កើតជាមួយគណបក្ស១៥ផ្សេងទៀត បូករួមនឹងគណបក្សប្រជាជនកម្ពុជាផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
លោក ហ៊ុន សែន ក្នុងឱកាសសំណេះសំណាលជាមួយកម្មករ កម្មការិនីសរុបប្រមាណ១ម៉ឺន៤ពាន់នាក់ ក្នុងខណ្ឌពោធិ៍សែនជ័យ អះអាងថា បើគណបក្សពីរផ្សេងទៀតចង់ចូលរួម ក្នុងកិច្ចប្រជុំរៀបចំសេចក្តីព្រាងបង្កើតឧត្តមក្រុមប្រឹក្សាផ្តល់ និងពិគ្រោះយោបល់ ជាមួយនឹងគណបក្ស១៦ទៀតនោះ ត្រូវរងចាំការសម្រេចពីលោកជាមុនសិន។ លោកបន្តថា បើសិនគណបក្សពីរនោះ គ្រាន់តែប្រកាសជំហរតាមបណ្តាញព័ត៌មាន និងមិនបានសរសេរសំបុត្រស្នើសុំផង ដូច្នេះគេមិនអាចហៅមកចូលរួមក្នុងកិច្ចប្រជុំទេ ព្រោះកិច្ចប្រជុំនេះ ត្រូវមានការរៀបចំជាមុន។
ទោះបីលោកនាយករដ្ឋមន្ត្រី ហ៊ុន សែន មិនបានប្រកាសពីឈ្មោះគណបក្សទាំងពីរនោះក៏ដោយ ក៏ប៉ុន្តែការប្រកាសរបស់លោកនាយករដ្ឋមន្ត្រីធ្វើឡើងបន្ទាប់ពីប្រព័ន្ធផ្សព្វផ្សាយក្នុងស្រុកបានលើកឡើងពីគណបក្សប្រជាធិបតេយ្យមូលដ្ឋាន និងគណបក្សមាតុភូមិយើង ដែលបានបង្ហាញជំហរគាំទ្រ និងចូលរួមក្នុងឧត្តមក្រុមប្រឹក្សាពិគ្រោះ និងផ្ដល់យោបល់។ ប៉ុន្តែរហូតមកដល់ពេលនេះមិនទាន់មានការបញ្ជាក់ជាផ្លូវការនៅឡើយទេ។
នៅថ្ងៃទី២៩ ខែសីហា វិទ្យុបារាំងអន្តរជាតិមិនអាចសុំការបំភ្លឺបន្ថែមពីគណបក្សប្រជាធិបតេយ្យមូលដ្ឋានបានទេ។ ប៉ុន្តែប្រធានគណបក្សមាតុភូមិយើង លោក ច័ន្ទ ប៊ុនហន អះអាងថាគណបក្សបង្ហាញជំហរចូលរួម ប្រសិនបើមានការស្វាគមន៍។ ចំពោះលក្ខខណ្ឌ ដែលចង់ឲ្យលោក សរសេរលិខិតស្នើទៅរដ្ឋាភិបាល ដើម្បីបានចូលរួមក្នុងឧត្តមក្រុមប្រឹក្សានេះ លោកសុំមិនធ្វើការអធិប្បាយទេ។
កាលពីថ្ងៃទី២១ ខែសីហា កន្លងទៅ លោក ហ៊ុន សែន ក្នុងនាមជានាយករដ្ឋមន្ត្រី បានជួបពិភាក្សាជាមួយតំណាងគណបក្សនយោបាយចំនួន១៦ និងបានប្រកាសផ្តួចផ្តើមបង្កើត «ឧត្តមក្រុមប្រឹក្សាផ្តល់ និងពិគ្រោះយោបល់»។
ឧត្តមក្រុមប្រឹក្សាផ្តល់ និងពិគ្រោះយោបល់ មាននាទីផ្តួចផ្តើមគំនិត ឬផ្តល់មតិ នៅលើការរៀបចំគោលនយោបាយ ដល់រាជរដ្ឋាភិបាល, ចូលរួមផ្តល់យោបល់ដល់សេចក្តីព្រាងច្បាប់, និងធ្វើញត្តិជូនព្រឹទ្ធសភាតតាំង និងច្បាប់ដែលបានអនុម័តដោយរដ្ឋសភា។ ប្រធានគណបក្ស ឬអនុប្រធានគណបក្ស នៅពេលដែលចូលជាសមាជិកនៃឧត្តមក្រុមប្រឹក្សាពិគ្រោះ និងផ្តល់យោបល់ នឹងមានឋានៈស្មើទេសរដ្ឋមន្ត្រី ឬរដ្ឋមន្ត្រី មានប្រាក់ខែ និងក្លាយជាទីប្រឹក្សារដ្ឋាភិបាលថែមទៀត។
សូមជម្រាបជូនថា រហូតមកដល់ពេលនេះ មានតែគណបក្សពីរប៉ុណ្ណោះ បានបង្ហាញជំហរច្បាស់លាស់មិនចូលរួមក្នុង ឧត្តមក្រុមប្រឹក្សាពិគ្រោះ និងផ្តល់យោបល់ ដែលបង្កើតដោយរដ្ឋាភិបាល។ គណបក្សទាំងពីរនោះ គឺគណបក្សសម្ព័ន្ធដើម្បីប្រជាធិបតេយ្យ របស់លោក ខឹម វាសនា និងគណបក្សខ្មែរឈប់ក្រ របស់លោក ក្រវ៉ាញ ដារ៉ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ