លោក ហ៊ុន សែន៖ «សុខចិត្តខាតលើការដឹកជញ្ជូន តែអាចទប់ស្កាត់បានការបិទរោងចក្រ និងធានាដល់ការងារកម្មករ»
រោងចក្រមួយចំនួននៅក្នុងវិស័យឧស្សាហកម្មកាត់ដេរ និងដេរស្បែកជើងនឹងប្រឈម នឹងការផ្អាកដំណើរការនៅពេលឆាប់ៗ ដោយសារខ្វះវត្ថុធាតុដើម។ បញ្ហាខ្វះវត្ថុធាតុដើម ដែលបណ្តាលមកពីការឆ្លងរាលដាលនៃមេរោគផ្លូវដង្ហើម Covid-19នេះ ត្រូវបានឯកអគ្គរដ្ឋទូតចិនប្រចាំនៅកម្ពុជា ក៏ដូចជាលោកនាយករដ្ឋមន្ត្រី ហ៊ុន សែន លើកឡើងនៅថ្ងៃពុធនេះផងដែរ ពីលទ្ធភាពបញ្ជូនវត្ថុធាតុដើមជាសាច់កំណាត់ពីចិនមកកម្ពុជាឲ្យបានឆាប់ ដើម្បីចៀសវាងការរាំងស្ទះសង្វាក់ផលិតកម្មនៃវិស័យនេះ។
ចុះផ្សាយនៅថ្ងៃ៖
ស្តាប់ - ០២:០៣
នៅក្នុងពិធីសម្ពោធដាក់ឲ្យប្រើប្រាស់ផ្លូវជាតិលេខ៥៨ ក្នុងខេត្តបន្ទាយមានជ័យ នៅថ្ងៃនេះលោកនាយករដ្ឋមន្ត្រី ហ៊ុន សែន បានបង្ហាញនូវក្តីសង្ឃឹមថាឯកអគ្គរដ្ឋទូតចិនប្រចាំនៅកម្ពុជា នឹងជួយឲ្យរដ្ឋាភិបាលចិនបញ្ជូនសាច់កំណាត់ ដែលជាវត្ថុធាតុដើមមកកម្ពុជា ខណៈរោងចក្រកាត់ដេរនៅកម្ពុជា ប្រើប្រាស់សាច់កំណាត់មកពីចិនចំនួន៦០ភាគរយ។
តាមលោក ហ៊ុន សែន វិធានការបញ្ជូនវត្ថុធាតុដើមឲ្យបានឆាប់រហ័សពីចិនមកកម្ពុជា នឹងអាចធ្វើទៅបានតាមមធ្យាបាយនាវាក្តី តាមយន្តហោះក្តី ដោយអាចជួលយន្តហោះប្រភេទដឹកទំនិញពីកម្ពុជាទៅដឹកផងដែរ គឺធ្វើយ៉ាងណាដើម្បីសង្គ្រោះដល់ការបិទរោងចក្រនៅកម្ពុជា ដែលជាការបិទមួយប៉ះពាល់ទៅដល់ការងាររបស់កម្មករ កម្មការិនីខ្មែរ។
ការធ្វើបែបនេះ គឺអាចមានការខាតបង់មួយចំនួនទៅលើការដឹកជញ្ជូន ក៏ប៉ុន្តែជំនួសមកវិញដោយការរក្សាបាននូវការងារ និងប្រាក់ចំណូលរបស់កម្មករ និងសង្វាក់ផលិតកម្មរបស់រោងចក្រ ដែលអាចឲ្យរោងចក្របន្តមានប្រាក់ចំណេញ។ នេះបើតាមលោកនាយករដ្ឋមន្ត្រី។
សូមបញ្ជាក់ថាការឆ្លងរាលដាលនៃមេរោគផ្លូវដង្ហើមថ្មី Covid-19 នៅប្រទេសចិន និងពេលនេះបានឆ្លងដល់ប្រទេសជាង៣០នៅលើពិភពលោក បង្ខំចិត្តឲ្យចិនបិទនូវសង្វាក់ផលិតកម្មរបស់ខ្លួន ហើយវត្ថុធាតុដើម៦០%នៃវិស័យកាត់ដេរ និងដេរស្បែកជើង ដែលកម្ពុជាត្រូវនាំមកពីប្រទេសចិន សម្រាប់បំរើឲ្យវិស័យនេះក៏ត្រូវខកខានតគ្នា ជាហេតុធ្វើឲ្យរោងចក្រមួយចំនួនដែលមិនបានទិញវត្ថុធាតុដើមស្តុកទុកកាលពីអំឡុងមុនចូលឆ្នាំចិន ប្រឈមនឹងការបិទទ្វារបណ្តោះអាសន្ន។
ទោះយ៉ាងណា លោកនាយករដ្ឋមន្ត្រី ហ៊ុន សែន បានប្រកាសម្តងហើយម្តងទៀតថា កម្មករ និយោជិត ដែលមិនមានការងារធ្វើអំឡុងពេលរោងចក្ររបស់ពួកគេបិទ នៅពេលខាងមុខនេះ នឹងទទួលបានប្រាក់ឈ្នួល៦០% នៃប្រាក់ឈ្នួលអប្បរមាឆ្នាំថ្មី១៩០ដុល្លារ ក្នុងនោះក្រុមហ៊ុនត្រូវចេញ៤០% និងរដ្ឋាភិបាលចេញ២០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ