លោក សម រង្ស៊ី៖ ករណីភ្នាល់គ្នាជាមួយលោក ហ៊ុន សែន ត្រូវបានចាត់ទុកជាមោឃៈ
លោក សម រង្ស៊ី អតីតប្រធានគណបក្សប្រឆាំង បានចោទប្រកាន់លោកនាយករដ្ឋមន្ត្រី ហ៊ុន សែន ថា បានកែប្រែលក្ខខណ្ឌនៃការភ្នាល់គ្នាលើករណីដោះលែង ឬ មិនដោះលែងលោក កឹម សុខា នៅមុនថ្ងៃទី ០៣ មីនា។ បើតាមទំព័រហ្វេសបុករបស់លោក សម រង្ស៊ី ការកែប្រែលក្ខខណ្ឌជាឯកតោភាគីនេះ ត្រូវបានចាត់ទុកជាមោឃៈ។ ភ្លាមៗនេះ លោកនាយករដ្ឋមន្ត្រី ហ៊ុន សែន បានបង្ហោះបទចម្រៀង «ទទាយំឆ្លង» ឌឺដងឲ្យលោក សម រង្ស៊ី ថា លុយក៏អស់ ឆ្នាំងក៏ប្រេះ តើនឹងរត់ទៅជ្រកឯណា។
ចុះផ្សាយនៅថ្ងៃ៖
តាមរយៈគណនីយហ្វេសបុកផ្លូវការរបស់ខ្លួន កាលពីថ្ងៃទី ២០ កុម្ភៈ លោក សម រង្ស៊ី អតីតប្រធានគណបក្សប្រឆាំងដែលកំពុងនិរទ្ទេសខ្លួននៅក្រៅប្រទេស បានចោទប្រកាន់លោកនាយករដ្ឋមន្ត្រី ហ៊ុន សែន ថា បានដកខ្លួនចេញពីការភ្នាល់គ្នាជាមួយលោក ដោយសារបានកែប្រែលក្ខខណ្ឌនៃការភ្នាល់គ្នា។ លោក សម រង្ស៊ី បានចោទប្រកាន់ប្រមុខរដ្ឋាភិបាលកម្ពុជាថែមទៀតថា បានក្រឡាស់ពាក្យសំដី ហើយកែប្រែលក្ខខណ្ឌនៃការភ្នាល់គ្នានេះ ដោយដាក់បញ្ចូលលក្ខខណ្ឌថ្មីមួយ គឺការលើកលែងទោសពីព្រះមហាក្សត្រ ដែលលក្ខខណ្ឌនេះ មិនមានចែងនៅក្នុងការភ្នាល់គ្នាពីដើមទីនោះឡើយ។ បើតាមលោក សម រង្ស៊ី ការកែប្រែលក្ខខណ្ឌជាឯកតោភាគី ពីសំណាក់ភាគីមួយ ក្នុងការភ្នាល់គ្នាណាមួយនេះ ធ្វើឲ្យការភ្នាល់គ្នានោះ ក្លាយទៅជាមោឃៈ។ ការប្រកាសរបស់លោក សម រង្ស៊ី នេះ បានធ្វើឡើងបន្ទាប់ពីលោកបានបង្ហាញជំហរមិនវិលត្រលប់មកកាន់ប្រទេសកម្ពុជាវិញ នៅក្រោយថ្ងៃទី ០៣ មីនា ដែលជាឱសានវាទចុងក្រោយ នៃការភ្នាល់នេះទេ។
ភ្លាមៗនេះ លោកនាយករដ្ឋមន្ត្រី ហ៊ុន សែន បានបង្ហោះបទចម្រៀង «ទទាយំឆ្លង» បែបទំនងជាបានឌឺដងឲ្យលោក សម រង្ស៊ី ថា រត់លឿនម្ល៉េះ? តាមរយៈទំព័រហ្វេសបុក នៅថ្ងៃទី ២២ កុម្ភៈនេះ លោកនាយករដ្ឋមន្ត្រី ហ៊ុន សែន បានឌឺដងលោក សម រង្ស៊ី ថា លុយក៏អស់ ឆ្នាំងក៏ប្រេះ តើនឹងរត់ទៅជ្រកឯណា។ ចំណែកលោក សុខ ឥសាន អ្នកនាំពាក្យគណបក្សប្រជាជនកម្ពុជា បានចាត់ទុកការប្រកាសរបស់លោក សម រង្ស៊ី ថា ការប្រកាសឯកត្តោភាគីរបស់លោក សម រង្ស៊ី ទៅវិញទេ។ បើតាមលោក សុខ ឥសាន ការប្រែក្រឡាស់សំដីរបស់លោក សម រង្ស៊ី បែបនេះ គឺជាការគេចវេសពីការទទួលខុសត្រូវក្នុងការចាញ់ភ្នាល់ជាមួយលោកនាយករដ្ឋមន្ត្រី ហ៊ុន សែន ដោយសារខ្លាចជាប់ពន្ធនាគារ។
សូមរំលឹកជូនថា កាលពីថ្ងៃទី ០៩ វិច្ឆិកា ឆ្នាំ ២០១៨កន្លងទៅ លោក សម រង្ស៊ី បានផ្តើមការភ្នាល់ជាមួយលោកនាយករដ្ឋមន្ត្រី ហ៊ុន សែន ដោយលោកបានដាក់លក្ខខណ្ឌថា បើលោក កឹម សុខា មិនត្រូវបានលោក ហ៊ុន សែន ដោះលែង ត្រឹមថ្ងៃទី ០៣ មីនា ទេ លោកនឹងចូលឲ្យចាប់ខ្លួន។ ប៉ុន្តែបើលោក កឹម សុខា ត្រូវបានដោះលែងវិញនោះ លោក ហ៊ុន សែន ត្រូវចុះចេញពីតំណែង។
លោក ព្រាប កុល នាយកប្រតិបត្តិអង្គការតម្លាភាពកម្ពុជា បានសរសេរនៅលើទំព័រហ្វេសបុករបស់លោកថា ល្បែងភ្នាល់នយោបាយខ្នាតធំនេះ ត្រូវបានគេដឹងលទ្ធផលជាមុន តាំងពីថ្ងៃចាប់ផ្តើមភ្នាល់នោះមកម្ល៉េះថា លោក សម រង្សី នឹងចាញ់នៅក្នុងការភ្នាល់នេះ។ ប៉ុន្តែបើតាមលោក ព្រាប កុល អ្វីដែលគេប្រហែលមិនបានគិតដល់នោះ គឺ សម រង្សី បានលើកឡើងពីការភ្នាល់គ្នានេះ គឺដើម្បីបានឈ្នះក្នុងការតស៊ូមតិលើឆាកអន្តរជាតិតែប៉ុណ្ណោះ ពិសេសទាក់ទងទៅនឹងដំណើរការត្រួតពិនិត្យ EBA របស់សហភាពអឺរ៉ុបជាដើម។ បើតាមលោក ព្រាប កុល គេអាចដឹងថា លោក សម រង្សី នឹងមិនធ្វើតាមសន្យាក្នុងការភ្នាល់នេះទេ ខណៈដែលក្រុមមេធាវី និងក្រុមអ្នកគាំទ្រលោក កឹម សុខា បានថ្កោលទោសចំពោះការយកសេរីភាពរបស់លោក កឹម សុខា មកធ្វើជាកម្មវត្ថុនៃការភ្នាល់គ្នានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ