បុរសខ្លាំងទាំងពីរ លោក ហ៊ុន សែន និងលោក សម រង្ស៊ី ឆ្លើយឆ្លងគ្នាដូចអាយ៉ៃ!
នៅថ្ងៃនេះ លោកនាយករដ្ឋមន្ត្រី ចេញមុខប្រតិកម្មឆ្លើយតបនឹងសម្តីក្លាហានរបស់លោក សម រង្ស៊ី ពាក់ព័ន្ធរឿងវិលចូលស្រុកវិញ បើគ្មានបំរាម។ លោក ហ៊ុន សែន រម្លឹកឡើងវិញ លោកគឺជាអ្នកចេញបញ្ជាឲ្យលុបបំរាមនោះ ហើយទីបំផុត លោក សម រង្ស៊ី នៅតែប្តូរចិត្ត។ សម្រេចសម្រួចទៅ អតីតប្រមុខបក្សប្រឆាំងដែលកំពុងនិរទេស តបទៅវិញ ថា លោកនឹងមកស្រុកខ្មែរបើគ្មានឧបសគ្គរារាំងទាំងឡាយ។
ចុះផ្សាយនៅថ្ងៃ៖ កែប្រែថ្ងៃទី៖
៣ថ្ងៃជាប់ៗមកនេះ សារឆ្លើយឆ្លងឌឺដងដាក់គ្នារវាងលោក ហ៊ុន សែន និងលោក សម រង្ស៊ី មានជាប់គ្នាយ៉ាងរដឹក។ ក្នុងឱកាសចែកសញ្ញាបត្រដល់និស្សិត នៅថ្ងៃព្រហស្ប៍ទី១៥មិថុនា លោកនាយករដ្ឋមន្ត្រី បញ្ជាក់ថា លោកបានបញ្ជាឲ្យរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី លុបចោលបំរាមចំពោះលោក សម រង្ស៊ី ហើយដើម្បីបើកផ្លូវឲ្យអ្នកក្លាហានរូបនេះ អាចហ៊ានចូលស្រុកវិញ។ ការដាក់បំរាមកាលពីលើកមុននោះ ត្រូវលោក ហ៊ុន សែន ពន្យល់ថា ក៏ដើម្បីការពារសុវត្ថិភាព និងអាយុជីវិតរបស់លោក សម រង្ស៊ី ដែរ។
ការឆ្លើយតបដូច្នេះ គឺបន្ទាប់ពីប្រមុខរដ្ឋរដ្ឋាភិបាល បានស្តាប់បទសម្ភាសរបស់លោក សម រង្ស៊ី ជាមួយវិទ្យុអន្តរជាតិមួយ នារាត្រីថ្ងៃទី១៣មិថុនា។ លោក សម រង្ស៊ី បានអះអាងថា លោកនឹងវិលត្រលប់មកកាន់កម្ពុជាវិញភ្លាម បើរដ្ឋាភិបាលកម្ពុជាដកបំរាម រារាំងមិនឲ្យយន្តហោះដឹកអ្នកដំណើរដឹករូបលោកមកកាន់ប្រទេសកម្ពុជានោះ។
ចំពោះលោក សម រង្ស៊ី វិញ កាលពីថ្ងៃទី១៤ខែមិថុនា បន្ទាប់ពីបានឃើញបទបញ្ជាលុបបំរាមនោះហើយ លោកបានសរសេរ Email ប្រាប់អ្នកកាសែតទាំងឡាយ ដោយក្រឡាស់ពាក្យសម្តីថា លោកនឹងវិលត្រឡប់មកកម្ពុជាវិញភ្លាម នៅពេលអស់មានឧបសគ្គរាំងខ្ទប់ដល់សុវត្ថិភាព និងសេរីភាពរបស់លោកក្នុងការធ្វើដំណើរចូលស្រុកខ្មែរវិញ។
ចំពោះលោក ហ៊ុន សែន, ឧបសគ្គរារាំងសម្រាប់អតីតប្រធានបក្សប្រឆាំង គឺមានតែគុក ព្រោះសេចក្តីសម្រេចចាប់ចងពីសំណាក់ប្រព័ន្ធតុលាការ នៅមិនទាន់លើកលែងនៅឡើយទេ។ លោកនាយករដ្ឋមន្ត្រី លើកឡើងជាថ្មីទៀតថា លោកក៏នឹងមិនសរសេរសារសុំការលើកលែងទោសចំពោះលោក សម រង្ស៊ី ទៅថ្វាយព្រះមហាក្សត្រទៀតនោះឡើយ ព្រោះលោកធ្លាប់បានទូលសុំទ្រង់ពីរដងរួចមកហើយ។
ជាការឆ្លើយតបទៅវិញ អតីតប្រធានគណបក្សសង្រ្គោះជាតិ ដែលរុំព័ទ្ធដោយបណ្តឹងនៅតុលាការខ្មែរនោះ នៅព្រឹកថ្ងៃព្រហស្បតិ៍ទី១៥មិថុនា តាមរយៈទំព័រហ៊្វសប៊ុករបស់ខ្លួន បានប្រកាសថា មុននឹងវិលត្រឡប់មកកម្ពុជាវិញ លោកត្រូវការឲ្យលោកហ៊ុន សែន បញ្ជាក់ថាលោកនាយករដ្ឋមន្ត្រីយល់ព្រមបោះបង់គម្រោងរបស់ខ្លួន ដែលចង់ «កម្ចាត់មនុស្សពី១០០ ទៅ២០០នាក់» ដើម្បីរក្សាអំណាច។
លោក សម រង្ស៊ី, ថាគម្រោងរបស់លោក ហ៊ុន សែន នេះត្រូវបានប្រកាសជាសាធារណៈនាថ្មីៗ ហើយលោក សម រង្ស៊ី ក៏ដឹងដែរថា តាំងតែពីឆ្នាំ ១៩៩៧ លោកជាមនុស្សទី១ នៅលើបញ្ជីខ្មៅរបស់លោកហ៊ុន សែន។ ហើយប្រមុខរដ្ឋាភិបាល បានរក្សាផ្នត់គំនិត និងទម្លាប់ខ្មែរក្រហម តាំងតែពីធ្វើជាមេទ័ពខ្មែរក្រហមកាលពីសម័យ ប៉ុល ពត។ នេះបើតាមលោកសមរង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ