លោកនាយករដ្ឋមន្ត្រីព្រមានប្រើប្រាស់ច្បាប់បោះឆ្នោតចាស់
លោកនាយករដ្ឋមន្ត្រី ហ៊ុនសែន ក្នុងពិធីបិទសន្និបាតបូកសរុបការងារនៅក្រសួងមហាផ្ទៃនារសៀលថ្ងៃទី២៥ ខែកុម្ភៈនេះបានផ្ញើសារដោយសម្តីខ្លាំងៗ ទៅកាន់គណបក្សសង្គ្រោះជាតិពាក់ព័ន្ធនឹងការកែច្បាប់បោះឆ្នោត។ អនុប្រធានគណបក្សកាន់អំណាចរូបនេះ ក៏បានប្រកាស បើកិច្ចការចរចារវាងបក្សទាំងពីរនៅតែបន្តស្មុគស្មាញនោះគឺគួរតែប្រើប្រាស់ច្បាប់បោះឆ្នោតចាស់តែម្តងទៅ។
ចុះផ្សាយនៅថ្ងៃ៖
ស្តាប់ - ០២:៤៨
បើគណបក្សមិនព្រមទេ គឺយើងប្រើអាច្បាប់ចាស់ដដែល។ កុំស៊ាំញ៉ាំពេក ព្រោះការទាមទារខ្លះ មិនសមហេតុផល និង ទទួលយកមិនកើត។ នេះគឺជាប្រសាសន៍របស់លោកនាយករដ្ឋមន្ត្រីហ៊ុន សែន ដែលបានថ្លែងព្រមានទៅកាន់គណបក្សសង្គ្រោះជាតិស្តីពីការចរចាច្បាប់តំណាងរាស្ត្រ។ច្បាប់តំណាងរាស្ត្រដែលក្រុមការងារគណបក្សទាំងពីរកំពុងតែបន្តពិភាក្សា ប៉ុន្តែបានបង្កើតឱ្យមានចំណុចខ្វែងគំនិតគ្នារហូតដល់១០ចំណុចដែលគ្រោងនឹងបញ្ជូនមកថ្នាក់កំពូលគណបក្សសម្រេចនោះ។
ថ្លែងដោយសម្តីខ្លាំងៗ លោកនាយករដ្ឋមន្ត្រីហ៊ុន សែន បានសង្កត់ធ្ងន់ថា៖ “បើការចរចានៅតែមិនត្រូវរូវគ្នា ត្រូវបញ្ជូនមតិទាំងពីរនោះ ឲ្យរដ្ឋសភា បោះឆ្នោតសម្រេច ហើយបានបញ្ជាក់ឱ្យគណបក្សសង្គ្រោះជាតិកុំឲ្យស៊ាំញ៉ាំលើកិច្ចចរចានោះ។ ត្រង់ចំណុខ្វែងគំនិតគ្នានោះ លោកនាយករដ្ឋមន្ត្រីក៏បានស្នើឲ្យលោកប៊ិនឈិន ប្រធានក្រុមការងារចរចាគណបក្សរបស់លោក ត្រូវពិភាក្សាបន្ថែមទៀត ជាមួយនឹងលោក គួយ ប៊ុនរឿន ប្រធានក្រុមការងារចរចាគណបក្សសង្គ្រោះជាតិ លើចំណុចដែលឯកភាពទាំង ១០ ចំណុចនោះបន្ថែមទៀត។ ក្នុងកិច្ចការចរចានោះលោកនាយករដ្ឋមន្ត្រីប្រកាសមិនឱ្យបញ្ជូនចំណុចខ្វែងគំនិតគ្នាមកកាន់លោកឡើយ គឺបញ្ជូនទៅលោកឧបនាយករដ្ឋមន្ត្រី ស ខេង ជាអ្នកទទួលដោះស្រាយជំនួស។
ក្នុងដំណើរការចរចារវាងគណបក្សទាំងពីរស្តីពីវិសោធនកម្មលើច្បាប់តំណាងរាស្ត្រនេះ គណបក្សទាំងពីរកាលពីថ្ងៃទី២៣ដើមសប្តាហ៍នេះ នៅខ្វែងគំនិតគ្នាចំនួន១០ចំណុចដែលស្មើនឹង១០មាត្រា។ នោះគឺ ការបន្ថែមអាសនៈរដ្ឋសភា សកម្មភាព រយៈពេល និងទីតាំង នៃការឃោសនាបោះឆ្នោត ការចែងពីអព្យាក្រិតឥតលំអៀងរបស់អង្គការសង្គមស៊ិវិល និងការចូលរួមរបស់មន្ត្រីកងកម្លាំងប្រដាប់អាវុធ និងមន្ត្រីតុលាកាក្នុងសកម្មភាពឃោសនាជាដើម។
សូមបញ្ជាក់ថា គណបក្សប្រជាជនកម្ពុជា និងគណបក្សសង្គ្រោះជាតិ នឹងត្រូវពិភាក្សាចំនួន៣ចំណុចបន្ថែមនៅថ្ងៃសុក្រចុងសប្តាហ៍នេះ គឺ ទោសបញ្ញតិ្ត អន្តរបញ្ញតិ្ត និងអវសានបញ្ញតិ្ត។ ត្រង់ចំណុចនេះ លោកនាយករដ្ឋមន្ត្រី បានប្រកាសឲ្យបន្ថែមទោសមិនត្រឹមតែផាកពិន័យជាលុយកាក់ទេ តែត្រូវកំណត់លុបឈ្មោះបេក្ខជននោះ ឬក៏លុបឈ្មោះគណបក្សចេញពីបញ្ជីបោះឆ្នោត។ ទោសពិន័យនោះ រាប់ទាំងការជេរប្រមាថ រិះគន់ លាបពណ៌ ដោយប្រើពាក្យថា អាយ៉ងយួន ក្បត់ជាតិ ផងដែរ។
ជាការឆ្លើយតប លោក អេង ឆៃអ៊ាង ថ្នាក់ដឹកនាំជាន់ខ្ពស់គណបក្សសង្គ្រោះជាតិ បានស្នើឱ្យគ្រប់គណបក្សប្រជាជនកម្ពុជាត្រូវតំកល់ផលប្រយោជន៍ពលជាតិជាធំ ព្រោះថា ការបង្កើតគ.ជ.បឱ្យត្រឹមត្រូវឯករាជ្យ នោះគឺជាឆន្ទៈនយោបាយរបស់បក្សទាំងពីរក្នុងកិច្ចព្រមព្រៀងបិទបញ្ចប់ជម្លោះនយោបាយកាលពីថ្ងៃទី២២កក្កដា។
សូមបញ្ជាក់ថា ភ្លាមៗក្រោយការប្រកាសព្រមានរបស់លោកនាយករដ្ឋមន្ត្រីទៅលើគណបក្សសង្គ្រោះជាតិស្តីពីគណៈកម្មាធិការជាតិរៀបចំការបោះឆ្នោតនោះ លោក សម រង្ស៊ី និងលោក ស ខេងនឹងជួបប្រជុំគ្នានៅថ្ងៃសៅរ៍ទី២៨ ចុងខែកម្ភៈខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ