លោកយឹម សុវណ្ណ៖ ក្រសួងមហាផ្ទៃបានទទួលស្គាល់លក្ខន្តិកៈ របស់គណបក្សប្រឆាំង
នៅថ្ងៃទី១ ខែមេសានេះ គណបក្សប្រឆាំងបានឲ្យដឹងថាក្រសួងមហាផ្ទៃបានប្រថាប់ត្រាទទួលស្គាល់លើលក្ខន្តិកៈរបស់គណបក្សប្រឆាំង ដែលបានធ្វើវិសោធនកម្មលើប្រការ៤៥ និងប្រការ៤៧ ហើយ។ ការប្រថាប់ត្រានេះធ្វើឡើងក្រោយពីមានភាពចម្រូងចម្រាសរវាងគណបក្សប្រឆាំង និងក្រសួងមហាផ្ទៃជុំវិញការជ្រើសរើសក្បាលម៉ាស៊ីនថ្មីផ្ទុយពីលក្ខន្តិកៈរបស់គណបក្ស ដែលតម្កល់នៅក្រសួងមហាផ្ទៃ។
ចុះផ្សាយនៅថ្ងៃ៖
ស្តាប់ - ០២:០៣
លោកយឹម សុវណ្ណ ប្រធានគណៈកម្មាធិការប្រតិបត្តិនៃគណបក្សសង្រ្គោះជាតិ បានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី១ ខែមេសានេះថា លក្ខន្តិកៈរបស់គណបក្សសង្រ្គោះជាតិ ដែលបានធ្វើវិសោធនកម្មដោយសមាជវិសាមញ្ញកាលពីថ្ងៃទី២ ខែមីនា ត្រូវបានលោកស ខេង រដ្ឋមន្ត្រីក្រសួងមហាផ្ទៃបានប្រថាប់ត្រា ទទួលស្គាល់ហើយ។
ឆ្លើយនឹងសំនួរថា តើគណបក្សប្រឆាំងនឹងរៀបចំធ្វើអ្វីបន្តទៀត ក្រោយពីការប្រថាប់ត្រាទទួលស្គាល់លក្ខន្តិកៈនេះ? លោកយឹម សុវណ្ណបញ្ជាក់ថា «បើទទួលស្គាល់ហើយគឺចប់ហើយ គ្មានអ្វីត្រូវធ្វើទៀតទេ!» ហើយចំពោះការផ្លាស់ប្តូរក្បាលម៉ាស៊ីន ឬយ៉ាងណានោះ លោកយឹម សុវណ្ណបញ្ជាក់ថាចាំមើលថ្ងៃចន្ទសប្តាហ៍ក្រោយបន្តទៀត ដោយសារតែពេលនេះគណបក្សមិនទាន់បានគិតសម្រេចនៅឡើយទេ។
នៅថ្ងៃទី១ ខែមេសានេះ វិទ្យុបារាំងមិនអាចសុំការបញ្ជាក់បន្ថែមណាមួយពីក្រសួងមហាផ្ទៃបានទេ ជុំវិញការប្រថាប់ត្រាលើលក្ខន្តិកៈរបស់គណបក្សប្រឆាំងដ៏ចម្រូងចម្រាសនេះ។
ការប្រថាប់ត្រានេះធ្វើឡើង បន្ទាប់ពីលោកយឹម សុវណ្ណ កាលពីថ្ងៃទី៣០ ខែមីនា បានផ្ញើជូនលោកស ខេង រដ្ឋមន្ត្រីក្រសួងមហាផ្ទៃនូវលក្ខន្តិកៈរបស់គណបក្ស។ ភ្លាមៗក្រោយពីការទទួលបាននូវលក្ខន្តិកៈរបស់គណបក្សសង្រ្គោះជាតិ លោកស ខេង នៅថ្ងៃទី៣១ ខែមីនា ក៏បានតបតាមរយៈលិខិតមួយច្បាប់មកលោកយឹម សុវណ្ណ ដោយបញ្ជាក់ថាលោកបានទទួលនូវលក្ខន្តិកៈរបស់គណបក្សប្រឆាំងហើយ។ លោកស ខេង តាមរយៈលិខិតដដែលនោះ ក៏បានស្នើឲ្យគណបក្សសង្រ្គោះជាតិអនុវត្តឲ្យបានត្រឹមត្រូវតាម ស្មារតីនៃលិខិតលេខ៤៨០ សជណ ចុះថ្ងៃទី២២ ខែមីនាផងដែរ។
លិខិតដែលចុះថ្ងៃទី២២ ខែមីនានោះ បានឲ្យដឹងថា ក្រសួងមហាផ្ទៃស្នើឲ្យគណបក្សប្រឆាំង ដកចេញនូវចំណងជើង “ដូរមេឃុំបម្រើបក្ស ដាក់មេឃុំបម្រើរាស្ត្រ” ដែលមានចែងនៅក្នុងគោលនយោបាយអាទិភាព៥ចំណុចរបស់គណបក្សសម្រាប់យុទ្ធនាការបោះឆ្នោតក្រុមប្រឹក្សាឃុំសង្កាត់អាណត្តិទី៤ ឆ្នាំ២០១៧។ ក្រសួងមហាផ្ទៃចាត់ទុកថាចំណងជើងនេះមានខ្លឹមសារផ្ទុយនឹងរដ្ឋធម្មនុញ្ញឆ្នាំ១៩៩៣ ច្បាប់ស្តីពីគណបក្សនយោបាយ រួមទាំងច្បាប់មួយចំនួនទៀត។
ជុំវិញបញ្ហាពាក្យស្លោកនេះលោកយឹម សុវណ្ណ ប្រធានគណៈកម្មាធិការប្រតិបត្តិនៃគណបក្សសង្រ្គោះជាតិ ក៏បានបញ្ជាក់ថាពាក្យស្លោកនេះគណបក្សមិនបានដាក់ទៅក្រសួងមហាផ្ទៃ ទេ ហើយគណបក្សក៏មិនបានណែនាំឲ្យសកម្មជនរបស់ខ្លួនឲ្យនិយាយពាក្យនេះ ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ