លោកកឹម សុខាប្រាប់ឲ្យមេឃុំ ចៅសង្កាត់ ជាប់ឆ្នោតថ្មីរបស់បក្សប្រឆាំងមានការប្រុងប្រយ័ត្ន
ប្រធានគណបក្សប្រឆាំងលោកកឹម សុខា បានថ្លែងប្រាប់មេឃុំ ចៅសង្កាត់ ដែលទើបជាប់ឆ្នោតថ្មីរបស់គណបក្សនេះថាត្រូវមានការប្រុងប្រយ័ត្នចំពោះល្បិចកលរបស់គូប្រកួត ខណៈដែលការប្រកាសជាផ្លូវការមិនទាន់បានធ្វើឡើងនៅឡើយ។ ការអំពាវនាវនេះធ្វើឡើង ក្រោយពីអ្នកគាំទ្រគណបក្សប្រឆាំងម្នាក់ត្រូវបានចាប់ខ្លួនពាក់ព័ន្ធនឹងការចុះហត្ថលេខាជំនួស។
ចុះផ្សាយនៅថ្ងៃ៖
ស្តាប់ - ០២:០៨
ក្នុងពិធីជួបសំណេះសំណាលជាមួយមេឃុំ ចៅសង្កាត់ ក្រុមប្រឹក្សាជាប់ឆ្នោតថ្មី និងសកម្មជន នៅស្រុកប្រាសាទបាគង ខេត្តសៀមរាម នៅថ្ងៃទី១៣ មិថុនា លោកកឹម សុខាអំពាវនាវឲ្យមានការប្រុងប្រយ័ត្នរាល់ថ្ងៃ រាល់នាទី ព្រោះគូប្រកួតម្ខាងទៀតគេមិនបោះបង់ចោលល្បិចកលនោះទេ។
លោកកឹម សុខា បានលើកយកករណីនៅខេត្តបាត់ដំបងមកបញ្ជាក់ប្រាប់អ្នកគាំទ្រ និងឲ្យសមាជិកក្រុមប្រឹក្សាឃុំសង្កាត់ទាំងអស់ និងអ្នកចូលរួមក្នុងវេទិកានោះ យកករណីនេះជាមេរៀន ក្នុងពេល ដែលមិនទាន់មានការប្រកាសទទួលស្គាល់សមាជិកក្រុមប្រឹក្សាឃុំសង្កាត់ជាផ្លូវការ និងក្រោយការប្រកាសជាផ្លូវការ។
គួរបញ្ជាក់ថាអ្នកគាំទ្រគណបក្សសង្រ្គោះជាតិម្នាក់ក្នុងស្រុកសង្កែ ខេត្តបាត់ដំបងត្រូវឃាត់ខ្លួនបញ្ជូនទៅតុលាការកាលពីថ្ងៃទី១២ មិថុនា ជុំវិញករណីចុះហត្ថលេខាលើឯកសារជំនួសមេភូមិ។
ក្រៅពីប្រាប់ឲ្យសមាជិកក្រុមប្រឹក្សាឃុំសង្កាត់ទាំងអស់មានការប្រុងប្រយ័ត្នចំពោះសកម្មភាពនានា ប្រធានគណបក្សប្រឆាំងរូបនេះក៏បានណែនាំឲ្យមេឃុំ ចៅសង្កាត់របស់គណបក្សប្រឆាំង ក្រោយពីបានចូលកាន់ដំណែង ត្រូវបោះដៃសុំការសហការជាមួយសមាជិកក្រុមប្រឹក្សាឃុំសង្កាត់មកពីគណបក្សផ្សេងទៀត។
លោកសុខ ឥសានអ្នកនាំពាក្យគណបក្សប្រជាជនកម្ពុជាបានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី១៣ មិថុនា ថា បើមេឃុំ ចៅសង្កាត់របស់គណបក្សប្រឆាំងថ្មីចង់សុំការសហការពីមេឃុំចាស់ ដែលចាញ់ឆ្នោតគឺមិនងាយនោះទេ ព្រោះបារម្ភខា្លចមានការចោទប្រកាន់ថាលូកដៃចូលកិច្ចការផ្ទៃក្នុងរបស់មេឃុំថ្មី។ ប៉ុន្តែលោកសុខ ឥសានបញ្ជាក់ថា មេឃុំថ្មីរបស់គណបក្សប្រឆាំងអាចសួរនាំសុំយោបល់ និងបទពិសោធន៍ពីមេឃុំចាស់របស់គណបក្សកាន់អំណាចបាន។
សូមជម្រាបជូនថា ក្រោយការបោះឆ្នោតជ្រើសរើសក្រុមប្រឹក្សាឃុំសង្កាត់ កាលពីថ្ងៃទី៤ ខែមិថុនា គណបក្សនយោបាយពីរ គឺគណបក្សប្រជាជនកម្ពុជា និងគណបក្សសង្រ្គោះជាតិបានប្រកាសពីជ័យជំនះរៀងខ្លួន ខណៈ គ.ជ.ប កំពុងដោះស្រាយបណ្តឹង ហើយគ្រោងនឹងប្រកាសលទ្ធផលផ្លូវការនៅថ្ងៃទី២៥ខែមិថុនា។ បើផ្អែកតាមលទ្ធផលក្រៅផ្លូវការដែលប្រកាសដោយបក្សទាំងពីរ គឺគណបក្សប្រជាជនកម្ពុជាបានឈ្នះអាសនៈមេឃុំ-ចៅសង្កាត់ចន្លោះពី ១,១៦០ទៅ១,១៦៣ឃុំសង្កាត់ ខណៈដែលគណបក្សសង្រ្គោះជាតិឈ្នះបានអាសនៈចំនួនជិត៥០០ឃុំសង្កាត់នៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ