លោក កឹម សុខា នឹងទៅចុះឈ្មោះបោះឆ្នោតនៅថ្ងៃស្អែក តែមិនទាន់បញ្ជាក់ពីទីកន្លែង
លោក កឹម សុខា ប្រធានស្តីទីគណបក្សសង្រ្គោះជាតិ នឹងចេញទៅចុះឈ្មោះបោះឆ្នោតនៅវេលាម៉ោង ១០ព្រឹកថ្ងៃទី ០៥ ខែតុលាស្អែកនេះ ដោយមិនមានការព្រួយបារម្ភពីការចាប់ខ្លួននោះទេ។ មានការិយាល័យចុះឈ្មោះចំនួន ២ ដែលប្រធានស្តីទីគណបក្សប្រឆាំងរូបនេះ អាចនឹងទៅចុះឈ្មោះ តែសេចក្តីប្រកាសគណបក្សសង្រ្គោះជាតិនៅល្ងាចថ្ងៃនេះ មិនទាន់បញ្ជាក់ច្បាស់នៅឡើយ។ យ៉ាងណាក្តី នេះគឺជាលើកទី១ហើយ ដែលប្រធានស្តីទីគណបក្សប្រឆាំងរូបនេះបានបង្ហាញមុខជាសាធារណៈ បន្ទាប់ពីការសំងំលាក់ខ្លួននៅក្នុងទីស្នាក់ការគណបក្សជាង ៤ខែមក។
ចុះផ្សាយនៅថ្ងៃ៖
ស្តាប់ - ០២:២៨
បើគ្មានការប្រែប្រួលទេ ប្រធានស្តីទីគណបក្សសង្រ្គោះជាតិលោក កឹម សុខា ដែលកំពុងរុំព័ទ្ធទៅដោយបណ្តឹងនៅក្នុងដៃតុលាការ នឹងបង្ហាញមុខជាសាធារណៈជាលើកដំបូង នៅពេលដែលលោកបានសម្រេចចិត្តចេញទៅចុះឈ្មោះបោះឆ្នោត នៅវេលាម៉ោង ១០ព្រឹក នៅថ្ងៃទី ៥តុលាស្អែកនេះ។ នេះបើយោងតាមសេចក្តីប្រកាសព័ត៌មានរបស់គណបក្សសង្រ្គោះជាតិនៅល្ងាចថ្ងៃទី ៤តុលា។
ប៉ុន្តែសេចក្តីប្រកាសនេះ មិនទាន់បញ្ជាក់ឲ្យច្បាស់នៅឡើយទេថា តើលោក កឹម សុខា នឹងទៅចុះឈ្មោះបោះឆ្នោតនៅការិយាល័យណាមួយនៅឡើយទេ ក្នុងចំណោមអាស័យដ្ឋានចំនួនពីរ គឺគេហដ្ឋានរបស់លោក ដែលស្ថិតនៅសង្កាត់បឹងកក់២ ខណ្ឌទួលគោក និងកន្លែងធ្វើការរបស់លោក គឺទីស្នាក់ការកណ្តាលគណបក្សសង្រ្គោះជាតិ ដែលស្ថិតនៅសង្កាត់ចាក់អង្រែលើក្រុងភ្នំពេញ ហើយក៏ជាទីកន្លែង ដែលលោកកំពុងសំងំលាក់ខ្លួនអស់រយៈពេលជាង ៤ខែមកនេះ។
ឆ្លើយតបនឹងការព្រួយបារម្ភនានាពីលទ្ធភាពនៃការចាប់ខ្លួនលោក កឹម សុខា នៅពេលលោកដើរចេញពីទីស្នាក់ការគណបក្សនៅថ្ងៃស្អែកនេះ លោក អេង ឆៃអ៊ាង មន្រ្តីជាន់ខ្ពស់គណបក្សសង្រ្គោះជាតិបានបញ្ជាក់ថា គណបក្សមិនមានការព្រួយបារម្ភនោះទេ ព្រោះថា ការចេញទៅចុះឈ្មោះបោះឆ្នោតរបស់លោក កឹម សុខា នៅថ្ងៃស្អែកនេះ គឺជាការអនុវត្តនូវកាតព្វកិច្ចជាពលរដ្ឋខ្មែរតែប៉ុណ្ណោះ។ ចំណែកលោក ហែម សុជាតិ មេធាវីការពារក្តីរបស់លោក កឹម សុខា ក៏បានបញ្ជាក់ដែរថា តាមនីតិវិធីច្បាប់អាជ្ញាធរនៅមិនទាន់អាចចាប់ខ្លួនលោក កឹម សុខា បានទេនៅពេលនេះ។
គួរជម្រាបជូនថា លោក កឹម សុខា បច្ចុប្បន្នដែលនៅមានអភ័យឯកសិទ្ធិសភានៅឡើយ ត្រូវបានតុលាការក្រុងភ្នំពេញកាត់ទោសឲ្យជាប់ពន្ធនាគាររយៈពេល ៥ខែ និងពិន័យជាប្រាក់ ៨០ម៉ឺនរៀល ពីបទ “បដិសេធក្នុងការចូលខ្លួន”។ ក្រៅពីនេះ លោក កឹម សុខា ក៏នៅជាប់ក្នុងបណ្តឹងសញ្ចារកម្មរបស់កញ្ញា ខុម ចាន់តារ៉ាទី ហៅស្រីមុំ ដែលជាករណីមួយបានទាញភ្ជាប់សកម្មជនសិទ្ធិមនុស្សអាដហុក ៤រូប តំណាងរាស្រ្តគណបក្សប្រឆាំង ២រូប និងមន្រ្តី គ.ជ.ប ម្នាក់ផង។
បើលោក កឹម សុខា ចេញទៅចុះឈ្មោះបោះឆ្នោតនៅថ្ងៃស្អែកមែន គឺជាការបង្ហាញមុខជាសាធារណៈលើកដំបូងហើយ បន្ទាប់ពីលោកបានសំងំលាក់ខ្លួននៅក្នុងទីស្នាក់ការគណបក្សអស់រយៈពេលជាង ៤ខែ បន្ទាប់ពីមានការប៉ុនប៉ងចាប់ខ្លួនរូបលោក កាលពីខែឧសភាមក។
បើតាមការបញ្ជាក់ពីលោក អេង ឆៃអ៊ាង ក្រៅពីករណីរបស់លោក កឹម សុខា ដែលជារបៀបវារៈសំខាន់នៃកិច្ចប្រជុំអភិបាលក្រុមអ្នកតំណាងរាស្រ្តគណបក្សសង្រ្គោះជាតិនៅរសៀលថ្ងៃទី ៤តុលានេះ គណបក្សក៏នៅមិនទាន់សម្រេចចិត្តនៅឡើយទេថា តើគណបក្សនឹងចូលរួមប្រជុំសភាពេញអង្គ ដែលគ្រោងនឹងធ្វើឡើងនៅថ្ងៃទី ៧ ខែតុលាខាងមុខនេះវិញនៅឡើយទេ។ បើតាមលោកអេង ឆៃអ៊ាង របៀបវារៈសំខាន់ទាំងពីរនេះ នឹងប្រជុំសម្រេចនៅព្រឹកស្អែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ