ខៀវ សុភ័គ៖ ការប្រើច្រាស់ដែកលើនគរបាលជាតិគឺជារឿងធ្ងន់ធ្ងរ
កាលពីថ្ងៃទី ១០ ខែធ្នូ ម្សិលមិញនេះ ក្រសួងមហាផ្ទៃបានចេញសេចក្តីប្រកាសព័ត៌មាន ឆ្លើយតបទៅនឹងការលើកឡើងរបស់អង្គភាពប្រឆាំងអំពើពុករលួយ ដែលថានឹងប្រើច្រាស់ដែកដើម្បីដុសសំអាតអំពើពុករលួយនគរបាលអត្តសញ្ញាណប័ណ្ណនិងនគរបាលចរាចរណ៍។អត្តបទដោយ៖ ឃុត សុខឿន
ចុះផ្សាយនៅថ្ងៃ៖
ស្តាប់ - ០១:២៣
នៅក្នុងសេចក្តីប្រកាសព័ត៌មានរបស់ខ្លួន ក្រសួងមហាផ្ទៃ បានហៅការប្រើច្រាស់ដែករបស់អង្គភាពប្រឆាំងអំពើពុករលួយ ដើម្បីដុសសំអាតអំពើពុករលួយ គឺជារឿងធ្ងន់ធ្ងរពេក ដែលអាចនឹងប៉ះពាល់ដល់កិច្ចខិតខំប្រឹងប្រែងរបស់នគរបាលជាតិទាំងមូល។
សេចក្តីប្រកាសព័ត៌មាននេះ គឺដើម្បីឆ្លើយតបទៅនឹងការលើកឡើងរបស់ លោកឱម យិនទៀង ដែលបានថ្លែងក្នុងពិធី អបអរសាទរទិវាជាតិ និងអន្តរជាតិប្រយុទ្ធប្រឆាំងអំពើពុករលួយ កាលពីថ្ងៃទី៩ធ្នូកន្លងមក។
នៅថ្ងៃនេះ លោក ខៀវ សុភ័គ អ្នកនាំពាក្យក្រសួងមហាផ្ទៃ បន្ថែមថា ការប្រើប្រាស់ច្រាស់ដែកដុសសំអាត គឺធ្វើឡើងនៅកន្លែងលាងចាន កន្លែងដុះស្លែ ឬដុសស្នឹមតែប៉ុណ្ណោះ។ លោកថា បច្ចុប្បន្ននគរបាលជាតិទាំងមូល បានខិតខំបំពេញការងារប្រកបដោយការទទួលខុសត្រូវ ប៉ុន្តែការធ្វើទង្វើមិនគប្បីណាមួយ គឺជារឿងបុគ្គលតែប៉ុណ្ណោះ។
អ្នកនាំពាក្យរូបនេះបានបន្តទៀត កន្លងមកក្រសួងមហាផ្ទៃបានសហការយ៉ាងល្អជាមួយអង្គភាពប្រឆាំងអំពើពុករលួយ ក្នុងការទប់ស្កាត់ និងលុបបំបាត់អំពើពុករលួយនេះ។ ជាក់ស្តែងមន្ត្រីនគរបាល និងមន្ត្រីក្រសួងមហាផ្ទៃ ដែលប្រព្រឹត្តិអំពើពុករលួយមួយចំនួន ត្រូវបានស្តីបន្ទោស បណ្តេញចេញពីតួនាទី និងខ្លះទៀតកំពុងជាប់ពន្ធនាគារនៅឡើយ។
ទោះយ៉ាងនេះក្តី ក៏ក្រសួងមហាផ្ទៃ នៅតែបន្តការសហការណ៍ល្អជាមួយ អង្គភាពប្រឆាំងអំពើពុករលួយដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ