ឌុចថា របបខ្មែរក្រហមបានអនុវត្តគោលការណ៍បោសសំអាតផ្ទៃក្នុងដោយមិនលើកលែង សូម្បីតែកូននឹងប្រពន្ធ
អតីតមេគុកទួលស្លែង កាំង ហ្គេចអ៊ាវ ហៅឌុច បានចូលខ្លួនផ្តល់សក្ខីកម្មក្នុងនាមជាសាក្សីជាលើកទី២ នៅថ្ងៃទី ៨ មិថុនានេះ ជុំវិញសំណុំរឿង 002/02 ដើម្បីប្រឆាំងនឹងជនជាប់ចោទនួន ជា និងខៀវ សំផន។ នៅក្នុងសវនាការនៅថ្ងៃទី២នេះ ឌុច បានអះអាងថា នៅក្នុងរបបខ្មែរក្រហម របបនេះ បានចាប់ផ្តើមអនុវត្តគោលការណ៍បោសសំអាតផ្ទៃក្នុងរបស់ខ្លួន តាំងពីឆ្នាំ១៩៧៥ ដោយមិនលើកលែងឡើយ សូម្បីតែប្រពន្ធនឹងកូន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
នៅថ្ងៃទី២នៃការឡើងផ្តល់សក្ខីកម្មក្នុងនាមជាសាក្សី នៅថ្ងៃទី ៨ មិថុនានេះកាំង ហ្គេចអ៊ាវ ហៅ ឌុច អតីតមេគុកទួលស្លែង បានឆ្លើយនឹងសំណួរជាច្រើនរបស់សហព្រះរាជអាជ្ញារងអន្តរជាតិ លោក ដេល ឡៃសាក់ ជុំវិញផែនការបោសសំអាតផ្ទៃក្នុង រឺការសម្រិតសម្រាំងក្នុងចំណោមកម្មាភិបាលជាន់ខ្ពស់នៃរបបកម្ពុជាប្រជាធិបតេយ្យ។
ក្នុងនោះ អតីតមេគុកទួលស្លែងរូបនេះបានអះអាងថា បន្ទាប់ពីបានឡើងកាន់អំណាចនៅថ្ងៃទី១៧ មេសា ឆ្នាំ១៩៧៥មក មេដឹកនាំខ្មែរក្រហម បានចាប់ផ្តើមអនុវត្តគោលការណ៍មួយ ដោយបានបោសសម្អាតផ្ទៃក្នុងរបស់ខ្លួន ក្នុងនោះ សូម្បីតែប្រពន្ធ និងកូន ក៏មិនត្រូវបានលើកលែងនោះឡើយ។
សូមបញ្ជាក់ថា ឌុច ដែលទទួលខុសត្រូវក្នុងការគ្រប់គ្រងគុកទួលស្លែង ដែលបានធ្វើឲ្យមនុស្សជាង១៥០០០ នាក់ បានស្លាប់បាត់បង់ជីវិតក្នុងចន្លោះឆ្នាំ១៩៧៥-១៩៧៩នេះ ត្រូវបានតុលាការខ្មែរក្រហមកាត់ទោសឲ្យជាប់ពន្ធនាគារអស់មួយជីវិតនៅក្នុងសំណុំរឿង 001 កំពុងអនុវត្តទោសរបស់ខ្លួន នៅក្នុងពន្ធនាគារក្រុងតាខ្មៅ ខេត្តកណ្តាល ត្រូវបានតុលាការខ្មែរក្រហមកោះហៅ ឲ្យឡើងផ្តល់សក្ខីកម្មក្នុងនាមជាសាក្សី ដើម្បីប្រឆាំងនឹងអតីតមេដឹកនាំរបស់ខ្លួន គឺលោក នួន ជា និងខៀវ សំផន នៅក្នុងសំណុំរឿង 002/02។
នៅថ្ងៃទី២ នៃការឡើងផ្តល់សក្ខីកម្មក្នុងនាមជាសាក្សីនេះ ឌុច បានថ្លែងថា កូននិងប្រពន្ធរបស់អ្នកទោសទាំងអស់ ត្រូវបានចាត់ទុកថា មានទោសដូចគ្នា ហើយត្រូវនាំយកទៅកម្ទេចចោលតាមគោលការណ៍របស់បក្សកុម្មុយនីស្តកម្ពុជាប្រជាធិបតេយ្យ។ ឌុច បានលើកឧទាហរណ៍ កូន និងប្រពន្ធរបស់ លោក ថាច់ ជា ដែលកាលណោះគឺជារដ្ឋមន្រ្តីក្នុងរបបរបស់លោក លន់ នល់ នោះ ក៏ត្រូវបានកម្ទិចផងដែរ។ មិនតែប៉ុណ្ណោះ កូន និងប្រពន្ធរបស់កម្មាភិបាលជាន់ខ្ពស់នៅក្នុងរបបខ្មែរក្រហម ក៏ត្រូវតែកម្ទិចផងដែរ តួយ៉ាងដូចជា កូននិងប្រពន្ធរបស់ វន វ៉េត ដែលមានតួនាទីជាសមាជិក អចិន្រ្តៃយ៍មជ្ឈិមបក្ស និងជាឧបនាយករដ្ឋមន្រ្តីរដ្ឋមន្រ្តីក្រសួងហិរញ្ញវត្ថុ ក៏ត្រូវបានកម្ទិចផងដែរ។
ការចាប់ក្រុមគ្រួសាររបស់អ្នកទោស ដើម្បីកម្ទិចនេះ គឺធ្វើឡើងតាមបញ្ជារបស់ថ្នាក់លើ មិនមែនជាការសម្រេចរបស់ប្រធានគុកទួលស្លែង រឺធ្វើឡើងស្រេចតែចិត្តនោះទេ។
សូមបញ្ជាក់ដែរថា តាមគម្រោង ឌុច នឹងមានរយៈពេល៩ថ្ងៃដើម្បីផ្តល់សក្ខីកម្ម ហើយថ្ងៃទី៨មិថុនានេះ គឺជាថ្ងៃទី២ហើយនៃការឡើងផ្តល់សក្ខីកម្មរបស់ កាំង ហ្គេចអ៊ាវ ហៅឌុច ក្នុងនាមជាសាក្សីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ