កម្ពុជាប្រារព្ធព្រះរាជពីធីបុណ្យចំរើនព្រះជន្ម សម្តេចព្រះបរមនាថ នរោត្តម សីហមុនី ចំនួនបីថ្ងៃ
កម្ពុជាបានចាប់ផ្តើមប្រារព្ធពិធីបុណ្យជាតិចំនួន ៣ថ្ងៃ គឺចាប់ពីថ្ងៃទី ១៣ ដល់១៥ឧសភា។នៅក្នុងឱកាសព្រះរាជពិធីបុណ្យចម្រើនព្រះជន្ម ព្រះករុណាព្រះបាទសម្តេចបរមនាថ នរោត្តម សីហមុនី គេឃើញមានការតុបតែងលម្អព្រះឆាយាល័ក្ខណ៍របស់ព្រះអង្គនៅសួនច្បារមុខព្រះបរមរាជវាំង តាមក្រសួង និងមន្ទីរនានា និងតាមក្រុមហ៊ុនឯកជនមួយចំនួនផងដែរ។ នៅក្នុងឆ្នាំ២០១៥នេះ ព្រះអង្គសីហមុនី មានព្រះជន្ម៦២ព្រះវស្សាឈានចូល៦៣ព្រះវស្សាហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
ជារៀងរាល់ឆ្នាំ កម្ពុជាតែងតែប្រារព្ធពិធីបុណ្យជាតិ ចម្រើនព្រជន្ម ព្រះករុណាព្រះបាទសម្តេចព្រះបរមនាថ នរោត្តម សីហមុនីចំនួនបីថ្ងៃ គឺចាប់ពីថ្ងៃ១៣ ដល់ ១៥ ឧសភា។ ព្រះរាជពិធីបុណ្យនេះត្រូវបានប្រារព្ធឡើងបន្ទាប់ពីព្រះអង្គឡើងស្នងរាជ្យពីព្រះរាជបិតា នរោត្តម សីហនុនៅថ្ងៃទី ១៤ តុលា ឆ្នាំ ២០០៤មក។
ព្រះអង្គ នរោត្តម សីហមុនីទ្រង់បានប្រសូតនៅថ្ងៃទី ១៤ ខែឧសភា ឆ្នាំ ១៩៥៣ នៅរាជធានីភ្នំពេញ។ ព្រះអង្គបានទទួលការអប់រំថ្នាក់បឋមសិក្សានៅសាលានរោត្តម វិទ្យាល័យដេកាតភ្នំពេញ នៅក្នុងឆ្នាំ ១៩៥៩ ដល់ឆ្នាំ ១៩៦២។ បន្ទាប់ពីនោះមកព្រះអង្គក៏បានទទួលការសិក្សាអប់រំនៅវិទ្យាល័យប្រាគ នៅសាធារណរដ្ឋឆេក រហូតដល់ឆ្នាំ ១៩៧៥។ នៅទីនោះព្រះអង្គបានសិក្សាជំនាញផ្នែករបាំបុរាណ នៅវិទ្យាស្ថានអភិរក្សជាតិប្រាគ ហើយព្រះអង្គក៏ទទួលបានបរិញ្ញាប័ត្រជាន់ខ្ពស់ នៃបណ្ឌិតសភាផ្នែកសិល្បះតន្ត្រីប្រាគ។ រួចមកព្រះអង្គក៏បានបន្តឧត្តមសិក្សាខាងផ្នែកភាពយន្តរយៈពេល១ឆ្នាំ នៅសាធារណរដ្ឋប្រជាមានិតប្រជាធិបតេយ្យកូរ៉េផងដែរ។
ដោយឡែកនៅឆ្នាំ ១៩៧៦ ដល់ ១៩៧៩ ព្រអង្គសីហមុនី បានជាប់ក្រោមការឃុំឃាំង របស់ខ្មែរក្រហម ជាមួយនិងព្រះវររាជបិតា និងព្រះវររាជមាតា និងព្រះអនុជ សម្តេច នរោត្តម នរិន្ទ្រៈពង្ស។ បន្ទាប់ពីរបបខ្មែរក្រហមមក នៅក្នុងឆ្នាំ ១៩៨០ ព្រះអង្គបានក្លាយជាព្រះរាជលេខាផ្ទាល់ របស់ព្រះបិតានរោត្តមសីហនុ នៅពេលដែលព្រះអង្គគង់ប្រថាប់នៅក្នុងសាធារណរដ្ឋប្រជាមានិតចិន។
លុះបន្តបន្ទាប់មក ព្រះអង្គនរោតម្តសីហមុនី បានបន្តការងាររបស់ព្រះអង្គក្នុងវិស័យសិល្បះជាច្រើន រហូតបានក្លាយជា ប្រធានសមាគមរបាំខ្មែរនៅប្រទេសបារំាង និងជាអគ្គនាយក និងជានាយកសិល្បះនៃក្រុមរបាំបាលេ DEVA។ ព្រះអង្គក៏បានបង្កើតស្នាព្រះហស្ថផលិតខ្សែ ភាពយន្តរបាំបាលេចំនួនពីរ គឺមានរឿង សុបិន្ត និងរឿងធាតុទាំង៤។
ព្រះអង្គបានបន្តការងារជាច្រើននៅក្នុងប្រទេសរហូតដល់ថ្ងៃទី ១៤ ខែតុលាឆ្នាំ ២០០៤ ព្រះអង្គត្រូវបានសមាជិកក្រុមប្រឹក្សារាជសម្បតិ្តជ្រើសរើសជាឯកច្ឆន្ទជា ព្រះមហាក្សត្រនៃព្រះរាជាណាចក្រកម្ពុជា រហូតមកទល់នឹងបច្ចុប្បន្ននេះ។ ព្រះអង្គចេះប្រើភាសាចំនួនបី គឺបារំាង អង់គ្លេស និងឆេក ហើយព្រះអង្គក៏ទទួលបានគ្រឿងឥស្សរិយយសជាច្រើនផងដែរដែលរួមមានទាំងជាតិនិងអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ