លោកហ៊ុន សែន ពន្យល់ពីដំណើរស្វែងរកសន្តិភាព មុនខួបកិច្ចព្រមព្រៀងទីក្រុងប៉ារីស ២៣តុលាមកដល់
ដូចការសន្យា លោកនាយករដ្ឋមន្រ្តីហ៊ុន សែន កាលពីម្សិលមិញ បានបង្ហោះនៅក្នុងទំព័រហ្វេសប៊ុកផ្លូវការរបស់លោកនូវអត្ថបទ និងសេចក្តីប្រកាសរួមមួយចំនួនរវាងលោក និង សម្តេចព្រះនរោត្តម សីហនុ ទាក់ទងនឹងដំណើរការស្វែងរកដំណោះស្រាយសន្តិភាព និងការបញ្ចប់សង្រ្គាមទាំងស្រុងនៅកម្ពុជាចាប់តាំងពីឆ្នាំ១៩៨៧មក។ ការចុះផ្សាយនេះ បានធ្វើឡើងតែបីថ្ងៃប៉ុណ្ណោះ មុនខួបលើកទី២៤ នៃកិច្ចព្រមព្រៀងសន្តិភាពទីក្រុងប៉ារីស ដែលនឹងមកដល់នៅថ្ងៃសុក្រ សប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:១១
នៅក្នុងឯកសារចំនួន៧ទំព័រដែលបានបង្ហោះនៅក្នុងទំព័រហ្វេសប៊ុករបស់ខ្លួន លោកនាយករដ្ឋមន្ត្រី ហ៊ុន សែន បានរៀបរាប់ដោយសង្ខេបពីការខិតខំប្រឹងប្រែងរបស់លោកជាមួយសម្តេចព្រះ នរោត្តម សីហនុ ព្រះមហាវីរក្សត្រខ្មែរក្នុងដំណើរស្វែងរកសុខសន្តិភាពជូនប្រជាពលរដ្ឋកម្ពុជា។ លោកហ៊ុន សែន បានតស៊ូស្វែងរកសន្តិភាពចុងក្រោយសម្រាប់កម្ពុជានេះ តាំងពីលោកកាន់ដំណែងជារដ្ឋមន្រ្តីការបរទេស រហូតក្លាយជានាយករដ្ឋមន្ត្រីនៅក្នុងខែមករា ឆ្នាំ១៩៨៥ ។ គឺនៅក្នុងដំណែងជានាយករដ្ឋមន្រ្តីនេះហើយ ដែលលោកហ៊ុន សែន ទទួលបានជោគជ័យក្នុងការជួបចរចាទ្វេភាគីជាមួយសម្តេចព្រះនរោត្តម សីហនុ។
ការចរចាដំបូងរវាងឥស្សរជននយោបាយកំពូលទាំងពីររបស់កម្ពុជានេះ បានធ្វើឡើងនៅថ្ងៃទី២ ខែធ្នូ ឆ្នាំ១៩៨៧ នៅFERE-EN-TARDENOIS នៅក្នុងប្រទេសបារាំង។ លោកនាយកមន្រ្តី បានគូសបញ្ជាក់នៅក្នុងឯកសារថា បើទោះបីមានការលំបាកដោយសារតែប្រទេស១ចំនួន និង ភាគីខ្មែរក្រហម ព្រមទាំងរណសិរ្សរំដោះប្រជាពលរដ្ឋខ្មែរជំទាស់ ប៉ុន្តែសម្តេចព្រះនរោត្តម សីហនុ បានសម្រេចព្រះទ័យធ្វើការចរចាជាមួយលោក។
បន្ទាប់ពីនោះ កិច្ចចរចាទ្វេភាគី និងត្រីភាគីដែលមានការចូលរួមពីប្រទេសមួយចំនួនត្រូវបានធ្វើឡើងជាបន្តបន្ទាប់។ កិច្ចចរចាសំខាន់ៗ រួមមានដូចជា ការចរចាបង្កើតនូវក្រុមប្រឹក្សាជាតិជាន់ខ្ពស់នៅក្នុងឆ្នាំ១៩៩០ ការសម្រេចដោះស្រាយជម្លោះនៅកម្ពុជាតាមផ្លូវនយោបាយ ការចរចាលើបទឈប់បាញ់និងរំសាយកងទ័ព និងការចរចារៀបចំប្រព័ន្ធបោះឆ្នោតនៅកម្ពុជាជាដើម។ នៅថ្ងៃទី២៣ ខែតុលា ឆ្នាំ១៩៩១ កិច្ចព្រមព្រៀងសន្តិភាពទីក្រុងប៉ារីសត្រូវបានចុះហេត្ថលេខា និង ឈានដល់ការបោះឆ្នោតលើកដំបូងនៅក្នុងប្រទេសកម្ពុជារៀបចំឡើងដោយប្រធានអាជ្ញាធរអាសន្នរបស់អង្គការសហប្រជាជាតិ ហៅកាត់ថា អ៊ុនតាក់ នៅឆ្នាំ១៩៩៣។
យ៉ាងណាក៏ដោយ លោកនាយករដ្ឋមន្ត្រីហ៊ុន សែន បានសង្កត់ធ្ងន់ថា អ្វីដែលកិច្ចព្រមព្រៀទីក្រុងប៉ារីសចង់បាន តែអ៊ុនតាក់មិនអាចសំរេចបាននោះ គឺនៅពេលដែលអ៊ុនតាក់ដកចេញ បានបន្សល់ទុកឲ្យកម្ពុជា មានតំបន់ត្រួតត្រាពីរ និងរដ្ឋាភិបាលពីរ។ បើតាមលោកហ៊ុន សែន ជំរើសចុងក្រោយ សំរាប់សន្តិភាពទាំងស្រុងនៅកម្ពុជា គឺការដាក់ចេញ និងអនុវត្តនូវនយោបាយឈ្នះឈ្នះពីឆ្នាំ១៩៩៦ ដល់ឆ្នាំ១៩៩៨។ ប្រមុខរដ្ឋាភិបាលកម្ពុជាបានចាត់ទុកថា នេះគឺជាសន្តិភាពដែលជនជាតិកម្ពុជាបានរួមគ្នាបង្កើតឡើងដោយខ្លួនឯង គ្មានអ្នកឈ្នះ គ្មានអ្នកចាញ់ និងឯកភាពជាតិ ឯកភាពទឹកដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ