កង្វះខាតនៃការផ្សព្វផ្សាយព័ត៌មានធ្វើឲ្យ ចំនួនអ្នកចុះឈ្មោះបោះឆ្នោតថយចុះ
មូលហេតុចម្បងដែលធ្វើឲ្យចំនួនអ្នកចុះឈ្មោះបោះឆ្នោត មានការថយចុះគួរឲ្យកាលពីសប្តាហ៍មុន គឺដោយសារតែ កង្វះខាតការផ្សព្វផ្សាយព័ត៌មាន ទាក់ទងនឹងការចុះឈ្មោះបោះឆ្នោតនេះ។ នេះគឺជាការបញ្ជាក់ របស់ លោក គល់ បញ្ញា នាយកប្រតិបត្តិអង្គការឃ្លាំមើលការបោះឆ្នោត ខុមហ្រ្វែល។ សូមបញ្ជាក់ថា គិតត្រឹមថ្ងៃទី ៣១ ខែ តុលា នេះ ចំនួនអ្នកមិនទាន់ចុះឈ្មោះបោះឆ្នោត មានរហូតទៅដល់ជិត ៣ លាន នាក់ទៀត ខណៈដែលដំណើការចុះឈ្មោះបោះឆ្នោត នឹងត្រូវបិទបញ្ចប់នៅចុងខែ វិច្ឆិកា ខាងមុខនេះ។
ចុះផ្សាយនៅថ្ងៃ៖
ស្តាប់ - ០១:៣៣
គិតត្រឹមថ្ងៃទី ៣០ ខែ តុលា ប្រជាពលរដ្ឋដែលបានចុះឈ្មោះបោះឆ្នោត មានចំនួន ៦ លាន ៦ សែន ៣ ម៉ឺន នាក់ ឬ ស្មើនឹង ៦៨%។ យ៉ាងណាក៏ដោយ ខណៈដែលកាលបរិច្ឆេទផុតកំណត់នៃការចុះឈ្មោះបោះឆ្នោត កំពុងខិតជិតមកដល់ ចាប់តាំងពីថ្ងៃពុធ ដល់ថ្ងៃ សៅរ៍ សប្តាហ៍មុន ចំនួនអ្នកទៅចុះឈ្មោះបោះឆ្នោត មានការថយចុះគួរឲ្យកត់សម្គាល់។
បើតាម សម្ព័ន្ធកំណែទម្រង់ការបោះឆ្នោតហៅកាត់អឺរ៉ា រហូតមកដល់ពេលចំនួនពលរដ្ឋទៅចុះឈ្មោះមានការថយចុះ។ ជាក់ស្តែង ពលរដ្ឋទៅចុះឈ្មោះបោះឆ្នោតជាង១០ម៉ឺននាក់ មកត្រឹមតែប្រមាណជា ៥ ម៉ឺន នាក់ ក្នុងមួយថ្ងៃ។
មូលហេតុចម្បងបំផុតដែលធ្វើឲ្យចំនួនអ្នកចុះឈ្មោះបោះឆ្នោតមានការថយចុះ ត្រូវបានលោក គល់ បញ្ញា នាយកប្រតិបត្តិអង្គការឃ្លាំមើលការបោះឆ្នោត ហៅកាត់ថា ខុមហ្វ្រែល បញ្ជាក់ថា ដោយសារតែយុទ្ធនាការផ្សព្វផ្សាយដើម្បីលើកទឹកចិត្តឲ្យប្រជាពលរដ្ឋទៅចូលរួមបោះឆ្នោត ហាក់មានការថមថយ និងមិនសូវសកម្មដូចកាលពី ការចាប់ផ្តើមដំបូង។ មិនត្រឹមតែប៉ុណ្ណោះ បញ្ហាមួយដ៏សំខាន់ទៀតនោះគឺ បញ្ហាចំណាកស្រុករបស់ប្រជាពលរដ្ឋ។ លោក ថា មកទល់ពេលនេះ ប្រជាពលរដ្ឋមួយចំនួន ដែលបានផ្លាស់ទីលំនៅ ឬ ទៅធ្វើការនៅតំបន់ផ្សេង មិនសូវជាចាប់អារម្មណ៍ក្នុងការទៅចុះឈ្មោះបោះឆ្នោតនោះទេ ដោយរួមទាំងព្រះសង្ឃផង។
ទាក់ទិននឹងបញ្ហានេះ លោក គល់ បញ្ញា បានឲ្យជម្រុញឲ្យ ស្ថាប័នពាក់ព័ន្ធ រួមមាន គណៈកម្មាធិការជាតិរៀបចំការបោះឆ្នោត (គជប) គណបក្សនយោបាយ និង អង្គការសង្គមស៊ីវិល ឲ្យធ្វើការរួមគ្នា ដើម្បីជូនដំណឹងឲ្យកាន់តែទូលំទូលាយនិងផុសផុលបន្ថែមទៀត ដើម្បីក្រើនរំឮក ទៅប្រជាពលរដ្ឋដែលមិនទាន់បានទៅចុះឈ្មោះបោះឆ្នោត ។
បន្ថែមលើនេះ អ្នកធ្វើការលើបញ្ហាបោះឆ្នោតរូបនេះ ចង់ឲ្យគជប បង្កើតយន្តការ ណាមួយដើម្បីជួយសម្រួលនៅនឹងកន្លែង ក្នុងករណីប្រជាពលរដ្ឋ ខ្វះខាតឯកសារ។
ទោះបីជាយ៉ាងណាក៏ដោយ លោក គល់ បញ្ញា ជឿជាក់ថា ប្រជាពលរដ្ឋអាចនឹងចុះឈ្មោះបោះឆ្នោតបានគ្រប់គ្នា ក្នុងរយៈពេល ១ ខែ ទៀត។ សូមបញ្ជាក់ថា សូមជម្រាបថា ដំណើរការចុះឈ្មោះបោះឆ្នោតថ្មី ចាប់ផ្តើមពីថ្ងៃទី០១ ខែកញ្ញា ដល់ថ្ងៃទី២៩ ខែវិច្ឆិកា ឆ្នាំ២០១៦។ គ.ជ.ប បញ្ជាក់ថា ប្រជាពលរដ្ឋដែលមានអាយុ១៨ឆ្នាំឡើង ហើយមានសិទ្ធិចុះឈ្មោះបោះឆ្នោត មានចំនួនជាង៩.៦លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ