អង្គការលីកាដូ៖ ដីសម្បទានសង្គមកិច្ចដែលចែកដោយអាជ្ញាធរកម្ពុជា មិនអាចបង្កបង្កើនផលបាន
ដីសម្បទានសង្គមកិច្ចដែលបានបែងចែកដោយអាជ្ញាធរកម្ពុជា មានមួយផ្នែក គឺមិនសមរម្យសម្រាប់ការធ្វើស្រែចម្ការនោះឡើយ។ ពោលគឺមិនអាចបង្កបង្កើនផលបានតែម្ដង។ នេះបើផ្អែកតាមរបាយការណ៍ ស្ដីពីការពិនិត្យទៅលើសម្បទានដីសង្គមកិច្ច ដែលអង្គការលីកាដូ ទើបតែចេញផ្សាយនៅថ្ងៃពុធនេះ។ តាមរយៈរបាយការណ៍កម្រាស់២០ទំព័រនេះ លីកាដូបានអំពាវនាវឲ្យម្ចាស់ជំនួយ ទទួលស្គាល់នូវការពិតអស់ទាំងនេះ។ និងជាពិសេស ត្រូវតាមដានការអនុវត្តគម្រោងរបស់អាជ្ញាធរ ប្រកបដោយការទទួលខុសត្រូវព្រមទាំងការខិតខំប្រឹងប្រែងពិតប្រាកដ។
ចុះផ្សាយនៅថ្ងៃ៖
ស្តាប់ - ០២:០៩
តាមការរកឃើញរបស់អង្គការការពារសិទ្ធិមនុស្ស លីកាដូ មានពលរដ្ឋតិចជាង៥០ភាគរយ ក្នុងចំណោមគ្រួសារទាំងអស់ក្នុងគម្រោងសម្បទានដីសង្គមកិច្ច បានតាំងទីលំនៅ និងបន្តរស់នៅក្នុងតំបន់នោះ។ របាយការណ៍របស់លីកាដូបង្ហាញថា ដីធ្លីដែលអាជ្ញាធរកម្ពុជាបែងចែកឲ្យប្រជាពលរដ្ឋនោះ មានយ៉ាងហោចណាស់មួយផ្នែក ដែលមិនអាចបង្កបង្កើនផលបាន។
ប្រជាពលរដ្ឋមួយចំនួនដែលទទួលបានដីធ្លីហើយ ក៏នៅមិនទាន់ទទួលបានប័ណ្ណកម្មសិទ្ធិដីធ្លីនៅឡើយ បើទោះបីជាបានធ្វើសំណើ និងបំពេញបែបបទត្រូវតាមច្បាប់ហើយក៏ដោយ។ ចំណែកប្រជាពលរដ្ឋមួយចំនួនទៀត ត្រូវប្រឈមនឹងការបាត់បង់សិទ្ធិក្នុងការកាន់កាប់ដីធ្លីរបស់ខ្លួន ដោយសារការអនុវត្តគម្រោងមិនមានប្រសិទ្ធភាព។
យោងតាមរបាយការណ៍របស់លីកាដូ ដីធ្លីចំនួនពាក់កណ្ដាលនៃតំបន់ដីសម្បទានសង្គមកិច្ចនោះ មិនទាន់ចាប់ផ្ដើមដំណើរការនៅឡើយទេ ហើយត្រូវការជំនួយផ្នែកហិរញ្ញវត្ថុនិងបច្ចេកទេសជាច្រើនទៀត ដើម្បីឲ្យមាននិរន្ដរភាពបន្តិចបន្តួចទៅមុខ។
អង្គការលីកាដូ បានបង្ហាញពីការសាទរ នៅពេលដែលធនាគារពិភពលោកប្រកាសផ្ដល់ជំនួយ២៥លានដុល្លារបន្ថែមទៀត សម្រាប់គម្រោងសម្បទានដីសង្គមកិច្ច។ លីកាដូចាត់ទុកជំនួយនេះថា ជារឿងចាំបាច់ ដើម្បីកាត់បន្ថយភាពក្រីក្រ និងបង្កើនសន្តិសុខស្បៀង។ ក៏ប៉ុន្តែ គម្រោងដែលទាមទារឲ្យមានការវិនិយោគច្រើនក្នុងពេលយូរឆ្នាំបែបនេះ មិនអាចចាត់ទុកថាជាគំរូសម្រាប់គំនិតផ្ដួចផ្ដើមគម្រោងសម្បទានដីសង្គមកិច្ច នាពេលអនាគតនោះទេ។ នេះបើតាមលីកាដូ។ អង្គការនេះបានអំពាវនាវឲ្យម្ចាស់ជំនួយ ទទួលស្គាល់នូវការពិត។ និងជាពិសេស ត្រូវតាមដានការអនុវត្តគម្រោងរបស់អាជ្ញាធរ ប្រកបដោយការទទួលខុសត្រូវព្រមទាំងការខិតខំប្រឹងប្រែងពិតប្រាកដ។
គួរជម្រាបជូនថា គម្រោងសម្បទានដីសង្គមកិច្ចរបស់រដ្ឋាភិបាលកម្ពុជា បានទទួលជំនួយពីធនាគារពិភពលោក និងភ្នាក់ងារកិច្ចសហប្រតិបត្តិការអាល្លឺម៉ង់ ក្នុងទំហំទឹកប្រាក់ប្រមាណ១៣លានដុល្លារអាមេរិក។ ចាប់ផ្ដើមនៅឆ្នាំ២០០៨ គម្រោងនេះ មានគោលបំណងបង្ហាញឲ្យឃើញថា ដីសម្បទានសង្គមកិច្ចអាចចូលរួមកាត់បន្ថយភាពក្រីក្រនៅកម្ពុជា តាមរយៈការផ្ដល់ដីដល់ប្រជាពលរដ្ឋដែលគ្មានដីធ្លី ដើម្បីសង់លំនៅដ្ឋាននិងធ្វើស្រែចម្ការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ