ទីភ្នាក់ងារជាតិមុខរបរ៖ កម្ពុជាមានការងារច្រើនជាងតម្រូវការ ខណៈដែលអ្នកជំនាញជំទាស់
ទីភ្នាក់ងារជាតិមុខរបរ និងការងារ នៅថ្ងៃទី១ វិច្ឆិកានេះ បានរៀបចំសន្និសីទសារព័ត៌មានប្រកាសពីពិព័រណ៍ការងារថ្នាក់ជាតិលើក ទី៦ដែលគ្រោងធ្វើឡើងនៅថ្ងៃទី៥ និងថ្ងៃទី៦ វិច្ឆិកាចុងសប្តាហ៍នេះ។ ថ្លែងទៅកាន់អ្នកសារព័ត៌មាន អនុប្រធានទីភ្នាក់ងារជាតិ បានអះអាង កំណើននៃកម្លាំងពលកម្មរបស់កម្ពុជាប្រចាំឆ្នាំគឺមិនទាន់ឆ្លើយតប នឹងតម្រូវការនៃទីផ្សារការងារនោះទេ។ ប៉ុន្តែអ្នកជំនាញសេដ្ឋកិច្ចថាការលើកឡើងនេះ គឺជាទីផ្សារការងារក្នុងប្រព័ន្ធតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
លោកហៃ ហ៊ុនឡេង អនុប្រធានទីភ្នាក់ងារជាតិមុខរបរ និងការងារ បានថ្លែងថាតម្រូវការទីផ្សារការងារកម្ពុជាជាប្រចាំឆ្នាំគឺប្រមាណ២០ម៉ឺនកន្លែង ប៉ុន្តែកំណើនកម្លាំងពលកម្មមានមិនគ្រប់គ្រាន់នោះទេ។ វិស័យដែលត្រូវការកម្លាំងច្រើនជាងគេគឺវិស័យកសិកម្ម និងតាមពីក្រោយដោយវិស័យឧស្សាហកម្ម និងសេវាកម្ម។ ប៉ុន្តែវិស័យដែលមានកំណើនការងារខ្លាំងជាងគេ គឺវិស័យឧស្សាហកម្មដែលមានប្រមាណ១៦ភាគរយ ហើយវិស័យសេវាកម្ម មាន១៤.២៦%។ ដោយឡែកវិស័យកសិកម្មមានតម្រូវការការងារតិចជាងគេគឺ ៨.២ %។
ទន្ទឹមនឹងនេះ អ្នកវិភាគនិងអ្នកតាមតានសេដ្ឋកិច្ចកម្ពុជា លោក ច័ន្ទ សុផល បានលើកឡើងថាតួលេខនោះគឺជាចំនួនកិច្ចការងារក្នុងប្រព័ន្ធ ឬផ្លូវការតែប៉ុណ្ណោះ ខណៈដែលមនុស្សពេញកម្លាំងជាច្រើនបានបំពេញការងារក្រៅផ្លូវការ និងចំណាកស្រុកមានច្រើននាក់បន្ថែមទៀត។ដែលនេះបង្ហាញពីតម្រូវការការងាររបស់ពលរដ្ឋពេញកម្លាំងជាច្រើនផ្សេងទៀត។
គូសបញ្ជាក់ថា តម្រូវការទីផ្សារការងារប្រមាណ២០ម៉ឺនកន្លែងនេះ គឺមិនសមាមាត្រទៅនឹងចំនួនកម្លាំងពលកម្មរបស់កម្ពុជាដែលមួយឆ្នាំមានតម្រូវការប្រមាណ២៥ម៉ឺន ទៅ៣០ម៉ឺនកន្លែង។ អ្នកសេដ្ឋកិច្ច លោក សុផល ក៏ស្នើឱ្យទីភ្នាក់ងារជាតិមុខរបរនឹងការងារ ត្រូវពង្រឹង និងពង្រីកការងារកិច្ចការងារផ្សព្វផ្សាយឱ្យទៅដល់មូលដ្ឋានគ្រប់ច្រកល្ហកដើម្បីផ្តល់ព័ត៌មានដល់ពលរដ្ឋដែលត្រូវការងារពីព្រោះថាអ្នកជនបទខ្វះព័ត៌មានស្តីពីការងារនេះច្រើន ហើយភាគច្រើនបំផុតការស្វែងរកការងារពីអ្នកជនបទ គឺតាមបណ្តាញមេខ្យល់ និងសាច់ញាតិតែប៉ុណ្ណោះ។
រដ្ឋាភិបាល និងអ្នកជំនាញមិនមានចំណុចឯកភាពរួមលើអត្រានៃអ្នកអត់ការងារធ្វើនោះទេ។ ប៉ុន្តែ លោក ហៃហ៊ុនឡេង បានលើកឡើងថា កត្តាគ្មានសមត្ថភាពគឺជាចំណុចដែលធ្វើឱ្យពលរដ្ឋកម្ពុជាមួយចំនួនមិនអាចទទួលបានការងារធ្វើ។ ទន្ទឹមនឹងមានពិពរណ៍ការងារនៅចុងសប្តាហ៍នេះ ទីភ្នាក់ងារជាតិនិងមុខរបរបានអះអាងវាជាឱកាសបន្ថែមទៀតដល់ពលរដ្ឋកម្ពុជាខណៈដែលពិរពណ៍នេះនឹងផ្តល់ឱកាសការងារប្រមាណ៩ពាន់កន្លែងបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ