ទិវាកុមារ៖ អង្គការភ្លែនថា កុមារកម្ពុជានៅប្រឈមខ្លាំងនឹងអំពើហិង្សាផ្នែកអារម្មណ៍
នៅថ្ងៃសុក្រនេះគឺជាទិវាកុមារអន្តរជាតិ១មិថុនា។ ជាការកត់សម្គាល់នៅកម្ពុជាមិនបានប្រារព្ធពិធីនេះផ្លូវការឡើយ តែប្រមុខរដ្ឋាភិបាលលោក ហ៊ុន សែន បានផ្ញើសារជូនពរកុមារកម្ពុជាក្នុងឱកាសនេះ។ ចំណែក អង្គការភ្លែនអន្តរជាតិ(PLAN International) ដែលធ្វើការងារទាក់ទងកុមារ មើលឃើញថា ស្ថានភាពទូទៅរបស់កុមារនៅកម្ពុជា មានភាពល្អប្រសើ។ ប៉ុន្តែកុមារកម្ពុជានៅតែប្រឈមខ្លាំងនឹងអំពើហិង្សាផ្នែកអារម្មណ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
លោក ទី សុវណ្ណារី អ្នកឯកទេសកិច្ចការពារកុមារនៃអង្គការភ្លែនអន្តរជាតិ ថ្លែងប្រាប់វិទ្យុបារាំងនៅថ្ងៃសុក្រនេះថា អំពើហិង្សាផ្នែកអារម្មណ៍ដែលបន្តកើតមាន តាមរយៈការស្ដីបន្ទោស ការប្រៀបប្រដូចកុមារនិងកុមារ។ បញ្ហានេះបណ្ដាលមកពីទម្លាប់ពលរដ្ឋខ្មែរមិនទាន់មានវិធីសាស្ត្រអប់រំកុមារតាមបែបវិជ្ជមាន ខណៈគ្រួសារខ្លះមានការយល់ដឹងមិនប្រើហិង្សាដោយការវាយដំលើរូបរាងកាយក៏ដោយ ប៉ុន្តែឱពុកម្ដាយ បានប្រើជាពាក្យសម្ដីតាមរយៈការជេរស្ដី និងបន្ទោស ជាដើម។
ឥរិយាបថនេះ លោក ទី សុវណ្ណារី មើលឃើញថា អំពើហិង្សាផ្នែកអារម្មណ៍ នឹងប៉ះពាល់ផ្លូវចិត្តកុមារខ្លាំង ដែលនេះជម្រុញឲ្យកុមារប្រព្រឹត្តទង្វើអវិជ្ជមានផ្សេងៗ។ ដើម្បីចូលរួមដោះស្រាយបញ្ហានេះ មិនមែនជារឿងងាយស្រួលឡើយសម្រាប់បរិបទកុមារនៅកម្ពុជា ព្រោះថាកម្ពុជានៅមិនទាន់មានអ្នកជំនាញផ្នែកផ្លូវចិត្ត ដែលផ្តោតតែទៅលើបញ្ហាកុមារនៅក្នុងការជួយផ្សព្វផ្សាយ។
យ៉ាងណាក៏ដោយ បើតាម លោក ទី សុវណ្ណារី ក្រុមអង្គការសង្គមស៊ីវិល សហការជាមួយរដ្ឋាភិបាល តាមរយៈក្រសួងកិច្ចការនារីធ្វើការនេះ ជាមួយឱពុក ម្ដាយ អប់រំកូនតាមបែបវិជ្ជមានជាដើម។ គួររម្លឹកថា ក្រៅពីជួបទម្រង់ហិង្សាផ្នែកអារម្មណ៍ កុមារកម្ពុជានៅប្រឈមនឹងអំពើហិង្សាផ្សេងទៀតគឺអំពើហិង្សាផ្លូវភេទ រាងកាយ និងភាពមិនអើពើ។
នៅក្នុងឱកាសខួបលើកទី៦៩ ទិវាកុមារអន្តរជាតិ ១មិថុនានេះដែរ លោកនាយករដ្ឋមន្ត្រី ហ៊ុន សែន លើកឡើងតាមរយៈសារមួយច្បាប់ថា កុមារត្រូវការចាំបាច់នូវការអភិវឌ្ឍផ្នែករាងកាយ បញ្ញា ស្មារតី និងការសិក្សាអប់រំរៀនសូត្រ។ ហេតុនេះកុមារត្រូវការការថែទាំ ការជួយទំនុកបម្រុងពីគ្រួសារ និងសង្គម ជាពិសេសការលើកកម្ពស់កិច្ចការពារកុមារ ដោយឲ្យកុមារទទួលបានការសិក្សាអប់រំ។
បន្ថែមពីលើនេះ លោកនាយករដ្ឋមន្ត្រីក៏បានជម្រុញក្រសួង ស្ថាប័នពាក់ព័ន្ធ ត្រូវលើកកម្ពស់ការយល់ដឹង និងផ្សព្វផ្សាយអំពីការទប់ស្កាត់ការប្រើប្រាស់ពលកម្មកុមារ នៅគ្រប់សកម្មភាពសេដ្ឋកិច្ចផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ