ប៉ូលិស ប្រកាសឲ្យពលករបរទេស រួសរាន់បំពេញបែបបទធ្វើការនៅកម្ពុជា
ប៉ូលិសក្រសួងមហាផ្ទៃ តាមរយៈលោកនាយឧត្តមសេនីយ៍ សុខ ផល អគ្គនាយកអន្តោប្រវេសន៍ បានប្រកាស ជូនដំណឹងដល់គ្រប់ម្ចាស់ ឬនាយកសហគ្រាស គ្រឹះស្ថាន និងរាល់ពលករបរទេស ដែលមានបំណង និងកំពុងប្រកបមុខរបរ ឬធ្វើការនៅកម្ពុជា ត្រូវរួសរាន់បំពេញបែបបទ ដើម្បីធ្វើការ ស្របតាមច្បាប់ការងារ និងច្បាប់អន្តោប្រវេសន៍។ អគ្គនាយកដ្ឋានអន្តោប្រវេសន៍ នឹងចុះត្រួតពិនិត្យតាមគោលដៅ សហគ្រាស គ្រឹះស្ថាននានា លើពលករបរទេស ហើយបើគ្មានទិដ្ឋាការសម្រាប់ធ្វើការ និងគ្មានប័ណ្ណការងារ នោះក្រុមចំរុះអធិការកិច្ចហត្ថពលកម្មបរទេស នឹងធ្វើការផាកពិន័យតាមច្បាប់ជាធរមាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
កន្លងមក អគ្គនាយកដ្ឋានអន្តោប្រវេសន៍ និងអគ្គនាយកដ្ឋានការងារ បានចាត់តាំងក្រុមចម្រុះអធិការកិច្ច ហត្ថពលកម្មបរទេស ចុះត្រួតពិនិត្យតាមសហគ្រាស គ្រឹះស្ថាន ដែលមានប្រើប្រាស់ពលករបរទេសនៅទូទាំងប្រទេស។ ជាលទ្ធផល ក្រុមចម្រុះអធិការកិច្ចសង្កេតឃើញថា ជាទូទៅ ជនបរទេស ដែលកំពុងប្រកបមុខរបរ និងធ្វើការនៅក្នុងព្រះរាជាណាចក្រកម្ពុជា បានគោរព និងអនុវត្តច្បាប់ស្តីពីអន្តោប្រវេសន៍ និងច្បាប់ស្តីពីការងារ បានយ៉ាងល្អប្រសើរ ពលករទាំងនោះ មានលិខិតឆ្លងដែនសុពលភាពត្រឹមត្រូវ មានប្រភេទទិដ្ឋាការសម្រាប់ធ្វើការ និងមានប័ណ្ណការងារ។
ក៏ប៉ុន្តែអគ្គនាយកអន្តោប្រវេសន៍ បានលើកឡើងក្នុងលិខិតចុះថ្ងៃទី១មេសាថា នៅមានសហគ្រាស គ្រឹះស្ថាន និងពលករបរទេសមួយចំនួនតូច ពុំទាន់យកចិត្តទុកដាក់ ក្នុងការបំពេញកាតព្វកិច្ចឲ្យត្រឹមត្រូវ តាមច្បាប់កំណត់នៅឡើយ ទោះបីជាក្រុមអធិការកិច្ច បានណែនាំធ្វើកិច្ចសន្យាទុករយៈពេលឲ្យទៅបំពេញបែបបទបានស្របច្បាប់ជាញឹកញាប់ណាស់ទៅហើយក្តី។
ក្នុងសេចក្តីណែនាំដដែល លោកនាយឧត្តមសេនីយ៍ សុខ ផល បានតម្រូវឲ្យគ្រប់ម្ចាស់ ឬនាយកសហគ្រាស គ្រឹះស្ថាន និងរាល់ពលករបរទេស ដែលមានបំណង និងកំពុងប្រកបមុខរបរ ឬធ្វើការនៅកម្ពុជា ត្រូវរួសរាន់បំពេញបែបបទ ឲ្យបានគ្រប់គ្រាន់ តាមច្បាប់ការងារ និងច្បាប់អន្តោប្រវេសន៍។
ក្នុងនោះ អគ្គនាយកដ្ឋានអន្តោប្រវេសន៍ ក៏បានប្រកាសថា នឹងចុះពិនិត្យតាមគោលដៅ សហគ្រាស គ្រឹះស្ថាននានា ហើយក្នុងពេលរកឃើញថា ពលករបរទេសណាម្នាក់ ដែលកំពុងប្រកបមុខរបរ ឬធ្វើការគ្មានលិខិតឆ្លងដែន ដែលមានសុពលភាពត្រឹមត្រូវ គ្មានប្រភេទទិដ្ឋាការសំរាប់ធ្វើការ គ្មានប័ណ្ណការងារ នោះក្រុមអធិការកិច្ចហត្ថពលកម្មបរទេស នឹងធ្វើការផាកពិន័យតាមច្បាប់ជាធរមាន។
លោកហេង សួរ អ្នកនាំពាក្យក្រសួងការងារ បានលើកឡើងថា សេចក្តីណែនាំខាងលើ ជាការក្រើនរំលឹកជាថ្មីទៀតដល់ម្ចាស់សហគ្រាស ដើម្បីគ្រប់គ្រងពលករបរទេស ឲ្យកាន់តែប្រសើរឡើង។ តាមលោកហេង សួរ នៅឆ្នាំ២០១៤ មានពលករបរទេសចំនួនជាង ១៨០០០ នាក់ រហូតដល់ ៣ ខែ ដើមឆ្នាំ២០១៥នេះ អាចនឹងកើនដល់យ៉ាងតិច ២ ម៉ឺននាក់ ភាគច្រើនជាជនជាតិចិន និងវៀតណាម ធ្វើការក្នុងវិស័យកាត់ដេរ និងកសិកម្ម។
លោកហេងសួរ បន្ថែមថា ពលករបរទេសម្នាក់ត្រូវចំណាយជាង ៤០ ម៉ឺនរៀល លើប័ណ្ណការងារ និងសេវាពិនិត្យសុខភាព។ តាមរយៈអធិការកិច្ចកន្លងមក ក្រុមការងារចម្រុះ បានផាកពិន័យ និងមានទាំងការបណ្តេញពលករបរទេស ដែលគ្មានលិខិតស្នាមត្រឹមត្រូវ ចេញពីកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ