លោកកឹម សុខា នៅតែមិនខ្វល់នឹងក្រុមយុវជនដែលទាមទារឲ្យលោកបកស្រាយរឿងស្នេហា
ក៏មិនខុសពីថ្ងៃសៅរ៍ម្សិលមិញដែរ នៅថ្ងៃអាទិត្យនេះ ក្រុមយុវជនដែលអះអាងខ្លួនឯងថា ជានិស្សិតនោះ បានបន្តទៅអុកឡុកវេទិកាគណបក្សសង្រ្គោះជាតិដែលធ្វើឡើងនៅទីក្រុងភ្នំពេញ ដើម្បីទាមទារឲ្យលោកកឹម សុខា ប្រធានស្តីទីគណបក្សបកស្រាយអំពីរឿងអាស្រូវសេ្នហាតាមខ្សែទូរស័ព្ទ។ ប៉ុន្តែក្រុមនេះ ត្រូវបានក្រុមយុវគណបក្សប្រឆាំង និង កងសន្តិសុខ បានរារាំងមិនចូលទៅវេទិកា។ ចំណែកលោកកឹម សុខាវិញ មិនបានខ្វាយខ្វល់នឹងក្រុមនិស្សិតនេះឡើយ គឺលោកផ្តោតសំខាន់តែលើរឿងបោះឆ្នោតនាពេលខាងមុខតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ការប្រទាញប្រទង់ និង ការប៉ះទង្គិចពាក្យសម្តីគ្នារវាងក្រុមយុវជនដែលទាមទារលោកកឹម សុខាឲ្យបកស្រាយការពិត និង ក្រុមយុវជនដែលគាំទ្រគណបក្សសង្រ្គោះជាតិ បានកើតឡើងនៅក្បែរវេទិកាសកម្មជនមូលដ្ឋានរបស់គណបក្សប្រឆាំងដែលធ្វើឡើងនៅក្នុងខណ្ឌសែនសុខ រាជធានីភ្នំពេញនៅព្រឹកថ្ងៃអាទិត្យ ទី ០៦ មីនា។ ការប្រទាញប្រទង់បន្តិចបន្តួចនេះបានកើតឡើង នៅពេលដែលក្រុមយុវជនជានិស្សិត បានទទូចចូលទៅក្នុងវេទិកា និង ព្យាយាមស្រែកតាមឧឃ្ឃោសនស័ព្ទ ទាមទារឲ្យលោកកឹម សុខា បកស្រាយការពិតពាក់ព័ន្ធរឿងខ្សែសំឡេងសារសងស្នេហា ដែលគេសង្ស័យថា រវាងរូបលោក និងនារីវ័យក្មេងម្នាក់។ យ៉ាងណាក៏ដោយ បាតុភាពនេះ មិនបានបង្កឲ្យមានអំពើហិង្សាណាមួយកើតឡើងនោះទេ។
លោកកឹម សុខា អនុប្រធានគណបក្សសង្រ្គោះជាតិ នៅតែមិនចាប់អារម្មណ៍ និងមិនអើពើនឹងក្រុមយុវជនទាំងនោះឡើយ ដោយលោកបានថ្លែងសារនយោបាយទៅកាន់អ្នកគាំទ្ររបស់ខ្លួនជាធម្មតា។ ចំណែកលោកសម រង្ស៊ី ប្រធានគណបក្សសង្រ្គោះជាតិវិញ តាមរយៈវីឌីអូស្កេប (Skype) ពីក្រៅប្រទេស បានបញ្ជាក់ប្រាប់អ្នកគាំទ្រគណបក្សប្រឆាំង ថាកុំទៅខ្វាយខ្វល់នឹងរឿងអត់ប្រយោជន៍។ រឿងអត់ប្រយោជន៍នេះ ទំនងលោកសម រង្ស៊ី ចង់សំដៅទៅលើរឿងអាស្រូវស្នេហារបស់លោកកឹម សុខា ដែលត្រូវបានគេបញ្ចេញខ្សែអាត់សំឡេងជាបន្តបន្ទាប់តាមភាគនីមួយៗ ប្រៀបបីដូចជាខ្សែភាពយន្តភាគដែលគេចាក់បញ្ចាំងតាមទូរទស្សន៍។ ទាំងលោកសម រង្ស៊ី និង លោកកឹម សុខា សុទ្ធតែបានណែនាំ និង ជំរុញឲ្យសកម្មជន និង អ្នកគាំទ្ររបស់ខ្លួន កុំគិតរឿងអីផ្សេង ក្រៅតែរឿងបោះឆ្នោតនាពេលខាងមុខប៉ុណ្ណោះ។
គួរបញ្ជាក់ថា គិតទាំងថ្ងៃនេះ វាមានរយៈពេលបីថ្ងៃជាប់ៗគ្នាហើយ ដែលក្រុមយុវជនដែលអះអាងថា ខ្លួនគឺជាក្រុមនិស្សិតនៅបណ្តាសកលវិទ្យាល័យនានាក្នុងទីក្រុងភ្នំពេញ បានចេញមុខតវ៉ាទាមទារឲ្យលោកឹម សុខា បកស្រាយអំពីខ្សែអាត់សំឡេងស្នេហា។ ប៉ុន្តែការតវ៉ារបស់ពួកគេទាំងនេះ មិនមានលទ្ធផលអ្វីនោះឡើយ។ ទោះជាយ៉ាងណា ក្រុមនិស្សិត បានគូសបញ្ជាក់ថា ពួកគេនឹងនៅធ្វើការតវ៉ាបន្តទៀត រហូតទាល់តែលោកកឹម សុខា ចេញមុខបកស្រាយការពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ