មេបក្សធំៗអំពាវនាវជាបន្តបន្ទាប់ឲ្យពលរដ្ឋទៅចុះឈ្មោះបោះឆ្នោត
នៅសល់តែ១៥ថ្ងៃទៀតប៉ុណ្ណោះ ការចុះឈ្មោះបោះឆ្នោតក្នុងបញ្ជីបោះឆ្នោតថ្មីនឹងត្រូវបិទបញ្ចប់ ទាំងស្រុង ហើយពេលនេះមេដឹកនាំគណបក្សនយោបាយធំៗនៅកម្ពុជាកំពុងតែអំពាវនាវ ជាបន្តបន្ទាប់ឲ្យពលរដ្ឋដែលគ្រប់អាយុទៅចុះឈ្មោះបោះឆ្នោត។ គ.ជ.ប បញ្ជាក់ហើយថានឹងមិនមានការពន្យារពេលចុះឈ្មោះបោះឆ្នោតទេ ទោះការចុះឈ្មោះមិនគ្រប់តាមការកំណត់។
ចុះផ្សាយនៅថ្ងៃ៖
ស្តាប់ - ០២:៥៦
ទាំងលោកហ៊ុន សែន លោកសម រង្ស៊ី និងលោកកឹម សុខា ពេលនេះបានអំពាវនាវជាបន្តបន្ទាប់ដល់ពលរដ្ឋដែលគ្រប់អាយុត្រូវទៅចុះឈ្មោះបោះឆ្នោតឲ្យបានគ្រប់គ្នា ខណៈចំនួនពលរដ្ឋ ដែលទៅចុះឈ្មោះបោះឆ្នោតមានចំនួនថយចុះ ប្រកៀកប្រកើយនឹងពេលបិទបញ្ចប់ការចុះឈ្មោះបោះឆ្នោតនៅថ្ងៃទី២៩ ខែវិច្ឆកាខាងមុខ។
លោកសម រង្ស៊ី ប្រធានគណបក្សសង្រ្គោះជាតិតាមរយៈហ្វេសប៊ុករបស់លោកបានអំពាវនាវម្តងហើយម្តងទៀត ឲ្យពលរដ្ឋខ្មែរទៅចុះឈ្មោះបោះឆ្នោតឲ្យបានគ្រប់គ្នា។ លោកក៏បានសុំឲ្យអ្នកដែលបានចុះឈ្មោះរួចហើយ ជួយក្រើនរំលឹក និងជួយណែនាំអ្នកនៅជុំវិញខ្លួន ដែលមិនទាន់បានចុះឈ្មោះនៅឡើយ ឲ្យទៅចុះឈ្មោះជាបន្ទាន់ ដើម្បីសង្គ្រោះជាតិខ្មែរ។
លោកកឹម សុខាប្រធានស្តីទីគណបក្សសង្រ្គោះជាតិក៏បានផ្សាយសារជាវីដេអូក្នុងហ្វេសប៊ុកលោកអំពាវនាវដល់ពលរដ្ឋខ្មែរទាំងអស់ ដែលមានអាយុគ្រប់១៨ឆ្នាំ គិតដល់ថ្ងៃទី៤ ខែមថុនា ឆ្នាំ២០១៧ ត្រូវទៅចុះឈ្មោះឆ្នោតឲ្យបានគ្រប់គ្នា។ លោកថាទោះបីជាមានការលំបាកយ៉ាងណាក៏ដោយ ក្នុងនាមជាពលរដ្ឋគួរតែព្យាយាមឲ្យអស់លទ្ធភាព ដើម្បីទៅចុះឈ្មោះបោះឆ្នោត សម្រេចអនាគតប្រទេសជាតិ។
លោកនាយករដ្ឋមន្ត្រីហ៊ុន សែនវិញក៏ធ្លាប់បានអំពាវនាវឲ្យប្រជាពលរដ្ឋ ជាពិសេសយុវជន យុវនារី ទៅចុះឈ្មោះបោះឆ្នោតទាំងអស់គ្នា ព្រោះនេះគឺជាកាតព្វកិច្ច និងការទទួលខុសត្រូវរបស់ប្រជាពលរដ្ឋគ្រប់ៗរូបក្នុងការចុះឈ្មោះ និងបោះឆ្នោតជ្រើសរើសអ្នកដឹកនាំប្រទេសដែលខ្លួនពេញចិត្តតាមលក្ខណៈប្រជាធិបតេយ្យ។
កាលពីថ្ងៃទី១២ ខែវិច្ឆកា ប្រធានគណៈកម្មាធិការជាតិរៀបចំការបោះឆ្នោត លោកស៊ិក ប៊ុនហុក បានអំពាវនាវដល់ពលរដ្ឋខ្មែរ ដែលមិនទាន់បានចុះឈ្មោះ ប្រញាប់ទៅចុះឈ្មោះបោះឆ្នោតឲ្យបានគ្រប់គ្នា មុននឹងការចុះឈ្មោះត្រូវបិទ។ លោកប្រធាន គ.ជ.ប បន្ថែមថាការចុះបោះឆ្នោតឈ្មោះនៅក្នុងបញ្ជីបោះឆ្នោតឆ្នាំ២០១៦នេះ គឺជាលក្ខខណ្ឌចំាំបាច់ ដើម្បីបានបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០១៧ ហើយបើគ្មានឈ្មោះនៅក្នុងបញ្ជីបោះឆ្នោតទេ ពុំមានសិទ្ធិបោះឆ្នោតឡើយ។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប ធ្លាប់បានបញ្ជាក់ប្រាប់វិទ្យុបារាំងថា នឹងមិនមានការពន្យារពេលចុះឈ្មោះបោះឆ្នោតតទៅទៀតនោះទេ បើទោះបីជា អ្នកដែលមានសិទ្ធិចុះឈ្មោះបោះឆ្នោត មិនបានមកចុះឈ្មោះគ្រប់ចំនួនក៏ដោយ។ សូមបញ្ជាក់ថាគ.ជ.ប ក៏បានបន្ថែមយន្តការពិសេសមួយចំនួនទៀតដូចជាការជួលវិទ្យុនៅតាមខេត្តធ្វើការផ្សព្វផ្សាយ និងឆ្លៀតឱកាសឲ្យមានការធ្វើអត្ថាធិប្បាយទាក់ទងទៅនឹងការអំពាវនាវទៅចុះឈ្មោះបោះឆ្នោតផងដែរ សម្រាប់អ្នកអត្ថាធិប្បាយនៅក្នុងឱកាសនៃព្រះរាជពិធីបុណ្យអំទុក បណ្តែតប្រទីប សំពះព្រះខែនិងអកអំបុករយៈពេល៣ថ្ងៃខាងមុខនេះ។
យោងតាមលទ្ធផលបណ្តោះអាសន្ននៃការចុះឈ្មោះបោះឆ្នោត ដើម្បីរៀបចំបញ្ជីបោះឆ្នោតថ្មីឆ្នាំ២០១៦ ពីថ្ងៃទី០១ ខែកញ្ញា ដល់ថ្ងៃទី១៣ ខែវិច្ឆកា គឺមានពលរដ្ឋប្រមាណ៧លាននាក់ ឬត្រូវនឹង៧៣ភាគរយនៃពលរដ្ឋដែលមានសិទ្ធិបោះឆ្នោតប្រមាណ៩លាន ៦សែននាក់។ តាមទិន្នន័យចុងក្រោយបង្ហាញថាខេត្តខ្លះមានពលរដ្ឋចុះឈ្មោះតែ២៣នាក់តែប៉ុណ្ណោះក្នុងថ្ងៃទី១៣ ខែវិច្ឆកាម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ