ផ្ទុះអាវុធនៅប៉ោយប៉ែត របួស និងខូចខាតទ្រព្យសម្បត្តិមួយចំនួន
កម្មករអូសរទេះ ប្រមាណជាង១០០នាក់ នៅថ្ងៃនេះ បានបាតុកម្មតវ៉ានៅមុខការិយាល័យគយ ក្រុងប៉ោយប៉ែត។ មានការប៉ះទង្គិចរវាងកម្មករនិងសមត្ថកិច្ច ហើយអាជ្ញាធរបំផ្ទុះអាវុធ១០គ្រាប់ និងបណ្តាលឲ្យអ្នកតវ៉ា៥នាក់រងរបួស ក្នុងនោះមានម្នាក់សន្លប់ធ្ងន់។ ចំណែកសន្តិសុខម្នាក់របស់ការិយាល័យគយ របួសក្បាល។
ចុះផ្សាយនៅថ្ងៃ៖
ស្តាប់ - ០២:១០
យ៉ាងហោចណាស់ មនុស្ស៥នាក់របួសធ្ងន់និងស្រាល ដោយសារការប៉ះទង្គិចគ្នារវាងកម្មករអូសរទេះជាមួយសមត្ថកិច្ច រហូតឈានដល់ផ្ទុះអាវុធ នៅច្រកគយប៉ោយប៉ែត។ នេះបើតាមប្រភពពីកម្មករ តែអាជ្ញាធរបានច្រានចោលការលើកឡើងនេះ។
រឿងហេតុដំបូង គឺកម្មករអូសរទេះជាង១០០នាក់ បានទៅតវ៉ាដោយលើកបដា និងដុតពូក ដុតកង់ឡាន នៅមុខការិយាល័យគយ ក្រុងប៉ោយប៉ែត ហើយធ្វើឲ្យកក់ស្ទះចរាចរណ៍។ ចំណែកសមត្ថកិច្ចក៏បានចេញទៅបង្រ្កាប ដោយវាយលើស្ត្រី២នាក់ និងបុរសម្នាក់ ព្រមទាំងវាយខ្នោះទៀតផង។ បុរសអ្នកអូសរទេះម្នាក់នោះ រងរបួសធ្ងន់ និងសន្លប់ ហើយត្រូវបញ្ចូនទៅមន្ត្រីពេទ្យ។ ប៉ុន្តែដំណឹងនេះ បានកើតជាពាក្យចចាមអារ៉ាម ថាកម្មករម្នាក់នោះស្លាប់ ក៏បណ្តាលឲ្យអ្នកតវ៉ាដទៃទៀតខឹងសំបាយ៉ាងខ្លាំងចំពោះសមត្ថកិច្ចនិងមន្ត្រីគយ។ ភ្លាមនោះ ពួកគេបានប្រមូលផ្តុំគ្នា ទៅគប់ដុំថ្មលើទីស្នាក់ការគយតែម្តង។
ប្រឈមនឹងកំហឹងរបស់កម្មករយ៉ាងដូច្នេះ អាជ្ញាធរបានបាញ់កាំភ្លើងឡើង លើ ប្រមាណ១០គ្រាប់ដើម្បីគំរាមបំបែកបាតុករ។ ជាមួយគ្នានេះ នៅទីស្នាក់គយ សន្តិសុខម្នាក់របស់ការិយាល័យគយ របួលក្បាល ព្រមទាំងរថយន្ត៧គ្រឿង រងការខូចខាត ហើយកញ្ចក់អគារក៏បានបែកជាច្រើនផ្នែក ដោយសារតែការប៉ះទង្គិចនោះ។ នេះបើតាម លោក ឈួន ហៃ ប្រធានការិយាល័យគយ និងរដ្ឋាករប៉ោយប៉ែត ដែលបានបញ្ជាក់ប្រាប់វិទ្យុបារាំង។ លោកបានសម្តែងការសោកស្តាយ និងថា មិនគួរមានរឿងបែបនេះកើតឡើងសោះ។ លោក ឈួន ហៃ បញ្ជាក់ថា គ្មានរឿងអ្វីដែលមិនអាចយកមកជជែកគ្នានៅតុចរចានោះទេ។
ក៏ប៉ុន្តែប្រភពពីតំណាងកម្មករអូសរទេះ បានបញ្ជាក់ថា ប្រធានការិយាល័យគយប៉ោយប៉ែតចេះតែនិយាយបែបនោះរាល់តែដង និងយកលេសតែរហូត។ ការចរចាជាមួយមន្ត្រីគយជាច្រើនដងមកហើយ គឺពុំមានផលអ្វីជាដុំកំភួនឡើយ ហើយពេលចរចាម្តងៗ ភាគីអាជ្ញាធរសំអាងតែច្បាប់មាត្រាដែលពលរដ្ឋ មិនអាចយល់បាន។ កម្មករ បានចោទទៀតថា លោក ឈួន ហៃ បានឃប់ឃិតនឹងឈ្មួញអ្នកមានហើយច្របាច់កអ្នកអូសរទេះក្រីក្រ។
ចំណែកលោក គោ ស៊ុំសារឿត អភិបាលខេត្តបន្ទាយមានជ័យ បានឲ្យដឹងថា ប៉ូលីសកំពុងបើកការស៊ើបអង្កេតនៅឡើយ ប៉ុន្តែលោកមិនបានបញ្ជាក់ថា នឹងមានការចាប់ចង់អ្នកបង្កហេតុឬយ៉ាងនោះទេ។ ទន្ទឹមនឹងនេះ លោកអភិបាលខេត្ត បានជំរុញឲ្យភាគីទាំងអស់ចូលតុចរចាជជែកគ្នាដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ