អ្នកនាំពាក្យមហាផ្ទៃៈ ក្រៅពីច្បាប់បោះឆ្នោត មិនឃើញមានច្បាប់ណាផ្សេងដាក់ទោសអ្នកអំពាវនាវពហិការការបោះឆ្នោត
បន្ទាប់ពីបណ្តឹងរបស់គណៈកម្មាធិការជាតិរៀបចំការបោះឆ្នោត(គ.ជ.ប) ប្រឆាំងអ្នកឃោសនាមិនឲ្យប្រជាពលរដ្ឋខ្មែរទៅបោះឆ្នោត ទៅកាន់ក្រសួងមហាផ្ទៃ កាលពីសប្តាហ៍កន្លងទៅ មកដល់ថ្ងៃនេះ ក្រសួងមហាផ្ទៃនៅមិនទាន់សម្រេចយ៉ាងណានៅឡើយ។ ក្រសួងមានសមត្ថកិច្ចមួយនេះ អះអាងថា កំពុងស្ថិតនៅក្នុងស្ថានភាពពិនិត្យមើលផ្លូវច្បាប់ ខណៈដែលច្បាប់បោះឆ្នោត បានត្រឹមដាក់ពិន័យជនបង្កពី៥លានដល់២០លានរៀល ប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:២២
អ្នកនាំពាក្យក្រសួងមហាផ្ទៃ លោក ខៀវ សុភ័គ បានថ្លែងប្រាប់វិទ្យុបារាំង RFI នៅថ្ងៃនេះថា ក្រសួងមហាផ្ទៃកំពុងពិនិត្យមើលបញ្ហាបណ្តឹងរបស់ គ.ជ.ប នៅឡើយ ថាតើគួរចាត់វិធានការ ដោយរបៀបណា ខណៈច្បាប់បោះឆ្នោតបានចែងលើបញ្ហានេះរួចហើយ។
ការបញ្ជាក់របស់លោកខៀវ សុភ័គ ដូច្នេះ គឺជាការបន្ថែមនូវអ្វីដែលរដ្ឋមន្ត្រីក្រសួងមហាផ្ទៃលោក ស ខេង ថ្លែងប្រាប់សារព័ត៌មាន កាលពីម្សិលមិញថា ក្រសួងមហាផ្ទៃកំពុងតែពិនិត្យមើលទិដ្ឋភាពច្បាប់ ចំពោះអ្នក ដែលអំពាវនាវឲ្យប្រជាពលរដ្ឋធ្វើពហិការក្នុងការបោះឆ្នោត ជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ខាងមុខ។
បើតាមលោក ខៀវ សុភ័គ វាជាការពិបាកមួយ ដោយសារថា អ្នកដែលធ្វើសកម្មភាពអំពាវនាវមិនឲ្យប្រជាពលរដ្ឋទៅបោះឆ្នោត សុទ្ធសឹងជាមនុស្សដែលកំពុងរស់នៅក្រៅប្រទេស ខុសពីប្រជាពលរដ្ឋនៅក្នុងប្រទេសកម្ពុជា ដែលមកទល់ពេលនេះ លោកសង្កេតឃើញថា មិនមានប្រជាពលរដ្ឋណាម្នាក់ ហ៊ានអំពាវនាវ ឬក៏ធ្វើតាមការអំពាវនាវបែបនេះទេ ដោយសារពួគគេខ្លាចច្បាប់។
យោងតាមមាត្រា១៤២ នៃច្បាប់បោះឆ្នោត ត្រូវផាកពិន័យជាប្រាក់ ពី៥លានរៀល ទៅ២០លានរៀល ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិត រារាំងប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត។ តាមអ្នកនាំពាក្យក្រសួងមហាផ្ទៃដដែល ច្បាប់បោះឆ្នោតទំនងជានឹងយកទៅអនុវត្តប្រឆាំងជនណាដែលអំពាវនាវឲ្យធ្វើពហិការនៃការបោះឆ្នោត ប្រសិនបើមិនមានច្បាប់ផ្សេងទៀត។
សូមបញ្ជាក់ថា លោក សម រង្សី អតីតប្រធានអតីតគណបក្សសង្គ្រោះជាតិ ពីក្រៅប្រទេស បានធ្វើការអំពាវនាវម្តងហើយម្តងទៀត ដល់ពលរដ្ឋខ្មែរ កុំឲ្យទៅបោះឆ្នោតជាតិ នាខែកក្កដាខាងមុខ ដោយលើកឡើងថា ជាការបោះឆ្នោតក្លែងក្លាយ។ ចំណុចនេះ ធ្វើឲ្យគ.ជ.ប កាលពីថ្ងៃទី៨ ខែឧសភា កន្លងទៅ បានដាក់លិខិតស្នើសុំឲ្យលោក ស ខេង រដ្ឋមន្ត្រីក្រសួងមហាផ្ទៃ មានវិធានការផ្លូវច្បាប់ចំពោះការអំពាវនាវរបស់លោកសម រង្សី ខាងលើ និងអ្នកពាក់ព័ន្ធដទៃទៀត។
ផ្ទុយពីការអំពាវនាវឲ្យធ្វើពហិការការបោះឆ្នោត អ្នកគាំទ្រគណបក្សប្រជាជនកម្ពុជា ដែលកាន់អំណាច ក៏បង្កើនការអំពាវនាវដំណាលគ្នាដែរ ឲ្យប្រជាពលរដ្ឋទៅចូលរួមបោះឆ្នោត ដែលនេះ គឺជាការប្រើប្រាស់សិទ្ធិ របស់ពលរដ្ឋខ្មែរ ដែលមានចែងនៅក្នុងរដ្ឋធម្មនុញ្ញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ