អតីតបក្សសង្គ្រោះជាតិថ្កោលទោសរដ្ឋាភិបាលនិងគ.ជ.បដែលមិនអនុញ្ញាតឲ្យខ្លួនចូលរូមការបោះឆ្នោត
គណៈកម្មាការធិការជាតិរៀបចំការបោះឆ្នោត(គ.ជ.ប) បានបិទការចុះបញ្ជីគណបក្សនយោបាយហើយកាលពីល្ងាចមិញនេះ ដោយមានគណបក្សចំនួន២០បានចុះឈ្មោះចូលរួមការបោះឆ្នោតក្នុងខែកក្កដាខាងមុខ។ ភា្លមៗ អតីតបក្សសង្គ្រោះជាតិ បានចេញសេចក្តីថ្លែងការណ៍ថ្កោលទោសចំពោះរដ្ឋាភិបាលរបស់ លោកនាយករដ្ឋមន្ត្រីហ៊ុន សែន និងគ.ជ.ប ដែលមិនអនុញ្ញាតឲ្យអតីតបក្សប្រឆាំងបានចូលរួមការបោះឆ្នោតនាពេលខាងមុខ។
ចុះផ្សាយនៅថ្ងៃ៖
ស្តាប់ - ០២:០៤
តាមរយៈសេចក្តីថ្លែងការណ៍ចុះថ្ងៃទី១៤ ឧសភា អតីតគណបក្សសង្គ្រោះជាតិ បានហៅការមិនអនុញ្ញាតឲ្យអតីតបក្សប្រឆាំងចូលរួមក្នុងការបោះឆ្នោតថា ជាការដកជម្រើសរបស់ប្រជាពលរដ្ឋខ្មែរដែលជាម្ចាស់ឆ្នោត។ ដូច្នេះហើយសម្រាប់អតីតគណបក្សសង្គ្រោះជាតិ ការបោះឆ្នោតថ្ងៃទី២៩ ខែកក្កដា ឆ្នាំ២០១៨នេះ គឺជាការបោះឆ្នោតក្លែងក្លាយ មិនឆ្លុះបញ្ចាំងពីឆន្ទៈរបស់ប្រជាពលរដ្ឋខ្មែរនោះទេ។
គណៈកម្មាធិការជាតិរៀបចំការបោះឆ្នោត(គ.ជ.ប) បានបិទការទទួលពាក្យស្នើសុំចុះបញ្ចីគណបក្សកាលពីល្ងាចថ្ងៃចន្ទ ដោយមានបក្សនយោបាយចំនួន២០បានចុះបញ្ចីចូលរួមការបោះឆ្នោតក្នុងខែកក្កដា។ ប៉ុន្តែក្នុងចំណោមនេះ មិនមានសោះឡើយអតីតបក្សសង្គ្រោះជាតិ។ ចំពោះគណបក្សកាន់អំណាច ការដែលមានបក្សច្រើនបានចុះឈ្មោះបោះឆ្នោតបែបនេះគឺឆ្លុះបញ្ចាំងឲ្យឃើញថាលទ្ធិប្រជាធិបតេយ្យសេរីពហុបក្ស ពិតជាត្រូវបានអនុវត្តត្រឹមត្រូវតាមរដ្ឋធម្មនុញ្ញ ហើយសិទ្ធិនយោបាយនិងសិទ្ធិពលរដ្ឋត្រូវបានបើកទូលាយ និងមានសក្តានុពល។ នេះបើតាមការបញ្ជាក់ពីលោកសុខ ឥសាន ដែលជាអ្នកនាំពាក្យគណបក្សកាន់អំណាច។
ក៏ប៉ុន្តែសម្រាប់អតីតគណបក្សប្រឆាំងវិញ ការដែលគ្មានអតីតគណបក្សសង្គ្រោះជាតិចូលរួមការបោះឆ្នោតបែបនេះ គឺជាការសម្លាប់ប្រជាធិបតេយ្យនៅកម្ពុជាទៅវិញទេ។ អតីតគណបក្សសង្គ្រោះជាតិក៏បានអំពាវនាវឲ្យប្រជាពលរដ្ឋខ្មែរធ្វើពហិការការបោះឆ្នោតនាពេលខាងមុខនេះ។ ចំពោះអតីតគណបក្សប្រឆាំង ការមិនទៅបោះឆ្នោត គឺមានន័យថា គាំទ្រអតីតគណបក្សសង្គ្រោះជាតិក្នុងចិត្ត ហើយចង់ឲ្យអតីតគណបក្សនេះមកដឹកនាំប្រទេស ដើម្បីមានការផ្លាស់ប្តូរជាវិជ្ជមាន។
បន្ថែមលើនេះ អតីតគណបក្សសង្គ្រោះជាតិក៏បានអំពាវនាវដល់សហគមន៍អន្តរជាតិ កុំទទួលស្គាល់លទ្ធផលនៃការបោះឆ្នោត នៅថ្ងៃទី២៩កក្កដាខាងមុខ ដោយចាត់ទុកថា ការបោះឆ្នោតនោះមិនត្រឹមត្រូវ និងមិនស្របច្បាប់។ ក្រៅពីនេះ អតីតបក្សប្រឆាំងក៏បានអំពាវនាវដល់ប្រទេសជប៉ុន បញ្ឈប់ជំនួយ និងការគាំទ្រដល់គណៈកម្មាធិការជាតិរៀបចំការបោះឆ្នោត ដែលអតីតគណបក្សសង្គ្រោះជាតិចាត់ទុកថា បានបាត់បង់ឯករាជ្យភាព និងសុក្រឹតភាព មិនអាចរៀបចំដំណើរការបោះឆ្នោតឲ្យប្រព្រឹត្តទៅដោយសេរី ត្រឹមត្រូវ យុត្តិធម៌ និងជឿជាក់បានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ