មណ្ឌលព្រៃស្ពឺ៖សាងសង់អគារបន្ថែមដើម្បីដាក់មនុស្សវិកលចរិកនិងជនអនាថា
ក្រោយទទួលរងការរិះគន់ពីលោកនាយករដ្ឋមន្ត្រី ហ៊ុន សែន រួចមក មជ្ឈមណ្ឌលបណ្ដុះបណ្ដាលវិជ្ជាជីវៈព្រៃស្ពឺបានសាងសងអគារស្នាក់នៅមួយខ្នងបន្ថែមទៀតដើម្បីដាក់មនុស្សវិកលចរិកនិងជនអនាថាឲ្យនៅដាច់ដោយឡែកពីគ្នា។ បន្ថែមពីការសាងសង់អគារថ្មីនេះមជ្ឈមណ្ឌលព្រៃស្ពឺក៏បានផ្លាស់ប្ដូររបៀបធ្វើការមួយចំនួនទៀត។
ចុះផ្សាយនៅថ្ងៃ៖
ស្តាប់ - ០២:១១
អគារថ្មីដែលកំពុងតែសាងសង់នៅក្នុងមជ្ឈមណ្ឌលបណ្ដុះបណ្ដាលព្រៃស្ពឺនេះមានកំពស់ពីរជាន់និង១០បន្ទប់ ដើម្បីដាក់ជនវិកលចរិកនិងជនអនាថា ឲ្យនៅដាច់ដោយឡែកពីគ្នា ដែលពីមុនមកពីពួកគេទាំងអស់នេះរស់នៅលាយឡំជាមួយគ្នា។
លោក មាន ចាន់យ៉ាដា អ្នកនាំពាក្យសាលារាជធានីភ្នំពេញបានប្រាប់វិទ្យុបារាំងថា ការសាងសង់អគារថ្មីនេះធ្វើឡើងបន្ទាប់ពីមានការឯកភាពរួមគ្នារវាងលោក វង សូត្រ រដ្ឋមន្ត្រីក្រសួងសង្គមកិច្ច អតីតយុវជននិងយុវនីតិសម្បទា និង លោក ប៉ា សុជាតិវង្ស អភិបាលរាជធានីភ្នំពេញ។
បន្ថែមពីលើការសាងសង់អគារ ភាគីទាំងពីរក៏បានឯកភាពបញ្ជូនជនអនាថាដែលមានបងប្អូនឬអាណាព្យាបាល ឲ្យពួកគេទៅរស់នៅជួបជុំគ្នាវិញក្រោមការត្រួតពិនិត្យរបស់មន្ទីរសង្គមកិច្ចទាំង២៤រាជធានី-ខេត្ត។ ចំពោះជនអនាថាដែលគ្មានបងប្អូនពួកគេនឹងទទួលបានការបណ្ដុះបណ្ដាលវិជ្ជាជីវៈខ្នាតតូចនៅមណ្ឌលព្រៃស្ពឺផ្ទាល់តែម្ដង ដើម្បីឲ្យពួកគេទាំងនោះក្លាយជាពលរដ្ឋមានលទ្ធភាពនិងសមត្ថភាពឈានទៅប្រកបរបរដោយខ្លួនឯង។
ដោយឡែកទាក់ទងការថែទាំសុខភាពវិញនឹងមានការពង្រឹងសេវាពិនិត្យសុខភាពពោលគឺនឹងមានគ្រូពេទ្យនៅប្រចាំការជារៀងរាល់ថ្ងៃនៅមណ្ឌលព្រៃស្ពឺនេះដែលពីមុនការពិនិត្យសុខភាពធ្វើឡើងមួយសប្ដាហ៍ម្ដង។
លោក មាន ចាន់យ៉ាដា បានថ្លែងការពារថា ការងារនេះក្រសួងនិងសាលារាជធានីភ្នំពេញ បានធ្វើជាបណ្ដើៗហើយមិនមែនទើបតែធ្វើក្រោយការរិះគន់របស់លោកនាយករដ្ឋមន្ត្រី ហ៊ុន សែន ទេ ។ លោកបានគូសបញ្ជាក់ថា មជ្ឈមណ្ឌលបណ្ដុះបណ្ដាលព្រៃស្ពឺនេះមានសារៈសំខាន់ណាស់ក្នុងការប្រមូលជនអនាថាក្នុងរាជធានីភ្នំពេញយកមកអប់រំ។ ដូច្នេះមណ្ឌលព្រៃស្ពឺមិនអាចបិទទ្វារបានទេ។
សូមបញ្ជាក់ថា កាលពីដើមខែមិថុនា នាឱកាសទិវាកុមារអន្តរជាតិលោកនាយករដ្ឋមន្ត្រី ហ៊ុន សែន បានរិះគន់ខ្លាំងៗចំពោះការគ្រប់គ្រងមជ្ឈមណ្ឌលព្រៃស្ពឺដែលធ្វើឲ្យប៉ះពាល់ដល់មុខមាត់រដ្ឋាភិបាល។ លោកបានព្រមានពីលទ្ធភាពដែលអាចឈានទៅបិទមណ្ឌលព្រៃស្ពឺនេះទាំងស្រុងផង។
អង្គការលីកាដូកាលពីចុងឆ្នាំ២០១៥ បានស្នើឲ្យរដ្ឋាភិបាលបិទមណ្ឌលព្រៃស្ពឺនេះបន្ទាប់ រកឃើញថាមានបុរសមានវិបត្តិផ្លូវចិត្តម្នាក់ស្លាប់ដោយសារលង់ទឹកនិងស្រីម្នាក់ទៀតស្លាប់ដោយគ្មានការស៊ើបអង្កេតរកមូលហេតុ។លីកាដូចាត់ទុកមណ្ឌលមួយនេះថាជាកន្លែងឃុំឃាំងមនុស្សដោយមិនចាំបាច់មានដីកាពីតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ