ពន្ធនាគារពោធិ៍សាត់ពន្លឿនការសាងសង់ ខណៈចំនួនអ្នកទោសកើនឡើង
អគារថ្មីនៅមណ្ឌលកែប្រែ ៤ ក្នុងខេត្តពោធិ៍សាត់សម្រេចការសាងសង់បាន ៥០%ហើយ។ ពន្ធនាគារដែលនឹងគ្រោងដាក់ឱ្យដំណើរការនៅខែមេសាខាងមុខនេះ អាចមានលទ្ធភាពផ្ទុកអ្នកទោសចំនួន ៨០០០នាក់។ ដំណើរការសាងសង់នេះគឺនៅស្របពេលដែល មានការកើនឡើងខ្លាំងនៃចំនួនអ្នកទោសក្នុងឆ្នាំ ២០១៦ ជាហេតុបណ្តាលឲ្យពន្ធនាគារប្រឈមមុខនឹងបញ្ហាបន្ទប់ដាក់អ្នកទោស ។ តែយ៉ាងណាមន្ត្រីពន្ធនាគារ ឱ្យដឹងថា អាជ្ញាធរកំពុងបង្កើនល្បឿន ដើម្បីបញ្ចប់ការសាងសង់ក្នុងពេលឆាប់ៗនេះ។
ចុះផ្សាយនៅថ្ងៃ៖
ស្តាប់ - ០១:៤៩
មកទល់នឹងពេលនេះ អគារថ្មីនៅមណ្ឌលកែប្រែ ៤ ក្នុងខេត្តពោធិ៍សាត់ សាងសង់បានសម្រេចចំនួន ៤ អាគារហើយក្នុងគម្រោង ៨អាគារ ។ ពន្ធនាគារនេះ ជាទីតាំងមួយដែលអាចផ្តល់លទ្ធភាពគ្រប់គ្រាន់នៅក្នុងការអប់រំកែប្រែ ស្តារនិតិសប្បទា និង អំណោយផលដល់សុខភាព របស់ជនដែលជាប់ឃុំ ។ ពីព្រោះភាពចង្អៀតណែន ជាដើមចមនាំឱ្យមានការប្រព្រឹត្តល្មើសផ្សេងៗនៅក្នុងពន្ធនាគារ។ នេះបើតាមលោក សន កែវ អនុប្រធានអប់រំកែប្រែ របស់អគ្គនាយកដ្ឋានពន្ធនាគារនៃក្រសួងមហាផ្ទៃ។
ទន្ទឹមនឹងនេះ របាយការណ៍របស់ក្រសួងមហាផ្ទៃ បានឱ្យដឹងថា ចំនួនអ្នកទោសក្នុងពន្ធនាគារបានកើនឡើងជាង ២០% នៅឆ្នាំ ២០១៦ ។ ក្នុងនោះមានការកើនឡើងចំនួន ៣% នៃបទល្មើសទាំងមូល រួមជាមួយនឹងការកើនឡើង ២២,៨% នៃចំនួនអ្នកទោសដែលមានចំនួន ១ម៉ឺន ៣ពាន់ ៦៣៥ នាក់បានជាប់ពន្ធនាគារកាលពីឆ្នាំមុន, ចំណែកអ្នកទោស ៩ ៤០៨ នាក់ ត្រូវបានដោះលែង, ៧៦ នាក់បានស្លាប់ និង ៣នាក់រត់គេចខ្លួន។
ការកើនឡើងនេះគឺបណ្តាលមកពីអ្នកតវ៉ាជម្លោះដីធ្លី កម្មករនិយោជិត មិនពេញចិត្តលក្ខខណ្ឌការងារ និងក្រុម «ដែលត្រូវបានញុះញង់ដោយគណបក្សនយោបាយ និងសង្គមស៊ីវិលមួយចំនួន» ដែលរបាយការណ៍នេះហៅថា «ពួកជ្រុលនិយម» ដែលលើកអំពីបញ្ហា «ព្រំដែន ពូជសាសន៍ និងសិទ្ធិមនុស្ស» ដើម្បី «បំពុលសង្គម» ។ បន្ថែមពីលើនេះរបាយការណ៍ក៏បានបង្ហាញថា ៤០ % នៃអ្នកដែលជាប់ពន្ធនាគារក្នុងឆ្នាំ ២០១៦ គឺបណ្តាលមកពីបទល្មើសពាក់ព័ន្ធនឹងគ្រឿងញៀន ១០% ឃាតកម្ម និង ករណីប្លន់។
ក្រសួងមហាផ្ទៃបញ្ជាក់ថា អ្នកទោសចំនួន ៧ ៩៤៥ នាក់ជាប់ឃុំមុនការកាត់ទោសក្នុងនោះ ៥ ០១៤ នាក់ត្រូវបានចោទប្រកាន់ដោយព្រះរាជអាជ្ញា នៅក្នុងសំណុំរឿងដែលចៅក្រមស៊ើបសួរមិនទាន់បានបញ្ចប់ការស៊ើបអង្កេត និង ២ ៤៨១ កំពុងរង់ចាំសវនាការ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ