លោក រៀល ខេមរិន្ទ្រ បំភ្លឺពីប្រាក់ចំណូលចំណាយក្នុងការរៀបចំដំណើរចុះទៅមើលព្រំដែនកម្ពុជា-វៀតណាម
កាលពីចុងខែមករាកន្លងទៅនេះ លោក រៀល ខេមរិន្ទ្រ តំណាងរាស្ត្រគណបក្សសង្គ្រោះជាតិ បានផ្ញើលិខិតមួយទៅអង្គភាពប្រឆាំងអំពើពុករលួយ ACU ដើម្បីបំភ្លឺពីប្រាក់ចំណូលនិងចំណាយ នៅក្នុងការរៀបចំដំណើរទៅមើលបង្គោលព្រំដែនកម្ពុជា វៀតណាម។ សូមរំលឹកថា លោក រៀល ខេមរិន្ទ្រ បានទទួលរងការចោទប្រកាន់ថាបានកេងប្រវញ្ចប្រាក់ ចំនួន៥ម៉ឺន៥ពាន់ដុល្លារ ពីការរៀបចំដំណើរទៅមើលបង្គោលព្រំដែន កាលពីខែកក្កដា ឆ្នាំ២០១៥កន្លងទៅ។ ការចោទប្រកាន់នេះ ត្រូវបានលោក រៀល ខេមរិន្ទ្រ បដិសេធ ដោយចាត់ទុកថា ជាអំពើអយុត្តិធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
លិខិតបំភ្លឺរបស់លោក រៀល ខេមរិន្ទ្រ តំណាងរាស្ត្រគណបក្សសង្គ្រោះជាតិ ចុះថ្ងៃទី២០មករា ឲ្យដឹងថា លោកបានចំណាយប្រាក់ផ្ទាល់ខ្លួន និងទទួលថវិកាឧបត្ថម្ភពីសំណាក់អ្នកឧបត្ថម្ភនៅប្រទេសអាមេរិក បារាំង និងក្រុមអ្នករត់តាក់ស៊ី សរុបទាំងអស់ចំនួន២ម៉ឺន៧៥០ដុល្លារ។ ក្នុងចំណោមប្រាក់សរុប២ម៉ឺន៧៥០ដុល្លារនេះ លោកបានចំណាយអស់២ម៉ឺន៧៤០ដុល្លារ សម្រាប់ដំណើរចុះទៅពិនិត្យបង្គោលព្រំដែនកម្ពុជាវៀតណាម កាលពីខែកក្កដា ឆ្នាំ២០១៥។ ផ្អែកតាមបញ្ជីចំណូលចំណាយនេះ មានប្រាក់នៅសល់តែ១០ដុល្លារប៉ុណ្ណោះ។
សូមរំលឹកជូនថា កាលពីចុងខែកក្កដាកន្លងទៅ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានស្វែងរកការបំភ្លឺពីលោក រៀល ខេមរិន្ទ្រ ចំពោះពាក្យបណ្ដឹងដែលចោទប្រកាន់ថា លោក រៀល ខេមរិន្ទ្រ បានកេងប្រវ័ញ្ចប្រាក់យ៉ាងហោចណាស់៥ម៉ឺន៥ពាន់ដុល្លារ នៅក្នុងការរៀបចំដំណើរចុះទៅពិនិត្យបង្គោលព្រំដែនកម្ពុជាវៀតណាម នៅខេត្តស្វាយរៀង នៅថ្ងៃទី១៩ខែកក្កដាឆ្នាំ២០១៥កន្លងទៅ។
បន្ទាប់ពីបានទទួលលិខិតរបស់ ACU តំណាងរាស្ត្របក្សប្រឆាំង លោក រៀល ខេមរិន្ទ្រ បានផ្ញើលិខិតទៅ ACU វិញនៅថ្ងៃទី១៣ខែសីហាឆ្នាំ២០១៥។ លោក រៀល ខេមរិន្ទ្រ គូសបញ្ជាក់នៅក្នុងលិខិតនោះថា លោកមិនបានទទួលប្រាក់ ឬកេងប្រវ័ញ្ចប្រាក់ក្នុងចំនួនរាប់ម៉ឺនដុល្លារ ដូចការចោទប្រកាន់នោះទេ។ បើតាមតំណាងរាស្ត្របក្សប្រឆាំងរូបនេះ ការចោទប្រកាន់ដូច្នេះ គឺជាការប្រឌិត ក្នុងចេតនាទុច្ចរិតបង្ខូចកេរ្តិ៍ឈ្មោះនិងកិត្តិយសរបស់លោក។
ក្រៅពីបដិសេធការចោទប្រកាន់និងបំភ្លឺដោយសង្ខេបពីការប្រើប្រាស់ប្រាក់ លោក រៀល ខេមរិន្ទ្រ បានស្នើឲ្យអង្គភាពប្រឆាំងអំពើពុករលួយ ស្វែងរកអ្នកប្ដឹង ដែលមានចេតនាមួលបង្កាច់បង្ខូចកិត្តិយសរបស់លោក ដើម្បីចាត់វិធានការតាមនីតិវិធីច្បាប់ផងដែរ។
ប៉ុន្តែយ៉ាងណាក៏ដោយ នៅក្នុងលិខិតបំភ្លឺនៅថ្ងៃ១៣ខែសីហាឆ្នាំ២០១៥របស់លោក រៀល ខេមរិន្ទ្រ នោះ មិនបានភ្ជាប់បញ្ជីចំណូលចំណាយលម្អិតជូនទៅអង្គភាពប្រឆាំងអំពើពុករលួយឡើយ។ អង្គភាពប្រឆាំងអំពើពុករលួយ បានសរសេរលិខិតមួយទៀតទៅលោករៀល ខេមរិន្ទ្រ ចុះថ្ងៃទី០៨កញ្ញាឆ្នាំ២០១៥ សុំមើលបញ្ជីចំណូលចំណាយទាំងអស់ ដើម្បីបញ្ជាក់ពីភាពស្មោះត្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ