សង្គមស៊ីវិលថា ខេត្តព្រះសីហនុមានភាពល្អប្រសើរតែផ្នែកបរិស្ថានប៉ុណ្ណោះ ក្រោយបទបញ្ជារបស់ប្រមុខរដ្ឋាភិបាល
មួយខែក្រោយប្រមុខរដ្ឋាភិបាល លោក ហ៊ុន សែន បញ្ជាឲ្យស្ដារមុខមាត់ខេត្តព្រះសីហនុមន្ត្រីអង្គការសង្គមស៊ីវិលប្រចាំខេត្តនេះកត់សម្គាល់ថា ស្ថានភាពខេត្តព្រះសីហនុមានភាពល្អប្រសើរតែផ្នែកបរិស្ថានប៉ុណ្ណោះ។ បរិស្ថានដែលពេលនេះ អាជ្ញាធរពាក់ព័ន្ធរួមគ្នាបញ្ជៀសការបង្ហូរទឹកស្អុយចូលសមុទ្រ ដោយជំនួសមកវិញនូវការបង្កើតកន្លែងចម្រោះទឹកសំអុយ។ តែអាជ្ញាធរអះអាងថា ស្ថានភាពទូទៅមានភាពល្អប្រសើរស្ទើរតែទាំងស្រុង។
ចុះផ្សាយនៅថ្ងៃ៖
ស្តាប់ - ០១:៤៩
លោក សុខ សុខុម ប្រធានអង្គការស្រាវជ្រាវជាតិកម្ពុជា ប្រចាំខេត្តព្រះសីហនុបានថ្លែងប្រាប់វិទ្យុបារាំងអន្តរជាតិនៅថ្ងៃចន្ទនេះថា បើទោះជាមានភាពល្អប្រសើរផ្នែកបរិស្ថាននិងសណ្ដាប់ធ្នាប់សាធារណៈយ៉ាងណាក៏ដោយ តែសកម្មភាពចាក់ដីលុបសមុទ្រនៅតែបន្តកើតមានដដែលដូចជានៅឆ្នេរព្រែកត្រែង ឆ្នេរពយកំពេញជាដើម។
ទោះអាជ្ញាធរពាក់ព័ន្ធប្រឹងស្ដារមុខមាត់ខេត្តព្រះសីហនុទៅតាមបទបញ្ជារបស់ប្រមុខរដ្ឋាភិបាលលោក ហ៊ុន សែន លោក សុខ សុខុម ឲ្យដឹងថា ភ្ញៀវទេសចរមិនឃើញមានការកើនឡើងទេ ទាំងភ្ញៀវខ្មែរនិងអឺរ៉ុប ខណៈវត្តមានជនជាតិចិននៅក្នុងខេត្តនេះនៅតែនាំមុខ។
លទ្ធភាពអន្ទងចិត្តមហាជនមកលេងក្នុងខេត្តព្រះសីហនុបាន គឺពឹងផ្អែកទៅលើការស្ដារមុខមាត់ទាំងស្រុងដោយគេមិនអាចធ្វើដោយអន្លើបានឡើយ។ ពីខេត្តព្រះសីហនុ លោក យន្ត មីន អភិបាលខេត្តបានថ្លែងដោយខ្លីថា ខេត្តព្រះសីហនុបានប្រែប្រួលមុខមាត់ច្រើនហើយ។ ប្រែមុខមាត់តាមរយៈវិធានការ ត្រួតពិនិត្យច្បាប់ចរាចរណ៍ផ្លូវគោកនិងផ្លូវទឹកឡើងវិញ លុបបំបាត់ឲ្យបាននូវរាល់ការបើកបរ ដោយសេពគ្រឿងស្រវឹង និងគ្រឿងញៀន ទប់ស្កាត់ជនខិលខូច ដែលប្រើប្រាស់អាវុធនិងជាតិផ្ទុះខុសច្បាប់ ពិនិត្យរាល់រថយន្តដឹកទំនិញ ដែលដឹកលើសទម្ងន់ នាំឲ្យខូចផ្លូវ ស្ទះចរាចរណ៍ក្នុងក្រុង និងទីប្រជុំជន។
គួររំឭកថា លោកនាយករដ្ឋមន្ត្រី ហ៊ុន សែន នៅក្នុងឱកាសបុណ្យសមុទ្រលើកទី៧ក្នុងខេត្តកោះកុងកាលពីចុងខែធ្នូឆ្នាំ២០១៨ បានចេញបញ្ជាផ្ទាល់មាត់ឲ្យអាជ្ញាធរខេត្តព្រះសីហនុស្តារមុខមាត់ខេត្តនេះឡើងវិញ។ ខេត្តព្រះសីហនុ ដែលធ្លាប់តែមានមនុស្សម្នាសម្រុកទៅលេងកំសាន្តក្នុងឱកាសបុណ្យជាតិបែរជាស្ងាត់ ដែលភាពស្ងាត់នេះ ត្រូវបានគេទាញភ្ជាប់នឹងវត្តមានជនជាតិចិន ដែលកំពុងរកស៊ីនិងរស់នៅក្នុងខេត្តព្រះសីហនុ។ ប៉ុន្តែសម្រាប់លោកនាយករដ្ឋមន្ត្រី វាគ្រាន់តែជាផ្នែកមួយប៉ុណ្ណោះ ពោល គឺការធ្លាក់ចុះនេះក៏ដោយសារតែប្រជាពលរដ្ឋកម្ពុជាមានជម្រើសច្រើនក្នុងការទៅលេងកម្សាន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ