អាជ្ញាធរ៖ ការរៃអង្គាសប្រាក់សម្រាប់ទូរទស្សន៍ CNRP ប៉ះពាល់ដល់សណ្ដាប់ធ្នាប់សាធារណៈ
ការប្រមូលវិភាគទានទ្រទ្រង់ការបង្កើតស្ថានីយ៍ទូរទស្សន៍ព្រះអាទិត្យ បង្កផលប៉ះពាល់ដល់សណ្ដាប់ធ្នាប់សាធារណៈ។ នេះគឺជាការអះអាងរបស់អភិបាលរងរាជធានីភ្នំពេញ នៅក្នុងលិខិតចុះថ្ងៃទី០៣សីហា ផ្ញើជូនប្រធានគណៈកម្មាធិការប្រតិបត្តិគណបក្សសង្គ្រោះជាតិប្រចាំរាជធានីភ្នំពេញ។ នៅក្នុងលិខិតដដែលនេះ អាជ្ញាធររាជធានីភ្នំពេញ បានស្នើឲ្យគណបក្សសង្គ្រោះជាតិ រៀបចំការប្រមូលវិភាគទាននេះ នៅតាមទីស្នាក់ការ ឬទីតាំងឯកជនរបស់គណបក្សសង្គ្រោះជាតិវិញ។
ចុះផ្សាយនៅថ្ងៃ៖
ស្តាប់ - ០២:០៨
តាមរយៈលិខិតចុះថ្ងៃទី០៣ខែសីហា សាលារាជធានីភ្នំពេញបានលើកឡើងពីសកម្មភាពប្រមូលវិភាគទានរបស់គណបក្សប្រឆាំង ដើម្បីទ្រទ្រង់ការបង្កើតស្ថានីយ៍ទូរទស្សន៍ព្រះអាទិត្យ។ អស់រយៈពេលជាងមួយខែកន្លងមកនេះ សាលារាជធានីភ្នំពេញសង្កេតឃើញថា គណបក្សសង្គ្រោះជាតិបានរៀបចំឲ្យមានការប្រមូលវិភាគទាន នៅតាមទីតាំងសាធារណៈមួយចំនួន ដោយមិនមានការសុំច្បាប់ពីអាជ្ញាធរមូលដ្ឋាន។ សកម្មភាពនេះត្រូវបានអាជ្ញាធរក្រុងអះអាងថា បានបណ្ដាលឲ្យប៉ះពាល់ និងបាត់បង់របៀបរៀបរយសណ្ដាប់ធ្នាប់សាធារណៈក្នុងរាជធានីភ្នំពេញ។ យោងតាមមូលហេតុដូច្នេះ សាលារាជធានីភ្នំពេញបានស្នើឲ្យគណបក្សសង្គ្រោះជាតិ រៀបចំការប្រមូលវិភាគទាននេះ នៅតាមទីស្នាក់ការ ឬទីតាំងឯកជនរបស់គណបក្សសង្គ្រោះជាតិវិញ។
ទាក់ទងនឹងការប្រមូលវិភាគទានសម្រាប់ទូរទស្សន៍ព្រះអាទិត្យនេះ លោក អ៊ូ ច័ន្ទឬទ្ធិ មន្ដ្រីជាន់ខ្ពស់គណបក្សប្រឆាំង បានឲ្យដឹងថា គណបក្សនឹងរៀបចំធ្វើនៅទីស្នាក់ការនិងទីតាំងឯកជនរបស់ខ្លួនវិញ លែងធ្វើនៅតាមទីសាធារណៈហើយ។
ប៉ុន្តែសម្រាប់លោក អ៊ូ ច័ន្ទឬទ្ធិ ការអះអាង និងសំណើរបស់អាជ្ញាធរក្រុងមិនឲ្យរៃអង្គាសប្រាក់នៅតាមទីសាធារណៈ គឺមិនត្រឹមត្រូវទេ។ មិនត្រឹមត្រូវ ព្រោះបើតាមយោបល់លោក ការរៃអង្គាសប្រាក់មិនប៉ះពាល់អ្វីដល់សណ្ដាប់ធ្នាប់សាធារណៈនោះឡើយ។ បើតាមលោក អ៊ូ ច័ន្ទឬទ្ធិ នៅប្រទេសផ្សេង ការរៃអង្គាសប្រាក់តាមទីសាធារណៈ មិនចាំបាច់ត្រូវការសុំច្បាប់ពីអាជ្ញាធរឡើយ។ ប្លែកតែនៅស្រុកខ្មែរ ដែលជាទម្លាប់ សកម្មភាពគ្រប់សព្វបែបយ៉ាង ត្រូវតែឆ្លងកាត់ការសុំច្បាប់ពីអាជ្ញាធរសិនទើបអាចធ្វើបាន។ នេះបើតាមលោកអ៊ូ ច័ន្ទឬទ្ធិ។
គួរជម្រាបជូនផងដែរថា មូលនិធិទ្រទ្រង់គម្រោងទូរទស្សន៍ព្រះអាទិត្យរបស់គណបក្សសង្គ្រោះជាតិ បានកើនដល់ប្រហែល៤៥ម៉ឺនដុល្លារហើយ គិតត្រឹមដើមខែសីហានេះ។ បើតាមមន្ដ្រីជាន់ខ្ពស់នៃគណបក្សនេះ ការទិញដីនិងតម្លើងអង់តែន នឹងត្រូវធ្វើឡើងនៅក្នុងខែសីហានេះតែម្ដង ដើម្បីអាចចាប់ផ្ដើមផ្សាយជំហានទី១ ឲ្យបានមុនដំណាច់ឆ្នាំ២០១៥ សម្រាប់ទីក្រុងភ្នំពេញ និងតំបន់ជុំវិញទីក្រុងភ្នំពេញ។ ចំពោះខេត្តក្រុងនានា គណបក្សនេះនឹងពង្រីកការផ្សាយបន្តបន្ទាប់ទៀតនៅពេលក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ