អង្គការWWF: វត្តមានសត្វខ្លាធំជាប្រភពចំណូលរាប់លានដុល្លារពីទេសចរណ៍ធម្មជាតិ
លោកនាយករដ្ឋមន្ត្រី ហ៊ុន សែន បានសម្តែងនូវការគាំទ្រដល់អង្គការការពារបរិស្ថាននិងសត្វព្រៃនានា ក្នុងការបង្កើនឲ្យមានចំនួនសត្វខ្លាធំ កាន់តែច្រើននៅក្នុងប្រទេសកម្ពុជា។ ការឯកភាពនេះ បានធ្វើឡើងបន្ទាប់ពីមានការស្នើសុំពីសំណាក់អង្គការការពារអភិរក្សសត្វព្រៃ ក្នុងឱកាសនៃវេទិកាជាតិលើកទី២ស្តីពី«ការការពារ និងអភិរក្សធនធានធម្មជាតិ»នៅព្រឹកថ្ងៃអង្គារនេះ នៅវិមានសន្តិភាព។
ចុះផ្សាយនៅថ្ងៃ៖
ស្តាប់ - ០២:២៥
នៅចំពោះមុខមន្ត្រីរដ្ឋាភិបាល អង្គការសង្គមស៊ីវិល ប្រជាសហគមន៍ និងអង្គទូតនានាចំនួនជាង៧០០នាក់ លោកនាយករដ្ឋមន្ត្រីហ៊ុន សែន បានថ្លែងថាលោកមិនមានការស្ទាក់ស្ទើរចំពោះការគាំទ្រឲ្យមានវត្តមានសត្វខ្លាធំបន្ថែមទៀតនៅក្នុងប្រទេសកម្ពុជា។ លោកនាយករដ្ឋមន្ត្រីបានប្រាប់ទៅក្រសួងបរិស្ថានឲ្យធ្វើការងារនេះជាមួយនឹងអង្គការអភិរក្សសត្វព្រៃ អំពីលទ្ធភាពនៃការនាំចូលពូជខ្លាធំ ការបង្កាត់ពូជនិងទីតាំងដែលត្រូវដាក់សត្វខ្លាផងដែរ។
ការលើកឡើងរបស់លោកហ៊ុន សែន គឺជាការឆ្លើយតបទៅនឹងអង្គការ WWF Cambodia ដែលបានស្នើដោយផ្ទាល់មាត់ស្តីពីគំរោងស្តារឡើងវិញនូវពូជខ្លាធំនៅក្នុងដែនជំរកសត្វព្រៃស្រែពកក្នុងខេត្តរតនៈគីរី។ លោក សេង ទៀក ប្រធានអង្គការ WWF Cambodia តំណាងឲ្យអង្គការក្រៅរដ្ឋាភិបាលអភិរក្សសត្វព្រៃចំនួន៧ បានលើកឡើងនៅក្នុងអង្គប្រជុំកាលពីព្រឹកមិញដែរថាបញ្ហាខ្លាធំនេះ បានក្លាយទៅជាចំណូលសេដ្ឋកិច្ចទេសចរណ៍ដ៏ធំនៅលើពិភពលោក។
លោកសេង ទៀក ពន្យល់ថាវិស័យទេសចរណ៍ធម្មជាតិ តាមរយៈទេសចរណ៍មើលសត្វព្រៃ បានផ្តល់ចំណូលរាប់លានដុលា្លរ និងបង្កើនការងាររាប់ពាន់កន្លែងដល់សហគមន៍មូលដ្ឋាន។
លោកថាតំបន់ភាគឥសាននៃប្រទេសកម្ពុជាមានលក្ខណៈដ៏អំណោយផលល្អប្រសើរ ដោយ រដ្ឋាភិបាលបានកំណត់ថាជាប៉ូលទេសចរណ៍ដែលមានសក្តានុពលសម្រាប់អភិវឌ្ឍទេសចរណ៍មើលសត្វព្រៃនៅក្នុងតំបន់អាស៊ីភាគអគ្នេយ៍។
សូមបញ្ជាក់ថាសត្វខ្លាធំ នៅលើពិភពលោកត្រូវគេរកឃើញថាមានប្រហែលជា៤ពាន់ក្បាល ក្នុងនោះនៅប្រទេសកម្ពុជាខ្លាធំត្រូវគេសន្និដ្ឋានថានៅសល់ប្រមាណជា៣០ក្បាលនៅក្នុងតំបន់ព្រៃធម្មជាតិ។ ហេតុដូច្នេះ កាលពីពេលថ្មីៗនេះ កម្ពុជាបានត្រៀមនាំចូលនូវពូជខ្លាធំប្រមាណជិត១០ក្បាលបន្ថែមទៀតដើម្បីបង្កើនចំនួនខ្លាធំកាន់តែច្រើននៅក្នុងព្រៃធម្មជាតិ។ ជាការកត់សម្គាល់បន្ទាប់ពីសត្វព្រៃវិលត្រលប់ចូលមកប្រទេសកម្ពុជាវិញក្រោយសង្គ្រាមក្នុងនោះមានខ្លាធំផងដែរ សត្វទាំងនោះបាននិងកំពុងប្រឈមនឹងការវិនាសទៅវិញពីមួយថ្ងៃទៅមួយថ្ងៃ ដោយសារការប្រម៉ាញ់ ការដាក់អន្ទាក់ធ្វើអាជីវកម្ម សម្រាប់ធ្វើអាហារ និងធ្វើថ្នាំសង្កូវ។ លើសពីនេះ វិធានការទប់ស្កាត់ ការសំលាប់និងធ្វើអាជីវកម្មសត្វព្រៃកន្លងមកហាក់ដូចជាមិនសូវមានប្រសិទ្ធភាពខ្ពស់នៅឡើយ ជាហេតុធ្វើឲ្យសត្វព្រៃកាន់តែវិនាសហិនហោចគួរឲ្យសោកស្តាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ