សំណុំរឿងក្បត់ជាតិៈ លោកហ៊ុន សែន និងលោកសម រង្ស៊ី ចោទប្រកាន់គ្នាទៅវិញទៅមក
បន្ទាប់ពីនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការដ្ឋាននគរបាលជាតិ បានដាក់ពាក្យបណ្តឹងទៅកាន់សាលាដំបូងរាជធានីភ្នំពេញ ចោទប្រកាន់លោកសម រង្ស៊ី ពីបទ «ក្បត់ជាតិ ឃុបឃិតចង់កាត់ទឹកដីឲ្យវៀតណាម» លោកសម រង្ស៊ី បានចេញប្រតិកម្មតបវិញភ្លាមថា លោកហ៊ុន សែន កំពុងតែដើរតាមគន្លងរបស់ប៉ុល ពត ដែលរកលេសគ្រប់បែបយ៉ាងចោទគេឯងថា ជាជនក្បត់ជាតិ។ លោកសម រង្ស៊ី បញ្ជាក់ថា ការពិតទៅ លោកហ៊ុន សែន ទេ ដែលជាជនក្បត់ជាតិ កាត់ដីឲ្យវៀតណាមនោះ។ យ៉ាងណាមិញ អ្នកវិភាគបញ្ហាសង្គម និងនយោបាយ បានលើកឡើងថា ការចោទប្រកាន់គ្នារបស់អ្នកនយោបាយខ្មែរបែបនេះ នាំតែធ្វើឲ្យប្រទេសវៀតណាម សើចចំអកទៅវិញទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
តាមរយៈសារបង្ហោះលើបណ្តាញសង្គមហ្វេសប៊ុក និងប្រព័ន្ធផ្សព្វផ្សាយមួយចំនួនទៀត លោកសម រង្ស៊ី អតីតប្រធានអតីតបក្សប្រឆាំង និងជាប្រធានចលនាសង្គ្រោះជាតិ បានលើកឡើងថា «លោកហ៊ុន សែន កំពុងរកលេសគ្រប់បែបយ៉ាង ចោទប្រកាន់ លោក កឹម សុខា និងរូបលោក ដើម្បីកម្ចាត់អ្នកទិតៀនទាំងអស់ ដែលហ៊ានប្រឆាំងគាត់។ ហើយមិនយូរទេ លោកហ៊ុន សែន នឹងចោទប្រកាន់ថែមទៀតថា លោក កឹម សុខា និងលោក ជា "ជនក្បត់" ដែលធ្វើការឲ្យប្រទេសអាល្លឺម៉ង់ ពេលណាគាត់ដឹងថាកម្មវិធីនយោបាយរបស់គណបក្សសង្គ្រោះជាតិ បានរៀបចំឡើងដោយមានការផ្គត់ផ្គង់ ពីអង្គការអាល្លឺម៉ង់២ គឺ មូលនិធិ Konrad Adenauer និងមូលនិធិ Friedrich Naumann។»
ឆ្លើយតបនឹងបទចោទនេះ លោកសម រង្ស៊ី ក៏និយាយវិញថា «លោក ហ៊ុន សែន ជាជនក្បត់ជាតិ ដែលបានកាត់ទឹកដីខ្មែរឲ្យទៅប្រទេសវៀតណាម យ៉ាងជាក់ស្តែង មិនអាចប្រកែកបាន តាមរយៈសន្ធិសញ្ញាព្រំដែន ដែលពួកអាយ៉ងយួន បានចុះហត្ថលេខាឲ្យគេ ក្នុងទសវត្សរ៍ឆ្នាំ ១៩៨០។ »
គួរជម្រាបជូនថា កាលពីថ្ងៃទី ១៤មីនា នាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃអគ្គស្នងការដ្ឋាននគរបាលជាតិ បានដាក់ពាក្យបណ្តឹងប្តឹងលោក សម រង្ស៊ី ពីបទ «អំពើក្បត់ជាតិ ឃុបឃិតកាត់ទឹកដីឲ្យជនបរទេស» ដោយយោងទៅលើវីដេអូតាមបណ្តាញហ្វេសប៊ុក ដែលបើតាមរដ្ឋាភិបាល វាបង្ហាញពីការចុះកិច្ចព្រមព្រៀងកាត់ទឹកដីកម្ពុជានៅភាគឦសាន ទៅឲ្យជនជាតិភាគតិចម៉ុងតាញ៉ា។
ប៉ុន្តែកន្លងមក លោកសម រង្ស៊ី បានបដិសេធ លោកមិនបានចុះហត្ថលេខាកាត់ដីឲ្យទៅវៀតណាមឡើយ ហើយឯកសារដែលលោកចុះហត្ថលេខាជាមួយលោក Kok Ksor មេដឹកនាំចលនាម៉ុងតាញ៉ា នៅឆ្នាំ២០១៣នោះ គឺមានខ្លឹមសារចង់ឲ្យមានការទទួលស្គាល់សិទ្ធិស្របច្បាប់របស់ជនជាតិភាគតិចម៉ុងតាញ៉ា ដែលរស់នៅខេត្តភាគឦសានប្រទេសកម្ពុជា ដូចជាខេត្តមណ្ឌលគិរី រតនគិរី ក្រចេះ និងស្ទឹងត្រែង តែប៉ុណ្ណោះ។ លោកនាយករដ្ឋមន្ត្រីហ៊ុន សែន បានបញ្ជាក់ថា លោកនឹងយកបញ្ហានេះ ទៅសាកសួរនាយករដ្ឋមន្ត្រីវៀតណាមតែម្តង ក្នុងជំនួបអាស៊ាន-អូស្ត្រាលី នៅសប្តាហ៍នេះ។
យ៉ាងណាក៏ដោយ ក្រោយការដាក់ពាក្យបណ្តឹងនេះ និងបើទោះបីជាមិនទាន់មានការកាត់ក្តីបែបណាពីតុលាការក៏ដោយ ក៏ក្រសួងស្ថាប័ននានា និងថ្នាក់ដឹកនាំតាមសមាគមខ្លះ ដែលគាំទ្ររដ្ឋាភិបាល បាននាំគ្នាចេញញ្ញត្តិ ឬ សេចក្តីថ្លែងការណ៍យ៉ាងព្រោងព្រាត នៅថ្ងៃទី ១៦មីនានេះ ប្រកាសថ្កោលទោសលោកសម រង្ស៊ី ថាជាជនក្បត់ជាតិ។
លោកបណ្ឌិត មាស នី អ្នកវិភាគបញ្ហាសង្គម និងនយោបាយ បានលើកឡើងថា ការចោទគ្នារបស់អ្នកនយោបាយខ្មែរដែលគ្មានភាពជាក់លាក់របៀបនេះ នាំតែធ្វើឲ្យប្រទេសវៀតណាមសើចចំអកទៅវិញទេ។ ម្យ៉ាងទៀត លោកមាស នី បានមើលឃើញថា ស្ទើរតែជាទម្លាប់ទៅហើយ ដែលមុនពេលបោះឆ្នោត អ្នកនយោបាយ តែងតែនាំគ្នាធ្វើប្រជាភិថុត ឬ នាំគ្នាធ្វើការឃោសនាពីបក្សរបស់លោកតាមរយៈរូបភាពបែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ