កម្ពុជា

សហចៅក្រមស៊ើបអង្កេតពន្យល់បន្ថែមពីការលើកលែងការចោទ អ៊ឹម ចែម

សហចៅក្រមស៊ើបអង្កេត នៃសាលាក្តីខ្មែរក្រហម នៅថ្ងៃទី១០ ខែកក្កដានេះ បានចេញសេចក្តីសំអាងហេតុសម្រាប់ដីការដំណោះស្រាយ ដែលបានចេញកាលពីថ្ងៃទី២២ខែកុម្ភៈឆ្នាំ២០១៧ ដោយបានលើកលែងការចោទប្រកាន់លើ អ៊ឹម ចែម ដោយសារមិនមានយុត្តាធិការបុគ្គលគ្រប់គ្រាន់។ ការលើកលែងនេះ បានធ្វើឲ្យសំណុំរឿង០០៤ ដែលស្ថិតក្រោមការស៊ើបអង្កេតរបស់សហចៅក្រមស៊ើបអង្កេតនៅសល់តែ២រូបប៉ុណ្ណោះ។

ចុះផ្សាយនៅថ្ងៃ៖ 10/07/2017 - 13:46

ដោយ៖ ញឹម សុផល

ផ្សាយពាណិជ្ជកម្ម

នៅក្នុងសេចក្តីប្រកាសព័ត៌មានរបស់ខ្លួនដែលមានកំរាស់៧ទំព័រ សហចៅក្រមស៊ើបអង្កេតនៃអង្គជំនុំជម្រះសាលាក្តីខ្មែរក្រហម បានលើកឡើងពីចំណុចពិចារណាមួយចំនួន ក្នុងនោះមាន យុត្តាធិការបុគ្គលនិងជំហររបស់សាលាក្តីខ្មែរក្រហម នៅក្នុងប្រព័ន្ធច្បាប់កម្ពុជា គោលការណ៍ច្បាប់ព្រហ្មទណ្ឌ លក្ខណៈវិនិច្ឆ័យក្នុងការអនុវត្តឆន្ទានុសិទ្ធិ-ការធ្វើសេចក្តីសម្រេចនៅក្នុងរចនាសម្ព័ន្ធនៃរបបកម្ពុជាប្រជាធិបតេយ្យ ការពិចារណាអំពីភស្តុតាង-របាយការណ៍ឆ្នាំ១៩៩៧ និង១៩៩៨ របស់មជ្ឈមណ្ឌលឯកសារកម្ពុជា និងរបាយការណ៍ឆ្នាំ១៩៨៤ របស់រដ្ឋាភិបាល។

នៅក្នុងសេចក្តីសន្និដ្ឋានលើយុត្តាធិការបុគ្គល សហចៅក្រមស៊ើបអង្កេតបានធ្វើការសន្និដ្ឋានថា អ៊ឹម ចែម ស្ថិតនៅក្រៅយុត្តាធិការបុគ្គលរបស់សាលាក្តីខ្មែរក្រហម គឺទី១ ដោយបានពិចារណាលើភ័ស្តុតាងពាក់ព័ន្ធនឹងទីតាំងឧក្រិដ្ឋកម្មដែលគាត់ត្រូវបានដាក់ឲ្យស្ថិតក្រោមការពិនិត្យ។ និងទី២ សូម្បីតែពិចារណាលើភ័ស្តុតាងពាក់ព័ន្ធនឹងការចោទប្រកាន់ផ្សេងទៀត ដែលគាត់មិនត្រូវបានដាក់ឲ្យស្ថិតក្រោមការពិនិត្យក៏ដោយ ក៏អ៊ឹម ចែម នៅតែស្ថិតនៅក្រៅយុត្តាធិការរបស់តុលាការដដែល។

ការសន្និដ្ឋានរបស់សហចៅក្រមស៊ើបអង្កេត បញ្ជាក់ថា អ៊ឹម ចែម មិនមែនជាមេដឹកនាំជាន់ខ្ពស់ ហើយក៏មិនស្ថិតនៅក្នុងចំណោមជនដែលទទួលខុសត្រូវខ្ពស់បំផុតនោះទេ ដោយសេចក្តីប្រកាសលើកឡើងថាគ្មានភ័ស្តុតាងដែលគាំទ្រដល់ការសន្និដ្ឋានខាងលើ បើទោះបីជាបានពិចារណាទៅដល់តួនាទីរបស់គាត់នៅក្នុងឋានានុក្រមរបស់កម្ពុជាប្រជាធិបតេយ្យ ឬក៏ភាពធ្ងន់ធ្ងរនៃការប្រព្រឹត្តិរបស់គាត់ដែលត្រូវចោទប្រកាន់ដែរ។

សូមបញ្ជាក់ថាអ៊ឹម ចែម គឺជាជនសង្ស័យមួយរូប ក្នុងចំណោមជនសង្ស័យចំនួន៣រូប ដែលសាលាក្តីខ្មែរក្រហមបានចាត់បញ្ចូលទៅក្នុងសំណុំរឿង០០៤។ អ៊ឹម ចែម ត្រូវបានដាក់ឲ្យស្ថិតក្រោមការត្រួតពិនិត្យដោយកំបាំងមុខ កាលពីថ្ងៃទី៣ខែមីនាឆ្នាំ២០១៥។ក្រោយមក នៅថ្ងៃទី២២ខែកុម្ភៈ ឆ្នាំ២០១៧ តុលាការ បានលើកលែងការចោទប្រកាន់ រូបគាត់ ដោយហេតុថាមិនមានយុត្តាធិការបុគ្គលគ្រប់គ្រាន់៕