កម្ពុជា សុំផែនទីពីមហាអំណាចដើម្បីដោះស្រាយរឿងព្រំដែន
ក្នុងដំណោះស្រាយតានតឹងព្រំដែនជាមួយវៀតណាម រដ្ឋាភិបាលកម្ពុជា កាលពីល្ងាចថ្ងៃទី១៥ កក្កដា បានផ្ញើលិខិតបីច្បាប់ផ្សេងគ្នាទៅកាន់ប្រទេសមហាអំណាច។ ក្នុងនោះមានប្រទេសបារាំង អង់គ្លេស និងសហរដ្ឋអាមេរិក។ ជាការស្នើសុំដែលកម្ពុជាអះអាងថា នឹងអាចបញ្ជៀសភាពជ្រុលនិយម និង មហន្តរាយដល់ជាតិកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ប្រមុខរដ្ឋាភិបាលកម្ពុជា បានស្នើសុំផែនទីពី មហាអំណាច អាមេរិក អង់គ្លេសនិងបារាំងដើម្បីដោះស្រាយបញ្ហាតានតឹងព្រំដែនជាមួយវៀតណាម និងដើម្បីបញ្ជៀសការញុះញង់បង្កើតជាចលនាជ្រុលនិយមក្នុងប្រទេស។ លោកនាយករដ្ឋមន្ត្រីហ៊ុន សែនបានបញ្ជាក់ទៅកាន់មេដឹកនាំពិភពលោកថា ការផ្តល់ផែនទីដែលកម្ពុជាបានតម្កល់នៅឆ្នាំ១៩៦៤នោះ គឺដើម្បីជាប្រយោជន៍ដល់ពលរដ្ឋកម្ពុជា និងដើម្បីបញ្ជាក់ឱ្យបានច្បាស់ពីភាពហ្មត់ចត់ និងរក្សាភាពស្អាតស្អំរបស់រដ្ឋាភិបាលកម្ពុជាក្នុងការបោះបង្គោលព្រំដែន។
អ្វីដែលសំខាន់ជាងនេះទៅទៀត គឺបញ្ចប់ការញុះញង់ និងការបង្កើតភាពជ្រុលនិយមនៅក្នុងប្រទេស ដែលនឹងអាចនាំមហន្តរាយដល់សង្គមកម្ពុជា។ ក្រៅពីនោះ ការផ្តល់ផែនទីដែលប្រទេសមហាអំណាចបានទទួលស្គាល់នេះ គឺដើម្បីរក្សាទំនាក់ទំនងល្អជាមួយប្រទេសជិតខាង ប្រកបដោយតម្លាភាពចំពោះជាតិកម្ពុជាទាំងមូលផងដែរ។
ការសរសេរស្នើសុំផែនទីពីប្រមុខរដ្ឋាភិបាលកម្ពុជានៅពេលនេះ គឺបន្ទាប់ពីកម្ពុជាមិនទាន់បានទទួលចម្លើយពីអង្គការសហប្រជាជាតិដែលកម្ពុជាបានសរសេរលិខិតស្នើសុំផែនទីដើមរបស់កម្ពុជា។សូមបញ្ជាក់ថាកម្ពុជានិងប្រទេសវៀតណាម បានកើនឡើងភាពតានតឹងនៅតាមព្រំដែនមិនធ្លាប់មានកន្លងមកបន្ទាប់ពីប្រទេសវៀតណាមបានជីករណ្តៅស្រះក្នុងខេត្តរតនៈគីរី និងការកសាងប៉ុស្តិ៍យោធានៅខេត្តកណ្តាលជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ